5
1 Komo kyaqil kye twitzaleꞌ pal kxol kye xjal, kyetz nkyeꞌel joyoꞌ tzan kyyolin kyiꞌj kye xjal twitz Qtata Dios, bꞌix tzan txik kyqꞌapoꞌ kyoyej kye xjal te Qtat bꞌix tzan txik kyqꞌapoꞌ te present tzan tqet najsaꞌ kchoj kye xjal. 2 Jun pal bꞌaꞌn tzan tok loꞌet tkꞌuꞌj kyiꞌj kye aj nyaꞌtx tumeꞌl nkyekꞌulun tzan tpaj kꞌontiꞌl kyebꞌen, komo ax tetz jun xjal aj bꞌaꞌn tzan tqet tzꞌaqik tzan tpaj tidiꞌchq nyaꞌtx galan. 3 Bꞌix tzan tpaj tetz jun xjal, ax presis tzan txik tsiꞌ present tiꞌj xhchojx tetz bꞌix ax tiꞌj kchoj kye xjal.* 4 Nijunwt abꞌl bꞌaꞌn tzan tjaw tjalbꞌeꞌx tzan tok pal, sinoke a tgan tzan stzaj siꞌ tajwalil tzan Qtata Dios iktzaꞌx te Aron otzaj siꞌ tajwalil.* 5 Ax te Jesus kꞌontiꞌl oqet tjiqꞌbꞌaꞌx tibꞌ, kꞌontiꞌl ojaw tjalbꞌeꞌx tzan tok tetz twitzaleꞌ pal [sinoke te Qtata Dios otzaj sin tajwalil]. Komo aji tetz otzaj qꞌuman ikxjani: “Yatz aꞌich nkꞌwaꞌal, maꞌtx xhtzaj nkꞌwaꞌliꞌ ajnaꞌl.”* 6 Ax iktzaꞌx nyolin tuj junky part [tuj Tuꞌjal Dios] ikxjani: “Yatz aꞌich te Pal bꞌeyx te jun-eleꞌx, iktzaꞌx te Melkisedek.”* 7 Komo te Jesus aj tnajan tzani twitz txꞌoꞌtxꞌ, tetz oxnaqꞌtzan tukyꞌi jun twiꞌ nim bꞌix tukyꞌi oqꞌel nqet tuq twitz twitz Qtata Dios aj bꞌaꞌn tuq tzan tkolon tetz tiꞌj te kamikyj,* bꞌix tzan tpaj tetz oqet tokslaꞌ, astilji te Qtat otzaj tsiꞌ te aj oxik tqaniꞌ tetz. 8 Ikxji te Jesus, anke tetz aji tuq te kꞌwaꞌalbꞌaj, tzan tpaj kyaqil te xhchoꞌnal aj okyꞌik tiꞌj, tetz owel tnikyꞌ tidiꞌ telponx oj tqet qokslaꞌ junky. 9 Bꞌix ya ma qet tyekꞌuꞌ kyaqil nini tzan tpaj tokslbꞌen, ikxji owok te koloyon bꞌeyx te jun-eleꞌx qiꞌj qkyaqil qetz aj nqoꞌokslan tiꞌj, 10 bꞌix te Qtata Dios oxik tsiꞌ tajwalil tzan tok twitzaleꞌ pal iktzaꞌx te Melkisedek.
A Tgan Tzan Kxik Qxnaqꞌtzaꞌ Txqꞌanky Tiꞌj Aj Oje Tzꞌel Qnikyꞌ Qetz
11 At tidiꞌchq a tgan tzan qyolin tiꞌj te ntzani per kwest tzan txik jqꞌumaꞌ xtxolil tzan tpaj etetz bꞌan kwest tzan tox tuj ewiꞌ. 12 Etetz oje kxꞌok-tal xnaqꞌtzon ajnaꞌl tzan tpaj kyꞌilaꞌj tyempxiꞌ [etokslbꞌen], per tzunx presis tzan txik xnaqꞌtzaꞌ etetz tiꞌj te aj oje kaj tqꞌumaꞌ Qtata Dios aj ntzaj xnaqꞌtzaꞌ qetz aj man txiklen qokslaꞌ. Komo tiꞌj te xnaqꞌtzbꞌilj etetz oje kxꞌok junkyꞌel iktzaꞌ kꞌwaꞌl aj tzunx presis tzan tqex piloꞌ esopa bꞌix nyaꞌtx tzan txik ewaꞌaꞌ wabꞌj kaw, 13 komo kye aj tzunx nqex piloꞌ kyweꞌ, kyetz man kꞌwaꞌl-eꞌ, kꞌontiꞌl nꞌel kynikyꞌ alkyetz te tumeꞌl.* 14 Te wabꞌj kaw aꞌox kye tijxjal tzan tpaj oje tzꞌok kaw te kykꞌuꞌj, bꞌix ax ikxji tiꞌj te xnaqꞌtzbꞌilj, jun tijxjal nqet tbꞌisuꞌ tuj tumeꞌl bꞌix nꞌel tnikyꞌ alkyetz te galan bꞌix alkyetz te aj nyaꞌtx galan.