5
Te Tumeꞌl Titzaꞌ Tzan Qyolin Kxol Kye Qerman
1 Kꞌon chjaw kaw oj txik akawiꞌ jun tij, sinoke intxik akawiꞌ kyebꞌaꞌ tukyꞌi tumeꞌl, iktzeꞌxtzun tetz atat. Bꞌix yatzun kye aj man tal-eꞌ iktzeꞌxtzun kyetz awitzꞌin-eꞌ, 2 bꞌix kye bꞌiꞌxh iktzeꞌxtzun kyetz anan, bꞌix kye xuj aj man tal-eꞌ iktzeꞌxtzun awitzꞌin-eꞌ, tukyꞌi jun tumeꞌl bꞌan galan.
Te Tumeꞌl Titzaꞌ Tzan Kyqet Qen Kye Byud
3 Ntons, inkyok awoneꞌ kye xuj aj byud-eꞌ aj kꞌontiꞌl abꞌl kyiꞌj. 4 Qa jun byud ateꞌ tal qatzun tbꞌetxꞌelji, kye tal qatzun tbꞌetxꞌelji kyetz at nim kyoklen tzan kykꞌulun galan te tetz tzan tpaj tetz jun aj tuj kyjayx. Ikxji tzan tok kswaꞌ te kytat iktzaꞌx oxik siꞌ kyetz aj man tuq nekit-eꞌ. Te ntzani nꞌel galan tuj twitz Qtata Dios. 5 Jun byud bꞌan bꞌanꞌax, aj oje kaj bꞌan chꞌi xhchukel, tetz loꞌik tkꞌuꞌj tiꞌj Qtata Dios bꞌix kꞌontiꞌl nkaj tsiꞌ tzan txnaqꞌtzan, bꞌajqꞌij bꞌix bꞌajaqꞌbꞌil nqet twitz twitz Qtata Dios. 6 Per jun byud aj cha nkꞌulun kyaqil iktzaꞌ kye aj kꞌontiꞌl nkyeꞌokslan, tetz kamnaq anke itzꞌoj xhchiꞌjel. 7 Intxik aqꞌumaꞌ kyetz kyaqil ntzani tzan kꞌon kyqet yoliꞌ tzan kye xjal. 8 Abꞌl aj kꞌontiꞌl nxik tsiꞌ aj presis te jun tfamily, bꞌix pyor qa te jun aj tuj tjayx, tetzniꞌn ikjaꞌn tkaj tkolaꞌ aj jaꞌ witꞌlik jkꞌuꞌj, bꞌix tetz mas pyor twitz jun aj kꞌontiꞌl nꞌokslan te Qtata Dios.
9 Jun byud aj bꞌan bꞌanꞌax aj otzꞌibꞌletel kxol kye txqꞌanky byud, aꞌox aj oje jakon oxqal (60) aqꞌbꞌi tetz bꞌix qa cha jun tichmil owoknoj; 10 bꞌix a tgan aꞌox jun aj otzqiꞌmj tzan tpaj tkꞌulbꞌen tiꞌchq galan, bꞌix ejaw tkyꞌibꞌsaꞌ tal galan,a bꞌix galan nabꞌlin kyukyꞌi kye xjal aj nkyepon tjay, bꞌix nkyexik tnaꞌoꞌ kye txqꞌanky qerman tbꞌay twitz tetz,b bꞌix nꞌonen tuq kyukyꞌi kye aj nꞌok kyen twitz xhchoꞌnal, bꞌix tukyꞌi jun tkꞌuꞌjlal ntkꞌuluꞌ tuq tidiꞌchq galan kye xjal.
11 Per kꞌon kyetzꞌibꞌlet kye byud aj man tal-eꞌx, tzan tpaj kyetz oj tel kyqꞌajabꞌ tzan kyok junan, yaji ya kꞌonky kygan te Krist sinoke kygan tzan kyok junan junkyꞌel. 12 Ikxji cha nkyejoyon tzan kxik siꞌ tuj il tzan tpaj nkaj kykolaꞌ tzan tok witꞌlet kykꞌuꞌj aj jaꞌ ojetq tuq tzꞌok kywitꞌbꞌaꞌ tbꞌay. 13 Bꞌix nkyenaqꞌet tzan kxbꞌakꞌan tjay jun tjay jun, bꞌix nꞌok kkyꞌaj bꞌix nyaꞌtx aꞌox ikxji sinoke nkyeꞌok loꞌol yol, nꞌox ksamoꞌ kyibꞌ jaꞌ kꞌontiꞌl kyoklen, bꞌix tidiꞌchq nyaꞌtx galan nkyyoliꞌ. 14 Astilji wetz ngan tzan kyok junan kye byud aj man tal-eꞌx bꞌix inkyalan bꞌix inkyaqꞌunan galan tuj kyjay, ikxji nlay kyeqet yoliꞌ tzan kye aj nꞌok ajqꞌojan kyetz.c 15 Ateꞌ junjun te kyetz oje tzꞌel kypawaꞌ kyibꞌ kxol kye qerman tzan kyok lapet tiꞌj Satanas.
16 Qa jun qerman xuj at jun byud kxol tfamily, intqet tkꞌuluꞌ kwent. Ikxji nyaꞌtx kye qerman okyeqtel kꞌulun kwent tetz, bꞌix kye qerman bꞌaꞌn tzan kyonen kyiꞌj kye txqꞌanky aj bꞌan bꞌanꞌax byud aj kꞌontiꞌl abꞌl kyiꞌj.
Te Tumeꞌl Tzan Kykꞌulun Kwent Kye Qerman Jun Tijxjal Aj At Tajwalil
17 Kye tijxjal aj at kyajwalil aj nkyeꞌaqꞌunan galan kxol kye qerman, kyetz a tgan tzan kyqet jiqꞌbꞌaꞌ nim,d bꞌix tzan txik siꞌ aj presis te kyetz, bꞌix pyor kye aj nkyepakbꞌan bꞌix kye aj nkyexnaqꞌtzan exol. 18 Komo tuj Tuꞌjal Dios nyolin ikxjani: “Kꞌon tzꞌel awin tweꞌ te wakxh aj nꞌaqꞌunan.”e Bꞌix ax nyolin ikxjaniky: “Jun xjal aj nꞌaqꞌunan a tgan tzan tkꞌamon twiꞌ tkꞌuꞌj.”* 19 Qa kye xjal nkyeyolin jun tidiꞌ nyaꞌtx galan tiꞌj jun tijxjal aj at jun tajwalil, kꞌon xik awokslaꞌ qa kꞌontiꞌl kabꞌeꞌ qa ox aj oje tzꞌok kyen qa bꞌanꞌax aj nkyyoliꞌ.* 20 Kye aj kꞌontiꞌl nkaj kykolaꞌ tzan kyjoyon choj, intxik aqꞌumaꞌ kyetz kywitz kyaqil kye txqꞌanky qerman, nyaꞌtx galan aj nkykꞌuluꞌ. Oqtel akꞌuluꞌ ikxji tzan kxobꞌ chꞌin kye txqꞌanky [tzan kꞌon kykꞌulun kyetz ikxji]. 21 Wetz twitz te Qtata Dios bꞌix twitz te Qajaw Kristo Jesus kyukyꞌi kyaqil kye ángel aj joyomeꞌ titzaꞌ, wetz oxeꞌl nqꞌumaꞌ yatz tzan tqet akꞌuluꞌ aj nxik nqꞌumaꞌ yatzni, bꞌix kꞌontiꞌl tzan akꞌulun jun tidiꞌ qa minaꞌ tok achaꞌoꞌ byenech tiꞌj, kꞌontiꞌl tzan akaj alkawet tiꞌj nijunwt abꞌlchaq kyetz. 22 Kꞌon qet asiꞌ aqꞌabꞌ tajsik jun abꞌl [tzan tkꞌamon jun tajwalil] qa minaꞌ tqet abꞌisuꞌ byenech; ikxji tzan kꞌon txik asamoꞌ awibꞌ tuj xhchoj junky. Kꞌon xik asamoꞌ awibꞌ tuj jun nyaꞌtx galan.
23 Ntons, yatzun yatz, komo kobꞌchaq nchyabꞌtik nꞌok tyabꞌil akꞌuꞌj, kꞌon xik awukꞌaꞌ aꞌox aꞌ, sinoke intxik awukꞌaꞌ chꞌin taꞌal ub txꞌamsaꞌ [tzan abꞌantik].f
Kꞌontiꞌl Tidiꞌ Bꞌaꞌn Tzan Tkaj Ewj
24 Te kchoj junjun xjal nꞌel qnikyꞌ tiꞌj bꞌan byenech anke minaꞌ tuq kxik siꞌ tuj il bꞌix yatzun te kchoj kye junjunky nꞌel qnikyꞌ tiꞌj yajxiꞌ. 25 Bꞌix ax ikxji tiꞌj kyaqil te aj galan njkꞌuluꞌ, ax nꞌok eꞌelet, bꞌix te jkꞌulbꞌen aj kꞌontiꞌl nbꞌantik tzan tok en luwew, nlay bꞌantik tzan tkaj ewj bꞌeyx te jun-eleꞌx.