6
Titzaꞌ A Tgan Tzan Kybꞌet Tuj Tumeꞌl Kye Aj At Kyajaw
1 Ntons kyiꞌj kyaqil kye aj nkyeꞌaqꞌunan te jun kyajaw, intqet kyokslaꞌ kyajaw bꞌix inkyqet kylimaꞌ galan tzan kꞌon tqet yoliꞌ te Qtata Dios ni te aj nxik qxnaqꞌtzaꞌ. 2 Bꞌix kye aj at kyajaw aj nkyeꞌokslan [tiꞌj Krist], kꞌontiꞌl tzan tkaj ksiꞌ tzan tqet kyokslaꞌ kyajaw tzan tpaj kyerman kyibꞌ, sinoke a tgan tzan kyaqꞌunan mas galan tzan tpaj ax kyetz nkyeꞌokslan tiꞌj Krist bꞌix ax qerman-eꞌ aj ganimeꞌ nim qitzaꞌ. Intxik axnaqꞌtzaꞌ kyaqil ja ntzani bꞌix inkxik akawiꞌ kyebꞌaꞌ.
Alkyetz Te Jqꞌinomal Bꞌan Bꞌanꞌax
3 Qa at jun nxik txnaqꞌtzaꞌ junky tidiꞌ chuktky aj nyaꞌtx parej tukyꞌi te aj oxik txnaqꞌtzaꞌ te Qajaw Jesukrist, qa kꞌontiꞌl nxik txnaqꞌtzaꞌ iktzaꞌ te Qtata Dios tgan tzan qanqꞌin, 4 te nini jun xjal aj cha nqet tjiqꞌbꞌaꞌ tibꞌx tiꞌj aj ntbꞌisuꞌ bꞌix kꞌontiꞌl tebꞌen chꞌinwt. Cha nxik tqꞌumaꞌ tidiꞌchq tzan kynaꞌnon kyanim kye txqꞌanky bꞌix cha twululunqet tiꞌj tidiꞌchq, bꞌix tzan tpaj nini nkyeꞌekꞌawin, bꞌix nꞌok qꞌoj kxol, bꞌix nkyeyolin yol nyaꞌtx galan tuj twitz Qtata Dios, bꞌix cha kximanqet qa kye txqꞌanky xjal nyaꞌtx galan nkyekꞌulun,a 5 nꞌok kyajqꞌojaꞌ kyibꞌ tzan tpaj te kywiꞌ bꞌan tiꞌchq nyaꞌtx galan ntbꞌisuꞌ, kꞌontiꞌl kyebꞌen alkyetz te bꞌanꞌax, bꞌix kyetz tuj kynabꞌl, qa nkyeꞌokslan tiꞌj Dios, cha tzan tok nim kytumin. 6 Bꞌanꞌax oj qokslan, nim tidiꞌchq njkꞌamoꞌ, per aꞌox qa kontent atoꞌ tiꞌj kyaqil aj at qetz.* 7 Komo aj qitzꞌjik twitz ja txꞌoꞌtxꞌni, kꞌontiꞌl tidiꞌ owul qin, bꞌix ax kꞌontiꞌl tidiꞌ oxeꞌl qinky oj jkamik.* 8 Qa at qweꞌ bꞌix qa at jqꞌanaq ntons qobꞌajten waq kontent tzan aj nini. 9 Yatzun kye aj nꞌel kyqꞌajabꞌ tzan kyok qꞌinon, kyetz nkyeqet tzꞌaqik kyibꞌx bꞌix nkyekaj tzyuꞌ bꞌix tidiꞌchq nꞌel kyganiꞌ aj nyaꞌtx tumeꞌl, aj cha nkꞌulun jun nyaꞌtx galan kyiꞌj, bꞌix nxik in kyetz tuj il tzan kyponaj. 10 Komo te tlokꞌil kyaqil te nyaꞌtx galan tzi ntzaj oj tel qganiꞌ te tmin. Ateꞌ junjun tzan tpaj mer kygan tuq te tmin, okaj kykolaꞌ aj jaꞌ tuq witꞌlik kykꞌuꞌj bꞌix aꞌeꞌxk kyetz oje kykꞌuluj tzan tok kyen twitz xhchoꞌnal.*
Titzaꞌ Tzan Qbꞌet Tuj Tumeꞌl
11 Per yatz, aj qꞌapoꞌ awibꞌ tuj tqꞌabꞌ Qtata Dios, intel apawaꞌ awibꞌ tiꞌj kyaqil aj nini. Pabꞌet tuj tumeꞌl, kꞌon kaj akolaꞌ tzan axjanin Qtata Dios, intok witꞌlet akꞌuꞌj tiꞌj bꞌajqꞌij, kꞌon kaj asiꞌ tzan kyqet aganiꞌ kye qerman, kꞌon bꞌaj apasens, bꞌix payolin kyebꞌaꞌ kyukyꞌi txqꞌanky. 12 Intok asiꞌ akꞌuꞌj tiꞌj te aj jaꞌ witꞌlik jkꞌuꞌjb anke bꞌan kwest. Komo at jun awanqꞌin te jun-eleꞌx, kꞌon kaj asiꞌ tzan aten jwert, komo tzan tpajji te Qtata Dios oxhtzaj tukꞌleꞌ, bꞌix yatz kywitz kyꞌilaꞌj qerman oxik aqꞌumaꞌ aj jaꞌ witꞌlik akꞌuꞌj. 13 Ajnaꞌl nxik nqꞌumaꞌ te yatz tukyꞌi tbꞌi Qtata Dios aj nxik sin tanqꞌin kyaqil tidiꞌchq, bꞌix nxik nqꞌumaꞌ tukyꞌi tbꞌi Qajaw Kristo Jesus aj oxik tqꞌumaꞌ tumeꞌl twitz te Pónsio Piláto,* 14 nxik nqꞌumaꞌ te yatz tzan tqet awokslaꞌ te aj nxik nqꞌumaꞌni, bꞌix kꞌuluj nini tuj tumeꞌl bꞌix kꞌon akꞌulun jun tidiꞌ nyaꞌtx galan aj okyeyoliyon kye xjal qa nyaꞌtx galan. Intqet akꞌuluꞌ ikxji bꞌeyx ajnaꞌl max oj tul junkyꞌel te Qajaw Jesukrist. 15 Tetz otzajel tyekꞌuꞌ tibꞌ tujbꞌaꞌn pon te tyemp. A tetz te aj bꞌan kyꞌiwlaꞌ, aꞌox tetz at tajwalil tajsik kyaqil, aꞌox tetz te twitzaleꞌ kꞌulul mandad kyiꞌj kyaqil kꞌulul mandad, bꞌix aꞌox tetz tajawil kyiꞌj kyaqil kye aj at kyajawil. 16 Aꞌox tetz te aj kꞌontiꞌl nkamik, a tetz nnajan tuj jun chqitzꞌunal aj nijunwt bꞌaꞌn tzan tox tzi, bꞌix nijunwt xjal bꞌaꞌn tzan txik en tetz. Intqet jiqꞌbꞌaꞌxwit tetz te jun-eleꞌx bꞌix instenxwit te tajwalil tiꞌj kyaqil. Intokxwit ikxji.
Titzaꞌ A Tgan Tzan Kybꞌet Tuj Tumeꞌl Kye Aj At Kyqꞌinomal
17 Ntons, kye aj at kyqꞌinomal twitz ja txꞌoꞌtxꞌni, intxik aqꞌumaꞌ kyetz tzan kꞌon tqet kyjiqꞌbꞌaꞌ kyibꞌ bꞌix kꞌon kaj loꞌet kykꞌuꞌj tiꞌj kyqꞌinomal, tzan tpaj te jqꞌinomal nyaꞌtx te jun-eleꞌx. Mejor tzan tkaj loꞌet kykꞌuꞌj tiꞌj Qtata Dios tzan tpaj a tetz te aj ntzaj sin qetz tidiꞌchq tzan qchalaj bꞌix nyaꞌtx cha chꞌimuꞌs-wit ntzaj tsiꞌ. 18 Intxik aqꞌumaꞌ kyetz tzan kykꞌulun nim tidiꞌchq bꞌan galan, bꞌix tzan kyonen tukyꞌi jun tkꞌuꞌjlal tzan token aj tidiꞌ kyetz te jun galan kye txqꞌanky qerman. 19 Ikxji te kykꞌulbꞌen galan tzani twitz txꞌoꞌtxꞌ owokel te jun galan yajxiꞌ, owokel te jun galan tiꞌj te kyanqꞌin bꞌan bꞌanꞌax bꞌix te jun-eleꞌx.
Jun Kawbꞌil
20 Yatz Timotey, kꞌon tzꞌajnaj tiꞌj awanim tzan akꞌulun kyaqil aj maꞌtx xik nqꞌumaꞌ yatzni. Kꞌon tzꞌok asiꞌ axkyin tiꞌj kyaqil aj nkyqꞌumaꞌ kye xjal aj kꞌontiꞌl token bꞌix kꞌontiꞌl nqet tuj twitz te Qtata Dios, kyaqil aj nkybꞌisuꞌ kyetz iktzaꞌ bꞌanꞌax per nyaꞌtx. 21 Komo iktzaꞌx junjun nxik kxnaqꞌtzaꞌ iktzaꞌ cha tuj kywiꞌx kyetz, oje kaj kykolaꞌ aj jaꞌ tuq witꞌlik kykꞌuꞌj. Bwen ntons, Qtata Dios tzaj sinxwit jun nim bꞌan galan awajsik yatz.