Te Uꞌj Stzꞌibꞌen Chaw
1
Jun Limbꞌil
1 Wetz aꞌin Chaw,a qꞌapoꞌ wibꞌ nkyinꞌaqꞌunan te Qtata Dios bꞌix te Qajaw Jesukrist. Jun limbꞌil te etetz ekabꞌlajujil bꞌuchꞌuj tijajil Israel aj sipaꞌ etibꞌ jaꞌchq laqꞌchik.*
Oj Qipan Jun Xhchoꞌnal Tukyꞌi Qpasens Nꞌok Te Jun Galan Te Qetz
2 Erman, peꞌenaꞌon waq jun nim chalajbꞌil oj tok eten twitz tidiꞌchq xhchoꞌnal. 3 Komo etetz etebꞌen, oj tok qen twitz xhchoꞌnal tzan tok en titzaꞌ witꞌlik jkꞌuꞌj, te nini nkꞌulun tzan tok jun qpasens. 4 Bꞌix [oj qipan tukyꞌi] qpasens, ikxji nqokaj bꞌan jwert tukyꞌi Qtata Dios bꞌix nqotzꞌaqet. 5 Qa jun exol etetz ntnaꞌoꞌ kꞌontiꞌl nꞌel tnikyꞌ alkyetz te tumeꞌl galan, ntons intxik tqaniꞌ tukyꞌi Qtata Dios bꞌix otzajel siꞌ jun tnabꞌl* tzan tpaj te Qtat ntzaj tsiꞌ nim kye kyaqil bꞌix nlay qet txkꞌayiꞌ. 6 Bꞌix oj txik tqaniꞌ, a tgan tzan tok twitꞌbꞌaꞌ tkꞌuꞌj tiꞌj Qtata Dios bꞌix kꞌontiꞌl tzan tnaꞌnon tanim.* Komo jun xjal aj nnaꞌnon tanim, tetz iktzaꞌ te nim aꞌ njaw kyitoꞌ tzan kyaqꞌiqꞌ.* 7 Jun xjal ikxji kꞌontiꞌl tzan tok loꞌet tkꞌuꞌj tiꞌj Qajawil tzan tkꞌamon jun tidiꞌ, 8 tzan tpaj tetz kabꞌ tkꞌuꞌj tuj kyaqil aj nkꞌulun bꞌix nyaꞌtx jun yolin.
9 Jun erman mebꞌaꞌ xjal a tgan tzan xhchalaj tzan tpaj tetz jiqꞌbꞌaꞌ tzan Qtata Dios, 10 bꞌix te jun [qerman] qꞌinon xjal a tgan tzan xhchalaj oj tok ten twitz bꞌis tzan tpaj tetz [tqꞌinomal] iktzaꞌ jun txmakal kꞌul, kꞌontiꞌl nten bꞌeyx te jun-eleꞌx.b 11 Komo iktzaꞌx oj tjakul te qꞌij bꞌix oj tkyaqan byenech, te kꞌul njaw tzꞌumjik, te txmakal nqet tzꞌaqik bꞌix te aj tbꞌanil tiꞌj cha nponaj;* ax ikxji tiꞌj te qꞌinon xjal, man te taqꞌun nꞌel galan, derepent tetz nponaj tuj taqꞌun.
12 Galanx-alo te xjal aj ntipaꞌ tukyꞌi tpasens tidiꞌchq xhchoꞌnal aj nꞌok tiꞌj tzan tok ten titzaꞌ witꞌlik tkꞌuꞌj tiꞌj Qtata Dios. Komo oj tipan te xhchoꞌnal, otkambꞌaꞌtz jun tanqꞌin te jun-eleꞌxc aj okaj tsiꞌ te Qtata Dios tyol tiꞌj tzan stzaj tsiꞌ kye aj nkyeqet ganin tetz. 13 Chaꞌoj tok qen jun tidiꞌ aj bꞌaꞌn tzan jqet tzꞌaqik titzaꞌ, kꞌontiꞌl tzan jqꞌuman “a te Qtata Dios nkꞌulun tzan jqet tzꞌaqik.” Komo te Qtat nlay bꞌantik tzan tqet tzꞌaqik bꞌix kꞌontiꞌl njoyon tumeꞌl tzan jqet tzꞌaqik titzaꞌ. 14 Qetz nqoqet tzꞌaqik tzan tpaj aꞌoꞌxk qetz nqtzoqpiꞌ tzan jqet eqꞌiꞌ tzan te aj nꞌel jqꞌajabꞌ tiꞌj,* 15 yaji oj jkꞌulun te aj nyaꞌtx galan nqet qbꞌisuꞌ, nqojoyon choj, bꞌix tzan tpaj nini tzul te jkamiky.
Kyaqil Aj Tbꞌanil Aj At Te Qetz, A Te Qtata Dios Ntzaj Sin Tetz
16 Waq erman aj ganimix nim witzaꞌ, kꞌon qet eteqꞌiꞌ etibꞌx. 17 Kyaqil aj bꞌan tbꞌanil bꞌix kyaqil tidiꞌ aj bꞌan galan ntzaj tuj kaꞌj tukyꞌi Qtata Dios, a tetz oqet kꞌulun tetz, bꞌix ax kyaqil aj nqꞌanalin twitz kaꞌj, per tetz kꞌontiꞌl nkyꞌixpjik titzaꞌ nabꞌlin ni chꞌinwt. 18 Bꞌix tzan tpaj tuq tetz tgan tzan qanqꞌin, astilji otzaj tqꞌumaꞌ te tpakbꞌalil aj tumeꞌl bꞌanꞌax aj ntzaj sin qanqꞌin, bꞌix ikxji tzan qok qetz tbꞌay naꞌomoꞌ kxol kyaqil aj oje qet tkꞌuluꞌ.
A Tgan Tzan Tqet Jkꞌuluꞌ Iktzaꞌ Nyolin Te Tyol Qtata Dios
19 Ntons waq erman aj nkxqet nganiꞌ, peꞌetok xjal aj bꞌaꞌn kxchaꞌon bꞌix tzan eyolin kyebꞌaꞌ bꞌix tzan kꞌon ejaw qꞌojlik bꞌan luwew. 20 Komo te jqꞌoj kꞌontiꞌl nꞌoken tzan qbꞌet tuj tumeꞌl iktzaꞌ te Qtata Dios tgan. 21 Astilji intkaj esiꞌ kyaqil aj nkꞌulun nyaꞌtx galan tuj etanim bꞌix kyaqil tidiꞌchq aj nyaꞌtx galan twitz txꞌoꞌtxꞌ, bꞌix tukyꞌi jun tumeꞌl bꞌan galan peꞌekꞌamon tuj etanim te xnaqꞌtzbꞌilj tiꞌj te Tyol Qtata Dios aj oje tzꞌok echaꞌoꞌ bꞌix aj bꞌaꞌn tzan tkolon te etanim. 22 Peꞌekꞌulun iktzaꞌx nyolin te Tyol Qtata Dios, bꞌix nyaꞌtx aꞌox tzan tok echaꞌoꞌ bꞌix ikxji tzan tqet-tal eteqꞌiꞌ etibꞌx. 23 Abꞌl te aj nꞌok xhchaꞌoꞌ te Tyol Qtata Dios bꞌix kꞌontiꞌl nqet tkꞌuluꞌ ikxji, te nini iktzaꞌ jun xjal aj nqex tkaꞌyiꞌ twitz tuj jun despej, 24 bꞌix man tqexlen tkaꞌyiꞌx twitz, chꞌintkyqnajji ojetq tzꞌajnaj tiꞌj tkꞌuꞌj titzaꞌ tuq kaꞌyin. 25 Yatzun te xjal aj kꞌontiꞌl nꞌajnaj tiꞌj tkꞌuꞌj te aj nyolin te kawbꞌil aj kꞌontiꞌl npaltin bꞌix aj nkolpin te qetz, qa kꞌontiꞌl nkaj tkolaꞌ tzan tkꞌulun nini, tetz nyaꞌtx jun loꞌol taꞌ, sinoke nqet tkꞌuluꞌ bꞌix yaji oqtel kyꞌiwlaꞌ tzan te Qtata Dios tiꞌj te aj ntkꞌuluꞌ. 26 Qa at abꞌl ntqꞌumaꞌ tetz nxnaqꞌtzan per qa kꞌontiꞌl nxtxayiꞌ stziꞌ, tetz cha nqet teqꞌiꞌ tibꞌx bꞌix chagan nxnaqꞌtzan. 27 Qa nqoxnaqꞌtzan bꞌan tumeꞌl bꞌix qa tuj twitz Qtata Dios chꞌinwt jun nyaꞌtx galan tiꞌj aj tumeꞌlji, ntons a tgan tzan qonend kyukyꞌi kye kꞌwaꞌl mebꞌaꞌ bꞌix kye byud aj nꞌok kyen twitz bꞌis bꞌix tzan kꞌon txik qsamoꞌ qibꞌ tuj te nyaꞌtx galan twitz ja txꞌoꞌtxꞌni.