Te Uꞌj Stzꞌibꞌen Paꞌk Te Tit
1
Jun Limbꞌil
1 Wetz aꞌin Paꞌk qꞌapoꞌ wibꞌ nkyinꞌaqꞌunan te Qtata Dios bꞌix aꞌin jun tkyꞌixel Jesukrist. Inxik lajoꞌ kxol kye aj joyomeꞌ tzan te Qtata Dios tzan tok kywitꞌbꞌaꞌ kykꞌuꞌj tiꞌj Jesukrist, bꞌix tzan tel kynikyꞌ byenech te tumeꞌl bꞌanꞌax iktzaꞌ te Qtata Dios tgan tzan qanqꞌin. 2 Te nini nꞌoken tzan tkaj loꞌet jkꞌuꞌj tiꞌj jun qanqꞌin te jun-eleꞌx. Te Qtata Dios kꞌontiꞌl nnikꞌon, bꞌix tetz, atx aj minaꞌ tuq tqet tkꞌuluꞌ te twitz txꞌoꞌtxꞌ, okaj tsiꞌ tyol tiꞌj te ja qanqꞌinni, 3 bꞌix yatzun aj tpon tyemp aj bꞌisuꞌ tuq tetz titzaꞌ, otkꞌuluj tzan tok chaꞌoꞌ te tpakbꞌalil, txiklen npakbꞌaꞌ aj nkaj tsiꞌ wetz tzan nkꞌulun iktzaꞌx okaj tqꞌumaꞌ te Qtata Dios aj koloyon qiꞌj.
4 Ntons, wetz nqet ntzꞌibꞌaꞌ ja uꞌjni te yatz Tit.* Yatz [naqe] jun bꞌanꞌax nkꞌwaꞌal aꞌich tzan tpaj witꞌlik jkꞌuꞌj parej. Tzaj tsiꞌxwit te Qtata Dios bꞌix te Kristo Jesus aj koloyon qiꞌj, jun nim bꞌan galan awajsik bꞌix qetxwit chewsaꞌ akꞌuꞌj.
Te Tumeꞌl Titzaꞌ Tzan Tbꞌet Jun Tijxjal Aj At Tajwalil Kxol Kye Qerman
5 Aj akaj nsiꞌ tuj tkwentil Kret, ochkaj nsiꞌ tzan tqet akꞌuluꞌ te aj npaltin tuq tuj qaqꞌun txini, bꞌix tzan kykaj asiꞌ tuq tijxjal kꞌulul kwent kye qerman jaꞌchq tuj kyaqil amaqꞌ tzi, iktzaꞌx txiklen nqꞌumaꞌ yatz. 6 Ntons, te jun tijxjal aj at tajwalil kxol kye qerman a tgan tzan tbꞌet tuj tumeꞌl, bꞌix kꞌontiꞌl tidiꞌ bꞌaꞌn tzan kyyolin tiꞌj. Ax cha jun txuꞌjel, bꞌix kye tkꞌwaꞌal a tgan nkyeꞌokslan tiꞌj Qajawil, bꞌix oksloneꞌ, bꞌix nyaꞌtx tzan nkyebꞌet tuj tidiꞌchq nyaꞌtx galan. 7 Jun tijxjal aj at tajwalil kxol kye qerman, tetz nꞌaqꞌunan tuj taqꞌun Qtata Dios. Astilji a tgan tzan tbꞌet bꞌan tumeꞌl, bꞌix nyaꞌtx cha tbꞌisunqet tiꞌjx, bꞌix ax nyaꞌtx jun xtxꞌuꞌj twiꞌ, bꞌix kꞌontiꞌl nxhbꞌaꞌjin, bꞌix nyaꞌtx jun joyol qꞌoj, bꞌix nyaꞌtx cha tbꞌisunqet tzan tkꞌulun ganar tmin tuj jun tumeꞌl nyaꞌtx galan. 8 A tgan galan nabꞌlin tzan kxik tnaꞌoꞌ txqꞌanky aj nkyepon tjay, bꞌix bꞌan tgan kꞌulun kyaqil tuj tumeꞌl, bꞌix nꞌel tnikyꞌ alkyetz te galan, bꞌix nkꞌulun tumeꞌl [kyukyꞌi txqꞌanky], bꞌix jun xjal pawaꞌ tibꞌ aꞌox te Qtata Dios, bꞌix nkꞌulun mandad tibꞌx iktzaꞌ te Qtata Dios tgan, 9 bꞌix bꞌan tumeꞌl nxnaqꞌtzan te tpakbꞌalil bꞌanꞌax aj qetz nxik qxnaqꞌtzaꞌ, bꞌix ikxji tzan txik tnimsaꞌ kykꞌuꞌj txqꞌanky tukyꞌi te xnaqꞌtzbꞌilj aj bꞌan bꞌanꞌax, bꞌix ax tzan txik tkawiꞌ kye aj nkyeyolin nyaꞌtx galan tiꞌj te tpakbꞌalil.*
10 Komo ateꞌ kyꞌilaꞌj kye aj kꞌontiꞌl nꞌox tuj kywiꞌ, nxik kyqꞌumaꞌ tidiꞌchq aj kꞌontiꞌl tumeꞌl bꞌix cha nqet kyeqꞌiꞌ xjal, pyor kye aj tzunx nxik kxnaqꞌtzaꞌ tzan tok kyechalul kye qerman. 11 Kye ja xjalni a tgan tzan tqet elamoꞌ ktziꞌ tzan tpaj nxik kxnaqꞌtzaꞌ tidiꞌchq nyaꞌtx galan tzanjaꞌx tzan tok jun galan te kyetz, bꞌix ikxji kyꞌilaꞌj jay xjal nkaj ksiꞌ tzan kyokslan te Tpakbꞌalil. 12 Jun aj kxol kyetzx, aj nꞌok kyqꞌumaꞌ tuq kyetz iktzaꞌ jun aj yolil tyol Dios, otqꞌumaj ikxjani: “Kye aꞌeꞌ ja aj Kretni bꞌan pur laꞌj-eꞌ, kyetz naqe txkup-eꞌ, cha kxujunqet, bꞌan kyꞌaj-eꞌ.” 13 Te nini bꞌanꞌax; astilji inkxik akawiꞌ byenech kye qerman tzan kyten jwert aj jaꞌ oje tzꞌok kywitꞌbꞌaꞌ kykꞌuꞌj, 14 bꞌix tzan kꞌon tok ksiꞌ kywiꞌ tiꞌj tidiꞌchq aj nkyqꞌumaꞌ kye aj tijajil Israel aj cha tuj kywiꞌx nꞌetz kyin, bꞌix tzan kꞌon txik kyokslaꞌ kyyol kye aj nꞌel kyikꞌoꞌ te bꞌanꞌax. 15 Komo kye xjal aj saq kyanim tuj twitz Qtata Dios, kyetz kꞌontiꞌl nkyebꞌisun nyaꞌtx galan tiꞌj jun tidiꞌ aj galan. Per yatzun kye aj nyaꞌtx saq kyanim tuj twitz Qtata Dios, aꞌeꞌ aj kꞌontiꞌl nkyeꞌokslan, kyetz tuj kynabꞌl chꞌinwt jun tidiꞌ galan; kyaqil te kynabꞌl nyaꞌtx galan bꞌix te aj nyolin kyanim ax pur nyaꞌtx galan. 16 Kyetz nkyqꞌumaꞌ kyotzqiꞌ Qtata Dios, per nyaꞌtx bꞌanꞌax kyitzaꞌ tzan tpaj te aj nqet kykꞌuluꞌ bꞌan pur nyaꞌtx galan, bꞌan kꞌombꞌaꞌ kyeꞌokslan, bꞌan kꞌontiꞌl nbꞌantik tzan kykꞌulun jun tidiꞌ galan.