13
Te Aj Telponx Tzan Tqet Qen Txqꞌanky
1 Ntons waq erman, kꞌontiꞌl tzan tkaj esiꞌ tzan tqet eganiꞌ etibꞌx exolx iktzaꞌ eterman etibꞌ. 2 Bꞌix kꞌon tzꞌajnaj tiꞌj ekꞌuꞌj tzan kxik enaꞌoꞌ galan kye xjal aj nkyepon ejay,* komo ateꞌ junjun kꞌontiꞌl tuq kyebꞌen oxik ksiꞌ kyposad ángel.* 3 Inktzaj enaꞌoꞌ kye aj pres, [peꞌetonen kyukyꞌiꞌl] iktzeꞌxtzun etetz ax pres atix kyukyꞌiꞌl. Ax inktzaj enaꞌoꞌ chꞌin kye aj nꞌok kyen twitz xhchoꞌnal tzan tpaj txqꞌanky nkyekꞌulun nyaꞌtx galan kyiꞌj; inktzaj enaꞌoꞌ iktzeꞌxtzun ax etetz nkxnaꞌon te xhchoꞌnal tuj echiꞌjel.* 4 Ekyaqil etetz a tgan tzan tqet eten tuj jun tumeꞌl bꞌan galan tiꞌj oj qok junan, bꞌix tzan kꞌon ekꞌajajin. Komo te Qtata Dios okyexeꞌl tsiꞌ tuj il kye aj nkyekꞌulun nyaꞌtx galan tukyꞌi kchiꞌjel bꞌix kye aj nkyekꞌajajin.
5 Kꞌon tzꞌel eganiꞌ nim te tmin sinoke peꞌechalaj waq tukyꞌi te aj at te etetz,* tzan tpaj te Qtata Dios oje tzaj tqꞌumaꞌ ikxjani: “Nlay chkaj nkolaꞌ bꞌix nlay chkaj weꞌeꞌ achukel.”* 6 Ikxji bꞌaꞌn tzan txik jqꞌumaꞌ tukyꞌi jun tkꞌuꞌjlal: “A te Qajaw onel wetz bꞌix nlay kyinxobꞌ tiꞌj te aj owokel kykꞌuluꞌ kye xjal wiꞌj.”*
7 Instzaj enaꞌoꞌ waq kye aj exik xnaqꞌtzan etetz te tyol Qtata Dios. Intqet ebꞌisuꞌ titzaꞌ kyetz nkyekꞌulun tuq exol bꞌix intok ewitꞌbꞌaꞌ ekꞌuꞌj iktzaꞌ kyetz.
8 Te Jesukrist [kꞌontiꞌl nkyꞌixpjik], aji kixiꞌ iktzaꞌx iwi, iktzaꞌx ajnaꞌl bꞌix ajikix te jun-eleꞌx. 9 Kꞌon tzꞌok esiꞌ etetz ewiꞌ tiꞌj jun xnaqꞌtzbꞌilj aj nyaꞌtx bꞌanꞌax bꞌix chuktky, komo mejor tzan tok mas jwert te qanim tukyꞌi Qtata Dios tzan te nim bꞌan galan aj ntzaj tsiꞌ, bꞌix nyaꞌtx tzan jun xnaqꞌtzbꞌilj tiꞌj titzaꞌ tzan qwaꞌan. Komo jun xnaqꞌtzbꞌilj ikxji kꞌontiꞌl nꞌok te jun galan kye aj nkyebꞌet tuj jun tumeꞌl ikxji. 10 Qetz at jaꞌ tzan tqet najsaꞌ te qchoj,a [jun tumeꞌl akꞌaꞌj] aj jaꞌ kye pal [aj nkyeꞌaqꞌunan tuj te jay tabernáculo tzani twitz txꞌoꞌtxꞌ], kyetz kꞌontiꞌl kyoklen tiꞌj.b 11 [Tuj te tumeꞌl oqtxiꞌ] te twitzaleꞌ pal nxik tin te xhchikyꞌel kye txkup tuj te Luwar Aj Bꞌan Xjan tzan tel in te kchoj kye xjal, per yaji kye aj txkupni nkyeqet kyꞌeꞌsaꞌ tiꞌjx te amaqꞌ.* 12 Ax ikxji te Jesus owokten twitz tkamiky tiꞌjx te amaqꞌ, oxik tqꞌapoꞌ tibꞌ tzan tkamik tzan tkaj saq qanim tzan tpaj xhchikyꞌel aj owel. 13 Astilji, qobꞌaj-ok laqꞌchet najji tiꞌj te Jesus [aj okamik] tiꞌjx te amaqꞌc bꞌix intok qen te kyꞌexawil iktzaꞌ tetz owok ten. 14 Komo qetz tzani twitz ja txꞌoꞌtxꞌni kꞌontiꞌl jun qamaqꞌ aj oqtelten bꞌeyx te jun-eleꞌx sinoke qetz ikjaꞌn qxik tuj te amaqꞌ [aj tuj kaꞌj] aj owokel qen mas yaj. 15 Astilji bꞌajqꞌij qobꞌajchalajsan te Qtata Dios tzan te Jesus, nini te qoyej aj nxik jqꞌapoꞌ te tetz, osey te aj nxik jqꞌumaꞌ tiꞌj tetz tukyꞌi qtziꞌ.* 16 Kꞌontiꞌl tzan tkaj esiꞌ tzan ekꞌulun tidiꞌchq galan exolx bꞌix tzan esipan kyukyꞌi txqꞌanky aj at te etetz, komo te nini iktzaꞌ jun qoyej te Qtata Dios aj nꞌel galan tuj twitz. 17 Inkyqet etokslaꞌ waq kye qerman aj at kyajwalil exol, peꞌetokslan kyetz, tzan tpaj kyetz nkyekꞌulun kwent te etetz tzan eten galan tuj etanim, komo otzajel qaniꞌ kyetz tzan te Qtata Dios tiꞌj kykꞌulbꞌen. Astilji peꞌetokslan kyetz tzan kyaqꞌunan tukyꞌi jun chalajbꞌil bꞌix nyaꞌtx tukyꞌi jun bꞌis, komo qa ikxji nlay tzꞌok te jun galan te etetz.
18 Peꞌexnaqꞌtzan waq chꞌin qiꞌja. Qetza nqnaꞌoꞌna tuj qanim nqobꞌetna tuj tumeꞌl, bꞌix qgana tzan qbꞌetna galan tuj kyaqil aj nqokꞌulun. 19 Oxeꞌl nqꞌumaꞌ chꞌin etetz tzan exnaqꞌtzan wiꞌj wetz tzan tkꞌulun te Qtata Dios tzan wex luwew tzani tzan nten junkyꞌel exol etetz.
Jun Kawbꞌil
20 Ntons Qtata Diosxwit aj nchewsan qanim bꞌix aj ojaw tanqꞌinsaꞌ te Qajaw Jesukrist aj pastor* qiꞌj qetz aj aꞌoꞌ iktzaꞌ taloꞌ, tetz aj owel xhchikyꞌel [aj tkamik] tiꞌj te aj oxik tsiꞌ Qtata Dios tyol tiꞌj bꞌeyx te jun-eleꞌx,* 21 ntons tzaj tsiꞌxwit te etetz te aj presis tzan ekꞌulun kyaqil aqꞌunj galan iktzaꞌ tetz tgan; ikxji tzan tkꞌulun tetz etukyꞌiꞌl tukyꞌi Jesukrist te aj nꞌel galan tuj twitz. Intqet jiqꞌbꞌaꞌxwit te Jesukrist tuj kyaqil tyemp te jun-eleꞌx. Kyꞌikxwit ikxji.
22 Waq erman, nqet nwitz ewitz tzan ekꞌamon chꞌin tukyꞌi jun tkꞌuꞌjlal ja kabꞌe nyol aj maꞌtx qet ntzꞌibꞌaꞌ te jun kawbꞌil te etetz tzan ebꞌet tuj tumeꞌl. 23 Intok echaꞌoꞌ, te qerman Timotey oje jatz tzoqpiꞌ; qa tetz owulel luwew tzani, oxeꞌl weqꞌiꞌ wukyꞌiꞌl oj nxik eꞌel etetz. 24 Intxik esiꞌ waq jun limbꞌil kye qerman aj at kyajwalil exol bꞌix kye kyaqil kye txqꞌanky aj pawameꞌ te Qtata Dios. Kye aj Italy, kyetz ax nxik ksamaꞌ jun limbꞌil te etetz. 25 Bwen, ntons Qtata Dios tzaj sinxwit jun nim bꞌan galan etajsik ekyaqil etetz tzi.