3
Kꞌon Kaj Qsiꞌ Tzan Tqet Qokslaꞌ Te Qtata Dios
1 Astilji waq erman, etetz aj pawamix te Qtata Dios, aj oje kxik ukꞌleꞌ tzan Qtata Dios aj atjax tuj kaꞌj, intqet ebꞌisuꞌ chꞌin tiꞌj te Kristo Jesus, a tetz te Tkyꞌixel Qtata Dios [tzani twitz txꞌoꞌtxꞌ] bꞌix a tetz te twitzaleꞌ pal aj jaꞌ qetz nꞌok qwitꞌbꞌaꞌ jkꞌuꞌj tiꞌj. 2 Tetz kꞌontiꞌl okaj tkolaꞌ te aj otzaj sin [tajwalil], iktzaꞌx te Moisés [kꞌontiꞌl okaj tsiꞌ tzan tkꞌulun te topis kxol aꞌeꞌ aj] tuj tjay Qtata Dios.* 3 Per te Jesus nqet jiqꞌbꞌaꞌ mas twitz te Moisés, iktzaꞌx jun kꞌulul jay nqet jiqꞌbꞌaꞌ mas twitz te jay aj maꞌtx bꞌantik titzaꞌ. 4 Komo kyaqil jay nkyeqet kꞌuluꞌ tzan xjal, per akix te Qtata Dios oqet kꞌulun kyaqil tidiꞌchq aj atqet. 5 Te Moisés kxol kyaqil kye aj nkyeꞌokslan te Qtata Dios, tetz iktzaꞌ tuq jun mosj aj nim tajwalil bꞌix aj kꞌontiꞌl okaj tsiꞌ tzan taqꞌunan te Qtata Dios, bꞌix te taqꞌun tzan tyolin tuq tiꞌj te aj otzajel tqꞌumaꞌ [te Qtata Dios] mas yaj. 6 Per yatzun te Krist, tetz aji te kꞌwaꞌalbꞌaj aj kꞌontiꞌl okaj tsiꞌ tzan taqꞌunan kxol kye aj tuj tjay Qtata Dios, bꞌix qetz aꞌoꞌ aj tuj tjay qa bꞌeyx te jun-eleꞌx okajel qwitꞌbꞌaꞌ jkꞌuꞌj tiꞌj bꞌix qa kꞌontiꞌl nkaj jkolaꞌ aj jaꞌ loꞌik jkꞌuꞌj aj nqochalaj tiꞌj. 7 Astilji iktzaꞌx nyolin te Txew Dios [tuj Tuꞌjal Dios] ikxjani: “Etetz ajnaꞌl intok echaꞌoꞌ te aj nxik nqꞌumaꞌni, 8 bꞌix kꞌon kxꞌok bꞌan tzꞌak iktzaꞌ kye aj ejaw meltzꞌjik wiꞌj bꞌix [okykꞌuluj nyaꞌtx galan] tqetlen kykꞌuluꞌ probar [npasens] tuj te kyꞌixkꞌoj txꞌoꞌtxꞌ. 9 Tzi kye etijajil etetz oqet kykꞌuluꞌ probar [npasens] bꞌix ojetq tuq tzꞌok kyen tidiꞌchq nkꞌulbꞌen kawnaq (40) aqꞌbꞌi. 10 Astilji wetz injaw qꞌojlik kyukyꞌiꞌl bꞌix oxik nqꞌumaꞌ ikxjani: “Kꞌontiꞌlkix nꞌox tuj kywiꞌ bꞌix kꞌon kygan tzan kyokslan te aj nxik nqꞌumaꞌ tzan kykꞌulun.” 11 Astilji wetz aj njaw qꞌojlik kyukyꞌiꞌl oxik nqꞌumaꞌ nyol ikxjani: “Kyetz nlay kyekambꞌan tzan kyojlan.””a
12 Ntons intok esiꞌ waq enabꞌl erman, qanq kebal at jun nyaꞌtx galan tuj kyanim junjun exol etetz tzan tkaj kykolaꞌ tzan kyokslan te Qtata Dios aj at jun tanqꞌin.b 13 Etetz bꞌajqꞌij peꞌenimsan waq ekꞌuꞌj exolx tzi [tzan ebꞌet tuj tumeꞌl], komo tzunx atx qꞌij atx tyemp, ikxji etetz tzan kꞌon eqet moyiꞌ tzan te choj, bꞌix tzan kꞌon tok te etanim bꞌan tzꞌak. 14 Komo qetz qkyaqil junx atoꞌ tukyꞌi Jesus qa bꞌanꞌax nꞌok qsiꞌ qnabꞌl tzan qten jwert iktzaꞌx witꞌlikok jkꞌuꞌj tbꞌay-el bꞌix bꞌeyx te jun-eleꞌx max oj tmankun kyaqil. 15 Iktzaꞌx nyolin [tuj Tuꞌjal Dios]: “Etetz ajnaꞌl intok echaꞌoꞌ te aj nxik nqꞌumaꞌ, kꞌon kxꞌok bꞌan tzꞌak iktzaꞌ kye aj ejaw meltzꞌjik wiꞌj bꞌix oqet kykꞌuluꞌ probar [npasens] tuj te kyꞌixkꞌoj txꞌoꞌtxꞌ.”* 16 Ntons, komo ¿abꞌleꞌ kye aj ejaw meltzꞌjik tiꞌj Qtata Dios bꞌix ojetq tuq tzꞌok kchaꞌoꞌ tyol? ¿Nyaꞌtx petzun kyaqil kye aj eꞌetz tin Moisés tuj te xtxꞌoꞌotxꞌ Ejipt? 17 Bꞌix ¿abꞌl qukyꞌiꞌl ojaw qꞌojlik te Qtata Dios kawnaq (40) aqꞌbꞌi? ¿Nyaꞌtx petzun kyukyꞌi kye aj ejoyon choj bꞌix ebꞌajkaj kamik tuj te kyꞌixkꞌoj txꞌoꞌtxꞌ? 18 Bꞌix ¿abꞌl qukyꞌiꞌl oxik tsiꞌ tyol Qtata Dios tzan kꞌon tuq kykambꞌan tzan kyojlan? ¿Nyaꞌtx petzun kye aj kꞌontiꞌl eꞌokslan tetz? 19 Ikxji nꞌel qnikyꞌ, kyetz kꞌontiꞌl ebꞌajkambꞌan tzan kyojlan tzan tpaj kꞌontiꞌl eꞌokslan.