2
A Te Qajaw Jesukrist Owok Ten Twitz Xhchoꞌnal Te Qkyꞌixel
1 Astilji presis tzan tok qsiꞌ qwiꞌ tiꞌj kyaqil aj oje tzaj xnaqꞌtzaꞌ qetz tzan kꞌon tkaj jkolaꞌ te aj oje xik qin. 2 Komo kꞌontiꞌl nkyꞌixpjik te tpakbꞌalila aj okyqꞌumaj kye ángel oqtxiꞌ, bꞌix kyaqil kye aj kꞌontiꞌl oqet kyokslaꞌ okykꞌamoj jun xhchoꞌnal aj kyajoj, 3 ntons ¿oꞌ petzun oqokoletel qetz qa nlay tzꞌok qsiꞌ qwiꞌ tiꞌj te tpakbꞌalil aj kolbꞌil qetz aj bꞌan galan? Axkix te Qajawil otzaj tpakbꞌaꞌ bꞌan tbꞌay-el te ja tumeꞌlni, bꞌix yaji kye aj eꞌok chaꞌon tetz otzaj kyqꞌumaꞌ junkyꞌel qukyꞌiꞌl. 4 Bꞌix ax te Qtata Dios oqet tyekꞌuꞌ te aj tpakbꞌalilni bꞌanꞌax. Komo oqet tyekꞌuꞌ tukyꞌi tidiꞌchq yekꞌbꞌil aj nqolabꞌan tiꞌj bꞌix tukyꞌi tidiꞌchq tkꞌulbꞌen aj nijunwt abꞌl nbꞌantik titzaꞌ, bꞌix tidiꞌchq aj nbꞌantik aꞌox tukyꞌi tajwalil, bꞌix te Txew Dios ntzaj tsiꞌ qajbꞌen te junjunchaq te qetz iktzaꞌx tetz tgan. 5 Komo te Qtata Dios kꞌontiꞌl okaj tsiꞌ tuj kyqꞌabꞌ kye ángel te aj okyꞌel mas yaj twitz txꞌoꞌtxꞌ, aj nqoyolin tiꞌjni. 6 [Tuj Tuꞌjal Qtata Dios] at jaꞌ nyolin ikxjani: “¿Tidiꞌ aloꞌon kyetz kye ja xjalni tzan ktzaj anaꞌoꞌ? ¿Tistil nkyetzaj anaꞌoꞌ bꞌix nchbꞌisun kyiꞌj? 7 Bꞌix yatz oqet akꞌuluꞌ kyetz chꞌinky tuq npon [kyajwalil] iktzaꞌ kye ángel, oxik asiꞌ jun kyajwalil bꞌix eqet ajiqꞌbꞌaꞌ. 8 Kyaqil okaj asiꞌ tuj kyqꞌabꞌ.”
Ntons, tzan tpaj te aj nyolin, ya ma kaj siꞌ kyaqil tuj kyqꞌabꞌ, kꞌontiꞌl jun tidiꞌ aj kꞌontiꞌl-wit okaj siꞌ tuj kyqꞌabꞌ. Per minaꞌ tok qen qa kyaqil atkaj tuj kyqꞌabꞌ.* 9 Enkamby, nꞌok qeꞌeꞌ te Jesus aj owok teꞌeꞌ twitz te kamikyj, bꞌix jun tyemp nyaꞌtx nim tuj, tetz kꞌontiꞌl tuq npon [tajwalil] iktzaꞌ kye ángel, per ajnaꞌl oje kaj siꞌ nim tajwalil bꞌix nqet jiqꞌbꞌaꞌ, bꞌix tzan tpaj te Qtata Dios bꞌan galan nabꞌlin mas nim twitz te aj nqajoꞌ, te Jesus owokten twitz te kamikyj te qkyꞌixel qkyaqil qetz.
10 Komo kyaqil tidiꞌchq aj at, oqet kꞌuluꞌ [tzan te Qtata Dios] bꞌix ajixk oqet kꞌulun tetz. Ntons tzan kxik tin kyꞌilaꞌj xjal tukyꞌiꞌl tuj kaꞌj, a tgan tuq tzan tkꞌulun tzan tok ten [te Jesus] twitz xhchoꞌnal tzan tok en tetz kꞌontiꞌl xhchoj, tetz aj nkolon te qetz. 11 Komo tetz aj nkꞌulun tzan kykaj pawaꞌ aꞌox te tetz, bꞌix kye aj oje kaj pawaꞌ aꞌox te tetz, axkix kytat parej kkyaqil; astilji tetz kꞌontiꞌl nqet kyꞌixwik tzan kyok tqꞌumaꞌ terman. 12 Iktzaꞌx nyolin ikxjani: “Oxeꞌl npakbꞌaꞌ awiꞌj yatz kxol kye werman, bꞌix okyinbꞌitzayon bꞌitz te yatz kxol kye aj nkyeꞌokslan awiꞌj.”* 13 Bꞌix ax at jaꞌ nyolinky ikxjani: “Tiꞌj tetz owokel nwitꞌbꞌaꞌ nkꞌuꞌj.”* Bꞌix junkyꞌel oxik tqꞌumaꞌ ikxjani: “Wetz akyinqet tzani kyukyꞌi tkꞌwaꞌal Ntat aj etzaj tsiꞌ wetz.”* 14 Ntons komo iktzaꞌx kye kꞌwaꞌalbꞌaj tuj jun jay kkyaqil kyetz parej kchikyꞌel kkyaqil bꞌix ax te kchiꞌjel parej, ax ikxji te Jesus at tuq xhchikyꞌel bꞌix at tuq jun xhchiꞌjel ikxji tukyꞌi tkamiky tetz bꞌaꞌn tuq tzan tqet titzaꞌ te aj at tuq tajwalil tzan tkansan, osey te Tajaw Choj. 15 Bꞌix ikxji nkyejatz tkolpiꞌ kye aj bꞌajqꞌij nkyeꞌanqꞌin tzyumeꞌ tuq [tzan te nyaꞌtx galan] tzan tpaj nkyexobꞌ tuq tiꞌj te kamikyj. 16 Komo tetz kꞌontiꞌl owul kolol kye ángel sinoke owul kolol kye aj [nkyeꞌokslan iktzaꞌ] te Abran [nꞌokslan tuq].b 17 Astilji presis tuq tzan tok iktzaꞌxkix kye aꞌeꞌ terman, tzan tok tetz tuj twitz Qtata Dios te pal aj mas nim tajwalil kywitz kye txqꞌanky pal, bꞌix nꞌok loꞌet tkꞌuꞌj qiꞌj bꞌix kꞌontiꞌl nkaj tkolaꞌ topis twitz Qtata Dios, bꞌix ikxji tzan tkamik tuq tetz te qkyꞌixel tzan xhchojet te qchoj qetz aj aꞌoꞌ te tetz. 18 Komo ax tetz owok ten twitz preb aj nꞌok ten tuq twitz xhchoꞌnal, astilji tetz bꞌaꞌn tzan tonen kyiꞌj kye aj nꞌok kyen twitz preb.