4
Jun Tpakbꞌalil Kyiꞌj Kye Aj Okajel Kykolaꞌ Tzan Kyokslan
1 Te Txew Dios ntqꞌumaꞌ xtxolil, tuj jun tyemp aj tzul mas yaj, aj chꞌinky tuq tul te Qajawil, txqꞌan qerman okajel kykolaꞌ tzan tok witꞌlet kykꞌuꞌj tiꞌj Qtat. Bꞌix cha owokel ksiꞌ kywiꞌ kyiꞌj malspirit aj cha nkyeꞌeqꞌin xjal, bꞌix kyiꞌj xnaqꞌtzbꞌilj aj cha malspirit swal tetz; 2 owokel ksiꞌ kywiꞌ kyiꞌj xjal aj xmeletzꞌ-eꞌ bꞌix sqꞌoꞌl, xjal aj ya kꞌontiꞌl nkynaꞌoꞌ tuj kyanim alkyetz te galan bꞌix alkyetz te nyaꞌtx galan. 3 Kyetz nlay ktzoqpij tzan kyok junan kye xjal, bꞌix nlay ktzoqpij tzan kywaꞌan kye xjal tiꞌchq aj okaj siꞌ tzan Qtata Dios. Komo okaj tsiꞌ tzan jkꞌamon nini tukyꞌi jun pixon te tetz, qetz aj nqoꞌokslan bꞌix aj qotzqiꞌ te tumeꞌl bꞌanꞌax. 4 Komo kyaqil aj oje qet tkꞌuluꞌ Qtata Dios jun galan* bꞌix kꞌontiꞌl tzan tqet yajlet qa oxeꞌl qsiꞌ pixon te Qtata Dios tiꞌj, 5 tzan tpaj oje kaj pawaꞌ aꞌox te Qtata Dios tzan te tyol aj oxik tqꞌumaꞌ bꞌix tzan tpaj nqoxnaqꞌtzan tiꞌj.
6 Qa yatz oxeꞌl axnaqꞌtzaꞌ kyaqil ntzani kxol kye qerman, oxhchꞌokel jun xnaqꞌtzon aj nxnaqꞌtzan bꞌan galan tiꞌj te Kristo Jesus, bꞌix ochteyon jwert tukyꞌiꞌl tzan tpaj nxhchaꞌon tyol te aj jaꞌ witꞌlik jkꞌuꞌj bꞌix tzan tpaj te tumelil tiꞌj te xnaqꞌtzbꞌilj galan aj nxik awin. 7 Kꞌon tzꞌok asiꞌ awiꞌ tiꞌj te xnaqꞌtzbꞌilj aj cha tuj kywiꞌx kye xjal, aj cha naqe kyyol bꞌiꞌxh bꞌix nyaꞌtx galan nꞌel tuj twitz Qtata Dios. Yatz kꞌon xhchꞌok ikxji sinoke pabꞌet tuj jun tumeꞌl aj ntxjanin Qtata Dios. 8 Jun tumeꞌl aj njkꞌuluꞌ tzan tok jun galan te qchiꞌjel, nini at token tiꞌj te qchiꞌjel tzani twitz txꞌoꞌtxꞌ; per te tumeꞌl oj qxjanin te Qtata Dios nꞌoken te jun galan tiꞌj kyaqil tzani twitz txꞌoꞌtxꞌ bꞌix ax te jun-eleꞌx tuj kaꞌj. 9 Aj yol nini bꞌanꞌax, bꞌix a tgan tzan kyokslan kyaqil xjal tiꞌj. 10 Astilji nqoꞌaqꞌunan nim, nqoꞌok-il tiꞌj tzan tpaj oje kaj loꞌet jkꞌuꞌj tiꞌj Qtata Dios aj at jun tanqꞌin bꞌix bꞌaꞌn tzan tkolon kyiꞌj kyaqil xjal aj nkyeꞌokslan tiꞌj.
11 Te aj ntzani intxik akꞌuluꞌ mandad kxol bꞌix intxik axnaqꞌtzaꞌ. 12 Kꞌon tzꞌok en jun tidiꞌ awiꞌj aj bꞌaꞌn tzan aqet yoliꞌ tzan tpaj man kꞌwaꞌl aꞌich. Mejor, intqet ayekꞌuꞌ kye qerman titzaꞌ tzan qyolin galan bꞌix titzaꞌ tzan qbꞌet tuj tumeꞌl, titzaꞌ tzan kyqet qganiꞌ txqꞌanky, bꞌix titzaꞌ tzan tok qwitꞌbꞌaꞌ jkꞌuꞌj tiꞌj Qajawil tukyꞌi jun qanim bꞌan saq. 13 Minaꞌ npon wetz, intok asiꞌ akꞌuꞌj tzan tjaw awen te Tuꞌjal Dios kxol kye qerman, bꞌix intxik animsaꞌ kykꞌuꞌj kye qerman bꞌix inkxik axnaqꞌtzaꞌ. 14 Kꞌon kaj asiꞌ te awajbꞌen aj otzaj tsiꞌ te Qtata Dios yatz aj kyyolin kye bꞌuchꞌuj tijxjal te tpakbꞌalil aj oxik tswaꞌ Qtat tuj kyanim aj tqet ksiꞌ kyqꞌabꞌ awajsik. 15 Intok asiꞌ akꞌuꞌj tzan tqet akꞌuluꞌ kyaqil ntzaꞌn tzan tok en awiꞌj yatz tzan kyaqil xjal, yatz kyebꞌayleꞌ nxhchꞌok mas jwert tuj awanim tzan abꞌet tuj jun tumeꞌl galan. 16 Intok asiꞌ anabꞌl awiꞌjx titzaꞌ nchbꞌet bꞌix titzaꞌ nxik axnaqꞌtzaꞌ te tumeꞌl. Kꞌon kaj akolaꞌ tzan txik awin te tumeꞌl. Qa oqtel akꞌuluꞌ ikxji, akoloꞌtz awibꞌx bꞌix ax kye aj nkyechaꞌon awiꞌj.