4
Bꞌaꞌn Tzan Qojlan Tzan Tpaj Te Jesus
1 Ntons astilji, man tzunx atx tyemp tzan jkambꞌan tzan qojlan iktzaꞌx oxik tsiꞌ Qtata Dios tyol tiꞌj, ntons intok esiꞌ enabꞌl waq tzan etox ekyaqil tzan kꞌon tpaltin nijunwt tzan tojlan. 2 Komo iktzaꞌx kyetz [oqtxiꞌ], ax qetz ajnaꞌl oje tzaj pakbꞌaꞌ jun tpakbꞌalil galan qukyꞌiꞌl. Per kyetz chagan owok kchaꞌoꞌ te tpakbꞌalil tzan tpaj kꞌontiꞌl owok kywitꞌbꞌaꞌ kykꞌuꞌj tiꞌj te aj nkyechaꞌon tuq. 3 Komo aꞌox qetz aj nqoꞌokslan bꞌaꞌn tzan qojlan, komo te Qtata Dios oxik tsiꞌ tyol ikxjani: “Bꞌanꞌax iktzaꞌx oxik nsiꞌ nyol aj njaw qꞌojlik kyukyꞌiꞌl aj oxik nqꞌumaꞌ, “Kyetz nlay kyekambꞌan tzan kyojlan.””* Ikxji oxik tsiꞌ tyol anke [tetz nꞌojlan tzan tpaj] ojetq mankun kyaqil taqꞌun atx aj tbꞌantik te twitz txꞌoꞌtxꞌ. 4 Komo tuj jun part [tuj te Tuꞌjal Dios] nyolin tiꞌj te qꞌij ojlaꞌmj ikxjani: “Owojlan te Qtata Dios tuj twuqiꞌ qꞌij tiꞌj kyaqil taqꞌun.”* 5 Bꞌix ax tuj junky part nyolin ikxjani: “Kyetz nlay kyekambꞌan tzan kyojlan.”* 6 Komo ateꞌx junjunky aj minaꞌ kyojlan, bꞌix ax kye aj owok kchaꞌoꞌ te tpakbꞌalil bꞌan tbꞌay kꞌontiꞌl eꞌojlan tzan tpaj kꞌontiꞌl oqet kyokslaꞌ. 7 Astilji junkyꞌel te Qtata Dios oje kaj tsiꞌ junky qꞌij aj ntqꞌumaꞌ tetz: “Ajnaꞌl.” Komo aj oxik tqꞌumaꞌ tuj stziꞌ te Dawid atx bꞌan oqtxiꞌ iktzaꞌx aj okaj qꞌumaꞌ ikxjani: “Ajnaꞌl etetz intok echaꞌoꞌ te aj ntqꞌumaꞌ [te Qtata Dios], kꞌon kxꞌok tzꞌak, intox tuj ewiꞌ.”* 8 Komo qa tuj tkwent te Chowe kyetz obꞌantik-wit kyojlan, ntons te Qtata Dios kꞌontiꞌl-tal otzaj tqꞌumaꞌ tiꞌj junky qꞌij.* 9 Astilji [nꞌel qnikyꞌ] tzunx atx junky tumeꞌl tzan qojlan qetz aj tkꞌwaꞌal Dios aꞌoꞌ. 10 Komo abꞌl aj oje tkambꞌaj tzan tojlan [iktzaꞌ te Qtata Dios oxik tsiꞌ tyol tiꞌj], ntons ax tetz oje tzꞌojlan tiꞌj kyaqil taqꞌun iktzaꞌx te Qtata Dios owojlan tiꞌj taqꞌun.*
11 Ntons intok qsiꞌ jkꞌuꞌj najji tzan jkambꞌan tzan qojlan ikxji, tzan kꞌon jqet tzꞌaqik qetz iktzaꞌx kye aj kꞌontiꞌl eꞌokslan [oqtxiꞌ]. 12 Komo te tyol Qtata Dios bꞌaꞌn tzan tyolin tuj qanim bꞌix bꞌaꞌn tzan tkꞌulun tidiꞌchq galan, mas nim token twitz jun machit kykabꞌil palaj teꞌ* tzan tpaj bꞌaꞌn tzan tok tmakoꞌ kyaqil qanim bꞌix kyaqil qchiꞌjel, bꞌix bꞌaꞌn tzan tyolin qiꞌj iktzaꞌxkix jun aj totzqiꞌ kyaqil aj nqbꞌisuꞌ tuj qwiꞌ bꞌix tiꞌj kyaqil aj nqbꞌisuꞌ tuj qanim. 13 Kꞌontiꞌl jun tidiꞌ aj oqet kꞌuluꞌ tzan te Qtata Dios bꞌaꞌn-wit tzan tkaj ewj twitz, sinoke kyaqil bꞌan ebꞌajil twitz tetz, bꞌix twitz tetz oxeꞌl jqꞌumaꞌ kyaqil.
A Te Jesus Te Twitzaleꞌ Qpal
14 Ntons tzan tpaj a te Jesus te Tkꞌwaꞌal Dios bꞌix a tetz te twitzaleꞌ qpal aj oje tzꞌox tuj kaꞌj [tzan tyolin qiꞌj qetz tukyꞌi Qtata Dios], astilji presis tzan kꞌon tkaj jkolaꞌ titzaꞌ witꞌlik jkꞌuꞌj tiꞌj. 15 Tetz nyaꞌtx jun twitzaleꞌ pal aj kꞌontiꞌl-wit totzqiꞌ kyaqil aj nkyꞌik qiꞌj qetz aj aꞌoꞌ xjal aj at jaꞌ nqopaltin, sinoke tetz oje tzꞌok ten twitz kyaqil preb aj nkyꞌik qiꞌj, per kꞌontiꞌl ojoyon choj. 16 Astilji waq erman, qoꞌok laqꞌchet najji tukyꞌi jun tkꞌuꞌjlal twitz te Qtata Dios aj atqet tuj twitꞌlel bꞌix ntzaj tsiꞌ qajsik qetz jun nim bꞌan galan aj kꞌontiꞌl nqajoꞌ; qobꞌaj-ok laqꞌchet tiꞌj tzan tok loꞌet tkꞌuꞌj qiꞌj bꞌix tzan tonen qukyꞌiꞌl tukyꞌi jun tumeꞌl bꞌan galan nabꞌlin chaꞌoj tok qen at tidiꞌchq npaltin qetz.