2
Te Tumeꞌl Titzaꞌ Tzan Qxnaqꞌtzan Tukyꞌi Qtata Dios
1 Ntons [tzan tpaj kyaqil nini], tbꞌay wetz ngan tzan txik nqꞌumaꞌ tzan qxnaqꞌtzan tukyꞌi Qtata Dios bꞌix tzan txik jqaniꞌ tukyꞌiꞌl bꞌix tzan txik qsiꞌ pixon te tetz, bꞌix kyaqil ntzania kyiꞌj kyaqil xjal 2 bꞌix kyiꞌj kyaqil kye kꞌulul mandad bꞌix kyiꞌj kyaqil kye aj at kyajwalil. Ikxji tzan qanqꞌin tuj jun tumeꞌl kꞌontiꞌl qꞌoj bꞌix chewsaꞌ qanim, tuj jun tumeꞌl nqoxjanin Qtata Dios bꞌix nqoliman kye xjal. 3 Galan tzan qxnaqꞌtzan ikxji tzan tpaj nqet tuj twitz Qtata Dios, te Qtata Dios aj koloyon qiꞌj. 4 Komo te Qtat tgan tzan kykolet kyaqil xjal bꞌix tzan tel kynikyꞌ tiꞌj te bꞌanꞌax. 5 Komo cha jun Qtata Dios at, bꞌix cha jun te yoliyon qxol qetz tukyꞌi Qtata Dios, a te Kristo Jesus aj owok xjal 6 bꞌix oxik tqꞌapoꞌ tibꞌ tzan tkamik te kkyꞌixel kyaqil xjal tzan kykolet. A te tpakbꞌalilni aj oxik pakbꞌaꞌ aj tponkix te qꞌij bꞌisuꞌ tzan te Qtata Dios.* 7 Astilji wetz otzaj siꞌ wajwalil tzan npakbꞌan bꞌix tzan wok jun tkyꞌixel Jesukrist, bꞌix otzaj siꞌ wajwalil tzan kxik nxnaqꞌtzaꞌ kye aj nyaꞌtx tijajil Israel, tzan kxik nxnaqꞌtzaꞌ jaꞌ tzan tok witꞌlet kykꞌuꞌj bꞌix tzan tel kynikyꞌ te bꞌanꞌax.* (Wetz tukyꞌi tbꞌi Qajaw Jesukrist nxik nqꞌumaꞌ bꞌanꞌax, kꞌontiꞌl nkyinnikꞌon.)
8 Ntons astilji wetz ngan tzan kxnaqꞌtzan kye xjal tuj kyaqil luwar jaꞌ ateꞌ. Intjaw kyin kyqꞌabꞌ jawnaq te Qtata Dios per tukyꞌi jun kyanimb bꞌan aꞌox te tetz bꞌix kꞌontiꞌl jun qꞌoj tuj kyanim, bꞌix nyaꞌtx tzan tnaꞌnon kyanim.
9 Yatzun kye xuj, wetz ngan tzan tok ksiꞌ jun kyqꞌanaq tuj jun tumeꞌl aj nqet tuj twitz Dios bꞌix tuj kywitz xjal. Ax tzan tqet ktxakuꞌ kyibꞌ tukyꞌi jun tumeꞌl galan bꞌix nyaꞌtx tzan tqet kyjiqꞌbꞌaꞌ kyibꞌ tukyꞌi kywiꞌ bꞌan txakuꞌ bꞌix tukyꞌi oro qa tukyꞌi perlas, qatzun tukyꞌi kyqꞌanaq bꞌan twiꞌ kar iktzeꞌxtzun mas tbꞌanileꞌ kywitz kye txqꞌanky,* 10 sinoke a tgan tzan kykꞌulun galan kyukyꞌi txqꞌanky. Komo ikxji a tgan tzan kykꞌulun kye xuj aj nkyexjanin Qtata Dios tukyꞌi kykꞌulbꞌen galan. 11 Kye xuj a tgan tzan tok kchaꞌoꞌ jun xnaqꞌtzbꞌilj per kꞌontiꞌl tzan kywululun tiꞌj sinoke tzan tqet kyokslaꞌ. 12 Wetz nlay ntzoqpij tzan kxnaqꞌtzan kye xuj ni tzan kykꞌulun mandad kyiꞌj kye ichan; bꞌix kꞌontiꞌl tzan kywululun kxol kye qerman. 13 Komo te Qtata Dios a te Adan oqet tkꞌuluꞌ tbꞌay, nyaꞌtx a te Eba,* 14 bꞌix nyaꞌtx a te Adan te aj oqet eqꞌiꞌ sinoke a te xuj, bꞌix ya ma qet eqꞌiꞌ oqet tzꞌaqik tuj choj.* 15 Per bꞌaꞌn tzan kykaj galanc kye xuj qa [oqtel kykꞌuluꞌ iktzaꞌ kykajlen siꞌx tzan te Qtata Dios] tzan kyalan, per aꞌox qa nlay kaj kykolaꞌ tzan tok kywitꞌbꞌaꞌ kykꞌuꞌj tiꞌj Qtat, bꞌix tzan kꞌon tkaj kykolaꞌ titzaꞌ nqet kyganiꞌ [te tetz bꞌix kye qerman], bꞌix tzan kyten pawaꞌ kyibꞌ aꞌox te Qtat, bꞌix ax tzan kynabꞌlin galan [iktzaꞌ maꞌtx xik nqꞌumaꞌni].