Te Tkabꞌiꞌ Uꞌj Stzꞌibꞌen Paꞌk Te Timotey
1
Jun Limbꞌil
1 Wetz aꞌin Paꞌk aj tkyꞌixel Kristo Jesus tzan tpaj inkaj siꞌ tzan te Qtata Dios [tzan npakbꞌan] tiꞌj te qanqꞌin te jun-eleꞌx tukyꞌi Kristo Jesus iktzaꞌx okaj tsiꞌ tyol tiꞌj. 2 Nqet ntzꞌibꞌaꞌ ja uꞌj te yatz nkꞌwaꞌal Timotey* aj bꞌan ganimich witzaꞌ. Tzaj siꞌxwit te yatz tzan te Qtata Dios bꞌix te Qajaw Kristo Jesus jun nim bꞌan galan aj mas nim twitz te aj nqajoꞌ, bꞌix tzꞌokxwit loꞌet tkꞌuꞌj awiꞌj bꞌix qetxwit xhchewsaꞌ akꞌuꞌj.
Te Paꞌk Bꞌan Nxnaqꞌtzan Tiꞌj Timotey
3 Wetz, oj nxnaqꞌtzan tukyꞌi Qtata Dios bꞌajqꞌij bꞌix bꞌajaqꞌbꞌil, nxhstzaj nnaꞌoꞌ bꞌix nxik nsiꞌ nim pixon te Qtat awiꞌj yatz. Wetz nqet nnaꞌoꞌ te Qtat iktzaꞌx kye wijajil oqtxiꞌ, bꞌix kꞌontiꞌl nyolin wanim jun tidiꞌ wiꞌj. 4 Wetz ntzaj nnaꞌoꞌ awoꞌjbꞌen bꞌix ngan tzan awok wen tzan nchalaj nim awiꞌj. 5 Ntzaj nnaꞌoꞌ titzaꞌ yatz witꞌlik akꞌuꞌj tiꞌj Qtata Dios tukyꞌi jun tkꞌuꞌjlal bꞌan bꞌanꞌax iktzaꞌx te abꞌiꞌixh Loyd bꞌix te anan Ewnis [witꞌlik tuq kykꞌuꞌj tiꞌj Qajawil], bꞌix wetz webꞌen ax yatz ikxji witꞌlik akꞌuꞌj tiꞌj Qajawil.* 6 Astilji wetz ngan tzan txik nqꞌumaꞌ yatz tzan kꞌon tkaj asiꞌ te awajbꞌen aj otzaj tsiꞌ te Qtata Dios te yatz, aj tqet nsiꞌ nqꞌabꞌ awajsik. 7 Komo te Qtata Dios otzaj tsiꞌ Txew te qetz nyaꞌtx tzan qxobꞌ sinoke tzan tnimsan jkꞌuꞌj, bꞌix tzan kyqet qganiꞌ [txqꞌanky], bꞌix tzan tok jun qnabꞌl tzan jkꞌulun mandad qibꞌx [iktzaꞌ tetz tgan].
8 Astilji kꞌon chqet kyꞌixwik tzan txik apakbꞌaꞌ tiꞌj Qajawil, bꞌix kꞌon chqet kyꞌixwik wiꞌj tzan tpaj akyinqex pres. Komo te Qtata Dios nnimsan akꞌuꞌj, kꞌamoj tzan tok awen chꞌin twitz aj xhchoꞌnal aj nꞌok qen tzan tpaj nqopakbꞌan te tpakbꞌalil aj nkolon te qetz. 9 Te Qtata Dios oqet tkoloꞌ aꞌoꞌ bꞌix ajnaꞌl aji tetz twitzaleꞌ otzaj ukꞌlen te qetz tzan jkaj pawaꞌ aꞌox te tetz, nyaꞌtx tzan tpaj galan-wit aꞌoꞌ, sinoke tzan tpaj ikxjikix tetz tgan bꞌix tetz otzaj tsiꞌ jun nim bꞌan galan qajsik tzan tpaj Kristo Jesus anke kꞌontiꞌl tuq nqajoꞌ, bꞌix [oqet tbꞌisuꞌ ntzani] atx aj minaꞌ tuq tbꞌantik te twitz txꞌoꞌtxꞌ kyaqil. 10 Bꞌix ajnaꞌl oje qet tyekꞌuꞌ titzaꞌ nqoqet tganiꞌ tzan tpaj otzaj tlajoꞌ te Kristo Jesus aj koloyon qiꞌj, bꞌix ikxji opon tnajsaꞌ te kamikyj bꞌix otzaj tqꞌumaꞌ te tpakbꞌalil galan aj nyolin titzaꞌ tzan qanqꞌin te jun-eleꞌx. 11 Te Qtata Dios okaj sin te wetz tzan txik npakbꞌaꞌ ja tpakbꞌalilni, bꞌix inkaj tsiꞌ iktzaꞌ jun tkyꞌixel te Kristo Jesus bꞌix tzan kxik nxnaqꞌtzaꞌ txqꞌanky.* 12 Astilji nkyꞌik wiꞌj kyaqil ja xhchoꞌnalni, per kꞌontiꞌl nkyinkyꞌixwik tzan tpaj wetz webꞌen abꞌl qiꞌj oje kyinꞌokslan, bꞌix wetz webꞌen tetz at tajwalil tzan tqet tkoloꞌ te aj otzaj tqꞌumaꞌ wetz, kolomaj titzaꞌ ajnaꞌl max oj tul.
13 Bꞌix yatz, intxik awin te tumelil iktzaꞌx aj oxik nxnaqꞌtzaꞌ yatz, pawanqꞌin witꞌlik akꞌuꞌj tiꞌj Kristo Jesus, bꞌix inkyqet aganiꞌ txqꞌanky iktzaꞌx tetz nqoqet tganiꞌ, 14 bꞌix tzan te Txew Dios aj atqex tuj qanim, intqet akoloꞌ te ja xnaqꞌtzbꞌil galanni.
15 Komo yatz awebꞌen kyiꞌj kye aj tzajnaqeꞌ tuj Asy, kyetz oje kyinkaj kykolaꞌ, bꞌix kxol kyetz ax te Pijel bꞌix te Ermójenes. 16 Yatzun tiꞌj te qerman Onesíforo, tzꞌok loꞌetxwit tkꞌuꞌj te Qtata Dios kyiꞌj kye aj tuj tjay, tzan tpaj tetz kyꞌilaꞌj-el ojaw teqꞌiꞌ nkꞌuꞌj bꞌix kꞌontiꞌl oqet kyꞌixwik tzan tpaj akyinqex tuq pres. 17 Bꞌix aj tpon tetz amaqꞌ Rom, owokten joyol wetz jaꞌ tuq akyinqet, kꞌontiꞌl okaj tsiꞌ tzan tjoyon wiꞌj max aj nkanet titzaꞌ. 18 Tzꞌokxwit loꞌet tkꞌuꞌj te Qajawil tiꞌj tetz tuj aj qꞌij aj tzul mas yajni. Yatz awebꞌen titzaꞌ tetz owonen galan qiꞌj tuj Efeso.