3
Te Tumeꞌl Titzaꞌ Tzan Kybꞌet Kkyaqil Kye Qerman
1 Intxik aqꞌumaꞌ kye qerman tzan tqet kyokslaꞌ kye kꞌulul mandad tuj kyamaqꞌ bꞌix tzan kyok okslon kyukyꞌi kye aj at kyajwalil, ax tzan kyten list tzan kykꞌulun kyaqil aqꞌunj aj nꞌel galan tuj twitz Qtata Dios. 2 Ax tzan kꞌon tok kyyasoꞌ junky, bꞌix nyaꞌtx cha kyjoyonqet qꞌoj. Mejor, inkyjoyon tumeꞌl titzaꞌ tzan kyten galanx kxol txqꞌanky, bꞌix tzan kyyolin kyebꞌaꞌ kyukyꞌi kyaqil xjal. 3 Komo ax qetz tbꞌayaꞌ kꞌontiꞌl tuq nqet qbꞌisuꞌ tuj tumeꞌl, kꞌontiꞌl tuq nqet qokslaꞌ Qtata Dios, kꞌontiꞌl tuq nqobꞌet tuj tbꞌey Qtata Dios. Qetz tbꞌayaꞌ cha nqoxik eqꞌiꞌ tuq tzan tidiꞌchq aj nꞌel tganiꞌ te qchiꞌjel bꞌix tidiꞌchq aj nyaꞌtx galan aj nqochalaj tuq tiꞌj. Cha qanqꞌinqet tuj pur nyaꞌtx galan, cha qekꞌawinqet, bꞌix nkyeꞌok tuq qajqꞌojaꞌ txqꞌanky bꞌix ax kyetz nkykꞌuluꞌ tuq ikxji qukyꞌiꞌl. 4 Per aj stzaj tyekꞌuꞌ te Qtata Dios aj koloyon qiꞌj, titzaꞌ tetz bꞌan galan nabꞌlin bꞌix titzaꞌ nkyeqet tganiꞌ kye xjal, 5 tetz otkoloj aꞌoꞌ nyaꞌtx tzan tpaj-wit tidiꞌchq galan aj jkꞌulbꞌen sinoke tzan tpaj owok loꞌet tkꞌuꞌj qiꞌj,* bꞌix okaj tsjapunsaꞌ te qanim tzan tok akꞌaꞌj tuj qanim, bꞌix tzan te Txew otzaj tsiꞌ jun qanqꞌin akꞌaꞌj; 6 komo tetz bꞌan galan tnabꞌlin, ntzaj tsiꞌ te Txew qajsik tzan tpaj te Jesukrist aj koloyon qiꞌj.* 7 Ikxji, tzan tpaj galan nabꞌlin qukyꞌiꞌl anke kꞌontiꞌl nqajoꞌ, tetz owel tin qchoj, bꞌix ikxji oꞌok tkꞌwaꞌal tzan jkꞌamon jun qanqꞌin te jun-eleꞌx iktzaꞌx qetz loꞌik jkꞌuꞌj.
8 Aj yol nini bꞌanꞌax, bꞌix ajnaꞌl ngan tzan txik aqꞌumaꞌ kye txqꞌanky tukyꞌi jun tkꞌuꞌjlal tzan tok ksiꞌ kykꞌuꞌj tzan tqet kykꞌuluꞌ tidiꞌchq galan, kkyaqil kye aj oje kyeꞌokslan tiꞌj Qtata Dios. Kyaqil ntzani bꞌan galan bꞌix nꞌoken kye kyaqil xjal. 9 Per kꞌon tzꞌok asiꞌ awiꞌ tiꞌj te aj nkywululuꞌ kye xjal aj kꞌontiꞌl token, bꞌix kꞌon tzꞌok asiꞌ awiꞌ tiꞌj aj nkywululuꞌ cha tiꞌj kyijajil bꞌix tiꞌj te Kawbꞌil. Kyaqil aj nkywululuꞌni, chagan, kꞌontiꞌl token. 10 Qa at abꞌl nkꞌulun tzan tqet kypawaꞌ kyibꞌ kye qerman kxolx, bꞌix qa kꞌontiꞌl nꞌox tuj twiꞌ tzan jun-el qa kaꞌmjji oj txik ekawiꞌ, ntons intex etin exol. 11 Komo qebꞌen jun xjal ikxji cha tkꞌulunqet nyaꞌtx galan bꞌix cha tjoyonqet choj; bꞌix ajixk nxik tsiꞌ tibꞌ tuj il tzan tpaj aj ntkꞌuluꞌ.
Jun Kawbꞌil
12 Oj txik nlajoꞌ awukyꞌiꞌl tzi te Artems qatzun te Tíkiko,* patzaj txoktxon tzan apon wukyꞌiꞌl Nicópolis, komo wetz oje qet nbꞌisuꞌ tzan tkyꞌik jabꞌalil wetz txini. 13 Inkyok awoneꞌ aber janikꞌponꞌixiꞌ te Senas aj nxik tqꞌumaꞌ xtxolil te kawbꞌil, bꞌix te Pol,* intxik esiꞌ aj presis tuj kybꞌey tzan kꞌon tpaltin jun tidiꞌ kyetz. 14 Bꞌix kye qerman tzi, a tgan tzan kxnaqꞌtzan kyibꞌ tzan kyonen kyukyꞌi kye aj presis jun onbꞌil kyetz, tzan tok en jun kykꞌulbꞌen galan.
15 Kyaqil kye aj akyeqet wukyꞌiꞌl tzani nxik ksamaꞌ jun limbꞌil te yatz. Intxik asiꞌ jun limbꞌil kye aj bꞌan ganimoꞌna kyitzaꞌ aj parej witꞌlik kykꞌuꞌj iktzaꞌx qetz. Qtata Dios tzaj sinxwit etajsik etetz ekyaqil jun nim bꞌan galan.