Jun Uꞌj Aj Oxik Samaꞌ Kye Xjal Ebrey
1
Te Qajaw Jesukrist A Tetz Te Aj Mas Nim Tajwalil Twitz Kyaqil
1 Oqtxiꞌ te Qtata Dios, kyꞌilaꞌj-el bꞌix tuj kyꞌilaꞌj tumeꞌl otzaj tyoliꞌ kyukyꞌi kye qijajil oqtxiꞌ tzan kye aj yolil tyol. 2 Yatzun ajnaꞌl tuj ja tyemp ntzani aj chꞌinky tponbꞌaj te twitz txꞌoꞌtxꞌni, tetz oje tzaj yolin qukyꞌiꞌl tzan te Tkꞌwaꞌal; ojetq tuq kaj tsiꞌ te Tkꞌwaꞌal te tajawil tiꞌj kyaqil, bꞌix tzan te Tkꞌwaꞌal ojetq tuq qet tkꞌuluꞌ kyaqil twitz txꞌoꞌtxꞌ bꞌix kyaqil twitz kaꞌj.* 3 Tiꞌj te Tkꞌwaꞌal nxik qen te tajwalil bꞌan nim te Qtata Dios, bꞌix tiꞌj tetz nxik qen titzaꞌ te Qtata Dios. Bꞌix tzan tpaj tajwalil, tetz tukyꞌi tyol nkꞌulun tzan stenkix kyaqil aj at. Bꞌix ya ma tzꞌelbꞌaj tin kyaqil qchoj, oqet witꞌlet tuj tbꞌanqꞌabꞌ te Twitzaleꞌ tuj kaꞌj. 4 Komo oje xik siꞌ mas nim tajwalil kywitz kye ángel, tzan tpaj tetz tbꞌi [Tkꞌwaꞌal te Twitzaleꞌ tuj kaꞌj], mas bꞌan tbꞌanil kywitz kye ángel.a 5 Komo ni jun-el te Qtata Dios oxik tqꞌumaꞌ te jun ángel: “Yatz aꞌich nkꞌwaꞌal, wetz maꞌtx xhtzaj nkꞌwaꞌliꞌ ajnaꞌl.”* Bꞌix ax kꞌontiꞌl oxik tqꞌumaꞌ tiꞌj jun ángel ikxjani: “Wetz okyinꞌokel te Stat, bꞌix tetz owokel nkꞌwaꞌal.”* 6 Bꞌix junkyꞌel nyolin ikxjani [te Tuꞌjal Dios] tiꞌj te Tbꞌay Tkꞌwaꞌal, nyolin ikxjani aj stzaj tlajoꞌ tzani twitz txꞌoꞌtxꞌ: “Kyaqil kye ángel inkyqet mejlet naꞌol tetz.” 7 Kyiꞌj kye ángel te tyol Qtata Dios nyolin ikxjani: “Tetz nkꞌulun kye ángel iktzaꞌ kyaqꞌiqꞌ, bꞌix iktzaꞌ toq qꞌaqꞌ kye [ángel] aj nkyeꞌaqꞌunan te tetz.”b 8 Per yatzun tiꞌj te Tkꞌwaꞌal, nyolin ikxjani: “Yatz aj Dios aꞌich, yatz ochkajel bꞌeyx te jun-eleꞌx tuj awitꞌlel aj jaꞌ nchkꞌulun mandad bꞌix tukyꞌi abar ochkꞌuluyon mandad tuj tumeꞌl. 9 Yatz oje tzꞌel aganiꞌ te tumeꞌl galan bꞌix oje tzꞌel awikꞌoꞌ te aj nyaꞌtx galan; astilji te Qtata Dios aj ntzaj anaꞌoꞌ, tetz oje chqet tjoyoꞌ bꞌix oje tzaj tsiꞌ mas nim achalajbꞌil kywitz kye txqꞌanky awukyꞌiꞌl.”* 10 Ax nyolin ikxjani: “Yatz aj aꞌich Tajaw tiꞌj kyaqil, yatz aj oqet akꞌuluꞌ twitꞌlel te twitz txꞌoꞌtxꞌ atx aj bꞌan tbꞌay-el, bꞌix aꞌichx kixiꞌ ochqet kꞌulun te twitz kaꞌj. 11 Kyaqil nini opoyonaj per yatz atichqet kixiꞌ te jun-eleꞌx, kyaqil nini kyebꞌayleꞌ omankuyon naqe jun xqꞌapj, 12 bꞌix iktzaꞌ jun xqꞌapj oqtel apaqoꞌ bꞌix iktzaꞌ jun xqꞌapj okyꞌixpjel; per yatzun yatz axkix yatz aꞌichji, kye awaqꞌbꞌi nlay mankun.”* 13 Yatzun kyiꞌj kye ángel, te Qtata Dios ni jun-el oxik tqꞌumaꞌ te nijunwt kyetz [iktzaꞌ oxik tqꞌumaꞌ te Tkꞌwaꞌal ikxjani]: “Paqet witꞌlet tuj nmanqꞌabꞌ max oj nkꞌulun tzan kyok kye awajqꞌoj te tojbꞌil awoq.”* 14 Komo kyaqil kye ángel, kyetz kꞌontiꞌl ebꞌajil-eꞌ, kyetz nkyeꞌaqꞌunan te Qtata Dios, bꞌix nkyetzaj lajoꞌ onel te qetz aj oqokoletel.