Te Stzꞌibꞌen Paꞌk Te Moꞌnch
1
Jun Limbꞌil
1 Wetz aꞌin Paꞌk akyinqex pres tzan tpaj Kristo Jesus, bꞌix atqet tzani wukyꞌiꞌl te qerman Timotey, [nqet qtzꞌibꞌaꞌna] te yatz Moꞌncha aj ganimich nim qitzaꞌna, yatz aj nxhchꞌonen qukyꞌila. 2 [Jun limbꞌil te yatz] bꞌix ax te qerman xuj Apy bꞌix ax te qerman Arkip, jun qukyꞌila aj nim nꞌaqꞌunan tuj taqꞌun Jesukrist,b bꞌix ax [jun limbꞌil] kye aꞌeꞌ qerman aj nꞌok kchimoꞌ kyibꞌ tuj ajay.
3 Instzaj siꞌxwit jun nim bꞌan galan etajsik bꞌix qet chewsaꞌxwit ekꞌuꞌj tzan Qtata Dios bꞌix tzan te Qajaw Jesukrist.
Te Paꞌk Bꞌan Nchalaj Tuq Tiꞌj Te Moꞌnch
4 Nxik nsiꞌ pixon te Qtata Diosc awiꞌj oj nxnaqꞌtzan 5 tzan tpaj aj nꞌok nchaꞌoꞌ titzaꞌ yatz witꞌlik akꞌuꞌj tiꞌj te Qajaw Jesus bꞌix titzaꞌ nqet aganiꞌ tetz kyukyꞌi kyaqil kye aj pawameꞌ te tetz. 6 Nxik nqaniꞌ tukyꞌi Qtata Dios awiꞌj yatz aj witꞌlik akꞌuꞌj iktzaꞌ qetz, nxik nqaniꞌ tzan tokenxwit bꞌan galan te aj awitꞌlbꞌen akꞌuꞌjni tzan tel anikyꞌ byenech tiꞌj kyaqil te aj tbꞌanil aj oje tzaj tsiꞌ te Krist qetz. 7 Wetz bꞌan nkyinchalaj tuj wanim bꞌix njaw awin nkꞌuꞌj tzan tpaj nꞌok nchaꞌoꞌ nkyeqet aganiꞌ kyaqil kye aj pawameꞌ te Qtata Dios bꞌix tzan tpaj yatz erman njaw awin kykꞌuꞌj kkyaqil kyetz.
Te Paꞌk Nqet Twitz Twitz Moꞌnch Tzan Tkꞌamon Te Onésimo
8 Astilji anke wetz tzan tpaj Krist at nim woklen tzan axik nkꞌuluꞌ mandad tzan tqet akꞌuluꞌ te aj presis, 9 per tzan tpaj bꞌan ajbꞌilaꞌ aꞌich witzaꞌ, astilji wetz nqet nwitz awitz, wetz aꞌin Paꞌk ya bꞌan tijky aꞌin, bꞌix pyor ajnaꞌlky pres atin tzan tpaj te [npakbꞌen tiꞌj] Kristo Jesus, 10 nqet nwitz awitz tiꞌj jun xjal aj naqe nkꞌwaꞌal, aj Onésimo, aj nkꞌwaꞌlij tuj pres. 11 [Qanq] tuj jun tyemp kꞌontiꞌl tuq token te yatz, per ajnaꞌl at nim token nyaꞌtx aꞌox te yatz sinoke ax te wetz. 12 Ajnaꞌl owajel nlajoꞌ awukyꞌiꞌlky tetz aj bꞌan nim nqet nganiꞌ. 13 Wetz ngan-tal tzan tqet nkꞌamoꞌ wukyꞌiꞌl tzan-tal tonen wukyꞌiꞌl te akyꞌixel man akyinqex pres tzan tpaj te tpakbꞌalil galan tiꞌj Jesukrist. 14 Per kꞌon ngan tuq kꞌulun ikxjani qa yatz nyaꞌtx tuq tukyꞌi jun tkꞌuꞌjlal ma atzoqpij, tzan kꞌon tok te aj nꞌakꞌuluꞌ iktzaꞌ cha alajwers, sinoke tukyꞌi aboluntadx yatz tukyꞌi jun tkꞌuꞌjlal.
15 Qanq tzan tpaj ntzani owex tuj ajay jun tyemp, per tzan tuq akꞌamon tetz bꞌeyx te jun-eleꞌx, 16 nyaꞌtx cha aꞌox iktzaꞌ jun aj mosiꞌ awitzaꞌ sinoke mas galan twitz nini, iktzaꞌ jun erman aj bꞌan ganiꞌ qitzaꞌ, bꞌix ajbꞌilaꞌ nim witzaꞌ wetz bꞌix pyorx-al yatz oqtel aganiꞌ tzan tpaj jun axjalil bꞌix tzan tpaj nxnaqꞌtzan. 17 Qa yatz tuj anabꞌl aꞌin jun awukyꞌiꞌl, ntons pakꞌamon te tetz iktzeꞌxtzun aꞌin. 18 Qatzun at jun tidiꞌ aj otkꞌuluj nyaꞌtx galan, qatzun at tidiꞌ kꞌasbꞌenaꞌ titzaꞌ awukyꞌiꞌl, intkaj asiꞌ tuj nqꞌabꞌ.
19 Ajnaꞌl wetz aꞌin Paꞌk nqet ntzꞌibꞌaꞌ ntzani tukyꞌi nqꞌabꞌx, wetz owokel nchojoꞌ, anke at tidiꞌchq galan aj oje qet nkꞌuluꞌ te yatz. 20 Astilji, erman, wetz ngan tzan abꞌekꞌan chꞌin wiꞌj tzan tpaj te Qajaw. Intjaw awin chꞌin nkꞌuꞌj tukyꞌi Krist.
21 Maꞌtx qet ntzꞌibꞌaꞌ te yatz bꞌix witꞌlik nkꞌuꞌj awiꞌj okyinqtel awokslaꞌ. Wetz webꞌen, yatz oqtel akꞌuluꞌ mas twitz te aj nxik nqꞌumaꞌ yatzni. 22 Intqet akꞌuluꞌ jun nwatbꞌil tuj ajay tzan tpaj loꞌik nkꞌuꞌj okyinpoyon etukyꞌiꞌl tzan tpaj exnaqꞌtzbꞌen wiꞌj.
Jun Kawbꞌil
23 Ntons, jun limbꞌil te yatz tzan Paꞌxh, jun wukyꞌiꞌl tuj ja presni tzan tpaj [tpakbꞌen tiꞌj] Kristo Jesus. 24 Ax jun limbꞌil tzan te Mak, Aristark, Démas, bꞌix Luks, aꞌeꞌ aj nkyeꞌonen wukyꞌiꞌl.
25 Bwen, Qajaw Jesukrist tzaj sinxwit tuj etanim jun nim bꞌan galan.