2
Te Tumeꞌl Titzaꞌ Tzan Kybꞌet Kye Tij
1 Yatzun yatz, inkxik axnaqꞌtzaꞌ tukyꞌi te tumeꞌl iktzaꞌ nyolin te Tuꞌjal Dios. 2 [Inkxik axnaqꞌtzaꞌ] kye tij tzan kykꞌulun mandad kyibꞌx tukyꞌi jun tumeꞌl galan, bꞌix tzan kybꞌet tuj jun tumeꞌl aj bꞌisuꞌ byenech kyitzaꞌ, bꞌix tzan tqet kybꞌisuꞌ kyebꞌaꞌ alkyetz te galan; a tgan tzan kyten jwert titzaꞌ witꞌlik kykꞌuꞌj tiꞌj Qtata Dios, bꞌix tzan tqet kyganiꞌ txqꞌanky, bꞌix tzan sten kypasens tzan kyipan tidiꞌchq.
Te Tumeꞌl Titzaꞌ Tzan Kybꞌet Kye Bꞌiꞌxh
3 Bꞌix ax kye bꞌiꞌxh, a tgan [tzan kxik axnaqꞌtzaꞌ] tzan kybꞌet tuj tumeꞌl iktzaꞌ nqet tuj twitz Qtata Dios, bꞌix nyaꞌtx tzan tjaw kynikꞌoꞌ yol kyiꞌj xjal, bꞌix nyaꞌtx aj tzyumeꞌ tzan te xhbꞌaꞌj. A tgan tzan txik kxnaqꞌtzaꞌ kye txqꞌanky alkyetz te tumeꞌl galan, 4 bꞌix tzan txik kxnaqꞌtzaꞌ kye aj man tal-eꞌ titzaꞌ tzan tqet kyganiꞌ kyichmil bꞌix kyal, 5 bꞌix tzan kybꞌet tuj tumeꞌl, bꞌix tzan kꞌon tox ksamoꞌ kyibꞌ tuj jun nyaꞌtx galan, bꞌix tzan kyaqꞌunan txeꞌ kyjay, bꞌix tzan kynabꞌlin galan kyukyꞌi txqꞌanky, bꞌix tzan tqet kyokslaꞌ kyichmil. Ikxji nlay qet yoliꞌ te tyol Qtata Dios tzan kypaj.
Te Tumeꞌl Titzaꞌ Tzan Kybꞌet Kye Kuꞌxon
6 Ntons inkxik akawiꞌ kye kuꞌxon tzan tel kynikyꞌ alkyetz te galan bꞌix tzan kykꞌulun ikxji. 7 Yatzun yatz, intqet ayekꞌuꞌ kywitz titzaꞌ yatz nchkꞌulun kyaqil galan. Ax tzan txik axnaqꞌtzaꞌ kyetz, intqet ayekꞌuꞌ jun tumeꞌl bꞌanꞌax aj nxik awin tukyꞌi jun akꞌuꞌj. 8 Bꞌix te ayol aj nxik ayoliꞌ aꞌox te bꞌanꞌax tzan kꞌon tqet yoliꞌ te aj nxik aqꞌumaꞌ. Ikxji tzan tqet kyꞌixwik te aj kꞌontiꞌl nqet tuj twitz te aj nxik ayoliꞌ, tzan tpaj kꞌontiꞌl tidiꞌ jun nyaꞌtx galan aj bꞌaꞌn tzan tyolin qiꞌj.
Te Tumeꞌl Titzaꞌ Tzan Kybꞌet Kye Aj Nkyeꞌaqꞌunan Te Junky
9 Ntons, inkxik akawiꞌ kye aj mosimeꞌ tzan junky tzan tqet kyokslaꞌ te kyajaw tuj kyaqil, tzan kyok galan xjal bꞌix nyaꞌtx owajel ktziꞌaꞌ te kypatron. 10 Ax tzan kꞌon tqet kyelqꞌaꞌ, sinoke inkyok xjal aj bꞌaꞌn tzan tok witꞌlet tkꞌuꞌj te kypatron kyiꞌj. Ikxji okykꞌuluꞌtz tzan tok kyen txqꞌanky galan te tpakbꞌalil Qtata Dios aj koloyon qiꞌj.
11 Komo oje tzꞌok qen titzaꞌ te Qtata Dios nkolon xjal jaꞌchq kyaqil twitz txꞌoꞌtxꞌ, bꞌix te nini jun nim bꞌan galan aj ntzaj tsiꞌ qajsik anke kꞌontiꞌl nqajoꞌ. 12 Nqotzaj txnaqꞌtzaꞌ tzan tkaj qsiꞌ te aj nyaꞌtx galan aj nqokꞌulun tuq, aj kꞌontiꞌl tuq nqoxjanin te Qtata Dios bꞌix aj nꞌel jqꞌajabꞌ tuq tiꞌj tidiꞌchq aj twitz txꞌoꞌtxꞌ. Ajnaꞌl twitz ja txꞌoꞌtxꞌni a tgan tzan jkꞌulun mandad qibꞌx tuj tumeꞌl galan bꞌix ax tzan jkꞌulun tumeꞌl kyukyꞌi txqꞌanky bꞌix ax tzan tqet qxjaniꞌ Qtata Dios. 13 Bꞌix [man nqokꞌulun kyaqil nini], nqoꞌiyon tiꞌj te aj jaꞌ loꞌik jkꞌuꞌj aj ntzaj tsiꞌ jun chalajbꞌil tuj qanim, nqoꞌiyon te Jesukrist tzan tul tukyꞌi nim tajwalil, tetz te Dios aj mas nim tajwalil bꞌix aj koloyon qiꞌj. 14 Tetz oxik tqꞌapoꞌ tibꞌx tzan tel xhchojoꞌ te qchoj tzan jkolpjik tuj tqꞌabꞌ kyaqil aj nyaꞌtx galan,* tzan tok saq qanim tzan qok te tetz bꞌix tzan tqet jkꞌuluꞌ te aj galan tukyꞌi jun tkꞌuꞌjlal.* 15 Kyaqil ntzani a te aj presis tzan txik apakbꞌaꞌ. Intxik animsaꞌ kykꞌuꞌj kye qerman bꞌix inkxik akawiꞌ tukyꞌi jun awajwalil bꞌix kꞌon atzoqpij tzan awel ikꞌoꞌ tzan nijunwt.