3
Titzaꞌ A Tgan Tzan Kybꞌet Tuj Tumeꞌl Kye Tijxjal Aj Nim Kyajwalil
1 Ja yol ntzani bꞌanꞌax: Qa at abꞌl aj tgan jun topis tzan tok tijxjal aj nim tajwalil kxol kye qerman, nini jun taqꞌun galan te aj nꞌel tganiꞌni. 2 Astilji te tumeꞌl titzaꞌ nbꞌet te jun tijxjal aj at tajwalil kxol kye qerman a tgan chꞌinwt nyaꞌtx galan tiꞌj. Ax a tgan cha jun txuꞌjel. Ax presis tzan tnabꞌlin bꞌan galan, bꞌix tzan tbꞌet tuj jun tumeꞌl aj bꞌisuꞌ byenech titzaꞌ. A tgan tzan sten jun xjal aj nkꞌulun kyaqil tukyꞌi jun tumelil, ax galan nabꞌlin tzan kxik tnaꞌoꞌ txqꞌanky aj nkyepon tjay, bꞌix bꞌaꞌn tzan txik txnaqꞌtzaꞌ kye xjal. 3 Bꞌix nyaꞌtx jun xjal aj bꞌaꞌn tzꞌukꞌan, bꞌix joyol qꞌoj sinoke jun xjal aj bꞌaꞌn tzꞌonen junky, njoyon tzan sten kyaqil galan, bꞌix nyaꞌtx cha tbꞌisunqet titzaꞌ tzan tok qꞌinon. 4 Bꞌix jun xjal aj totzqiꞌ titzaꞌ tzan tkꞌulun mandad tuj tjay, bꞌix kye tkꞌwaꞌal nkyeꞌokslan tetz, bꞌix bꞌaꞌn kyeliman. 5 Komo jun xjal aj kꞌontiꞌl nkawin galan tuj tjay, ¿ntons titzaꞌ owokelten kawiyon kxol kye qerman? 6 Te jun tijxjal nyaꞌtx jun aj man txiklen tokslaꞌ, komo kebal tzan tqet tjiqꞌbꞌaꞌ tibꞌ bꞌix yaji oqtel tzꞌaqik bꞌix oxeꞌl siꞌ tuj il iktzaꞌ te Tajaw Choj. 7 Jun tijxjal, a tgan aj jiqꞌbꞌaꞌ tzan kye aj kꞌontiꞌl nkyeꞌokslan; ikxji tzan kꞌon tel tin tkyꞌexaw bꞌix tzan kꞌon tqet eqꞌiꞌ tzan te Tajaw Choj.*
Titzaꞌ A Tgan Tzan Kybꞌet Tuj Tumeꞌl Kye Tijxjal Oneyon Kꞌulul Kwent Kxol Kye Qerman
8 Ntons ax ikxji kye tijxjal oneyon kꞌulul kwent kxol kye qerman.a A tgan chꞌinwt jun tidiꞌ nyaꞌtx galan aj bꞌaꞌn tzan kyyolin kye xjal kyiꞌj, bꞌix nyaꞌtx xjal xpilitxꞌeꞌ, bꞌix nyaꞌtx xjal aj ajun kyexhbꞌaꞌjin, bꞌix nyaꞌtx xjal aj nkyekꞌulun ganar tmin tukyꞌi jun tumeꞌl aj nyaꞌtx galan, 9 sinoke a tgan tzan tqet kyokslaꞌ te tumelil aj nqokslaꞌ bꞌix kꞌontiꞌl tzan tyolin kyanim jun tidiꞌ kyiꞌj. 10 Tbꞌay a tgan tzan kyok te jun preb tzan tok eꞌelet qa kꞌontiꞌl tidiꞌ nyaꞌtx galan kyiꞌj; yaji qatzun nkykꞌuluꞌ kyaqil galan, bꞌaꞌn tzan kyok tijxjal oneyon kꞌulul kwent kxol kye qerman.b
11 Ax ikxji kye kxuꞌjel, a tgan kꞌontiꞌl jun tidiꞌ kyiꞌj aj bꞌaꞌn tzan kyqet yoliꞌ tzan kye xjal, bꞌix nyaꞌtx chimol yoleꞌ, bꞌix tzan kyanqꞌin tuj jun tumeꞌl bꞌan galan, bꞌix kꞌontiꞌl tzan tkaj ksiꞌ tzan kykꞌulun kyaqil aj presis tzan tqet kykꞌuluꞌ. 12 Kye tijxjal aj nkyeꞌonen kꞌulul kwent kxol kye qerman, a tgan cha jun kxuꞌjel bꞌix aj bꞌan galan nkyekꞌulun mandad kyiꞌj kykꞌwaꞌal bꞌix ax kyiꞌj kyaqil aj tuj kyjay. 13 Komo kye aj nkyeꞌonen galan kxol kye qerman, kyetz nkyeqet jiqꞌbꞌaꞌ bꞌix mas nꞌok nimsaꞌ kykꞌuꞌj tzan kykꞌulun tidiꞌchq tukyꞌi jun kykꞌuꞌj witꞌlik tiꞌj Kristo Jesus.
14 Wetz loꞌik nkꞌuꞌj tzan npon naj qꞌolbꞌel te yatz, per nqet ntzꞌibꞌaꞌ kyaqil ntzani te yatz 15 qa nlay kyinpon luwew, ntons awebꞌen titzaꞌ tzan abꞌet tuj tumeꞌl kxol kye tkꞌwaꞌal Qtata Dios, te Qtata Dios aj at jun tanqꞌin bꞌix kye tkꞌwaꞌal aj eqꞌiꞌ te tpakbꞌalil bꞌanꞌax kyitzaꞌ bꞌix nkyekolon tiꞌj te bꞌanꞌax. 16 Bꞌanꞌax bꞌan tumeꞌl te aj kwest tuq tzan tel nikyꞌj tiꞌj oqtxiꞌ titzaꞌ oqet tbꞌisuꞌ te Qtata Dios tzan tkolon qiꞌj, per yatzun ajnaꞌl oje tzaj tyekꞌuꞌ qetz, bꞌix ikxjani te tumeꞌl: Tetz xhchiꞌjel, xhchiꞌjel xjalkix tuq bꞌix tzan te Txew Dios owok eꞌeꞌ kꞌontiꞌl xhchoj. Owok eꞌeꞌ tzan kye ángel bꞌix oxik pakbꞌaꞌ kxol xjal jaꞌchq.c Eꞌokslan tiꞌj tzani twitz txꞌoꞌtxꞌ bꞌix okꞌamet tuj kaꞌj aj jaꞌ at nim xhchqitzꞌunal.