12
A Tgan Tzan Tel Qin Iktzaꞌ Te Jesus
1 Ntons astilji, komo nꞌok qen kyiꞌj kyꞌilaꞌj xjal titzaꞌ kyetz nꞌok wiꞌlet kykꞌuꞌj tiꞌj Qtata Dios, ax qetz ajnaꞌl intkaj qsiꞌ kyaqil aj nꞌel in gan te qetz bꞌix tidiꞌchq nyaꞌtx galan aj nqoqet tzꞌaqik titzaꞌ, bꞌix qobꞌajbꞌetwaq tukyꞌi jun tkꞌuꞌjlal tuj qbꞌey aj jaꞌ tgan te Qtata Dios tzan qxik. 2 Bꞌix atkaj qwitz aꞌox tiꞌj te Jesus, tetz aj nꞌonen qiꞌj tzan tok qwitꞌbꞌaꞌ jkꞌuꞌj tiꞌj bꞌix tzan qten jwert tukyꞌiꞌl. Tetz sewur tuq at tiꞌj te chalajbꞌil aj otzajel siꞌ tetz mas yaj, astilji otipaj tzan tok ten twitz xhchoꞌnal twitz krus, kꞌontiꞌl owok tsiꞌ tkꞌuꞌj tiꞌj te kamikyj aj bꞌan eqꞌil kyꞌexawil, bꞌix yaji oqet witꞌlet tuj tbꞌanqꞌabꞌ te twitꞌlel Qtata Dios aj jaꞌ te Qtat nkꞌulun mandad.* 3 Astilji intqet ebꞌisuꞌ chꞌin tiꞌj titzaꞌ te Jesus otipaj xhchoꞌnal aj owok ten tzan kye aj chimol choj. Bꞌix ikxji [tzan tjaw etin ekꞌuꞌj] tzan kꞌon esiktik bꞌix tzan kꞌon tkaj esiꞌ tzan eten jwert tuj etanim. 4 Komo etetz minaꞌ tok eten twitz ekamiky oj tel etikꞌoꞌ te nyaꞌtx galan, 5 bꞌix etetz oje tzꞌajnaj tiꞌj ekꞌuꞌj oje kxtzaj tkawiꞌ te Qtata Dios iktzaꞌ tkꞌwaꞌal aꞌix, nyolin [tuj Tuꞌjal] ikxjani: “Nkꞌwaꞌal, kꞌon tzꞌel awikꞌoꞌ oj atzaj kawiꞌ tzan te Qajawil, bꞌix kꞌon chbꞌisun oj stzaj tqꞌumaꞌ aj nꞌakꞌuluꞌ. 6 Komo te Qajawil nkyetzaj tkawiꞌ kye aj nkyeqet tganiꞌ, bꞌix nxik tsiꞌ xhchoꞌnal kyiꞌj kye tkꞌwaꞌal [qa nkyekꞌulun jun nyaꞌtx galan].”* 7 Ntons peꞌetipan waq etetz te xhchoꞌnal aj ntzaj tsiꞌ te Qtata Dios etiꞌj; ikxji nkꞌulun etukyꞌiꞌl tzan tpaj tkꞌwaꞌal aꞌix. ¿At petzun jun kꞌwaꞌl aj kꞌontiꞌl nxik kawiꞌ tzan stat? 8 Per qa te Qtata Dios kꞌontiꞌl-wit nkxik tkawiꞌ iktzaꞌ nkyexik tkawiꞌ kyaqil kye tkꞌwaꞌal, ntons etetz nyaꞌtx-tal aꞌix bꞌan tkꞌwaꞌal. 9 Bꞌix ax aj man tuq kꞌwaꞌl aꞌoꞌ, kye qtat tzani twitz txꞌoꞌtxꞌ, kyetz nqotzaj kykawiꞌ tuq bꞌix nkyeqet tuq qokslaꞌ. ¿Tistil nlay qet qokslaꞌ te Qtata Dios aj atjax tuj kaꞌj tzan qanqꞌin te jun-eleꞌx tukyꞌiꞌl? 10 Komo kye qtat, kyetz nqotzaj tuq kykawiꞌ cha kabꞌe qꞌij iktzaꞌx tuq kyetz kygan; yatzun te Qtata Dios, tetz nqotzaj tkawiꞌ tzan tok te jun galan te qetzx, tzan tok bꞌan saq qanim iktzaꞌx tetz.* 11 Bꞌanꞌax oj qtzaj kawiꞌ, kꞌontiꞌl nqochalaj tiꞌj, sinoke nqobꞌisun, per qa nꞌox tuj qwiꞌ, ntons nꞌel te jun galan te qetz, ntzaj xhchewsaꞌ jkꞌuꞌj tuj tumeꞌl galan.
12 Astilji etetz aj nyaꞌtx jwert atix [tukyꞌi Qtata Dios], intetz etebꞌeꞌ ewitz bꞌix intjaw etin ekꞌuꞌj tzan ebꞌet tukyꞌiꞌl.a 13 Bꞌix peꞌebꞌet waq tuj tumeꞌl iktzaꞌ tuj jun bꞌey bꞌan galan, ikxji tzan kꞌon ejoyon jun bꞌey aj jaꞌ cha owelal tin ebalor sinoke tzan etok jwert.*
14 Intok esiꞌ waq enabꞌl tzan eten galan kyukyꞌi kyaqil bꞌix tzan sten bꞌan saq etanim tuj twitz te Qajawil, komo qa nyaꞌtx ikxji nlay bꞌantik tzan tok qen. 15 Ax intok esiꞌ waq enabꞌl [tzan tqet eteꞌeꞌ etibꞌ exolx] tzan kꞌon kaj tkolaꞌ nijunwt te aj nim bꞌan galan aj ntzaj tsiꞌ te Qtata Dios qajsik; ikxji tzan kꞌon tok chꞌinwt qꞌoj tuj etanim tzan tpaj te nini kebal tzꞌok jun nyaꞌtx galan exol aj okyꞌel kyiꞌj txqꞌanky.* 16 Kꞌontiꞌl tzan tkꞌajajin nijunwt exol etetz, bꞌix kꞌontiꞌl tzan tel tikꞌoꞌ nijunwt te aj bꞌan tbꞌanil ntzaj siꞌ tzan Qtata Dios, iktzaꞌ te Sawu aj tzan tpaj jun wabꞌj oqet tkyꞌexbꞌeꞌ kyaqil aj at tuq toklen tiꞌj tzan tpaj a tetz te tbꞌay kꞌwaꞌl.* 17 Komo etetz etebꞌen, tetz mas yaj, oqet twitz twitz stat tzan tuq tqet kyꞌiwlaꞌ tzan stat, per kꞌontiꞌl oqet kyꞌiwlaꞌ, ya kꞌontiꞌl obꞌantik tzan tjaw meltzꞌjik anke oje tzꞌoqꞌ.*
18 Etetz nyaꞌtx tiꞌj jun witz maꞌtx kxꞌok laqꞌchet [iktzaꞌ kye aj Israel oqtxiꞌ eꞌok laqꞌchet tiꞌj te witz] aj bꞌan ntilun tuq bꞌix bꞌan qlolj tuq tiꞌj bꞌix muj bꞌix ajun ray tukyꞌi jabꞌ,* 19 bꞌix twiꞌ te trompet bꞌix twiꞌ Qtata Dios nyolin, bꞌix kye aj oxik chaꞌon tetz oqet kywitz twitz tzan kꞌon tuq stzaj tyoliꞌ mas. 20 Komo kꞌontiꞌl tuq nbꞌantik tzan tok kchaꞌoꞌ [tzan kxobꞌal] tiꞌj te aj otzaj tqꞌumaꞌ ikxjani: “Abꞌl oqtel tsiꞌ jun toq twiꞌ ja witzni owokel xoꞌoꞌ tukyꞌi abꞌj tzan tkamik nkesey jun txkup.”b 21 Bꞌan xobꞌajil tuq te aj nxik kyen, astilji te Moisés otqꞌumaj ikxjani: “Wetz bꞌan nkyinluꞌlun tzan nxobꞌal.”* 22 Per yatzun etetz, etetz oje kxꞌok laqꞌchet tiꞌj te witz Sión, bꞌix tiꞌj te tamaqꞌ te Qtata Dios aj at jun tanqꞌin, te tamaqꞌ aj nꞌok qꞌumaꞌ te Jerusalen aj atjax tuj kaꞌj, bꞌix kyiꞌj kye bꞌan kyꞌilaꞌj ángel aj chimoꞌ kyibꞌ nkyenaꞌon te Qtata Dios. 23 Bꞌix [oje kxꞌok laqꞌchet] kyiꞌj kyaqil kye aj nkyenaꞌon te Qtata Dios, aj tzꞌibꞌameꞌ [tuj Tuꞌjal] tuj kaꞌj* iktzaꞌ kye tbꞌay kꞌwaꞌalbꞌaj. Bꞌix oje kxꞌok laqꞌchet tiꞌj Qtata Dios aj oxeꞌl tqꞌumaꞌ abꞌl te aj at tpaj; bꞌix [atikxqet] kywitz kye aj akyeqet twitz Qtata Dios tuj kaꞌj aj oje kyekaj saq tuj twitz.c 24 Bꞌix [oje kxꞌok laqꞌchet] tiꞌj Jesus aj nkꞌulun tzan tponkix te tumeꞌl akꞌaꞌj aj oxik tsiꞌ tyol te Qtata Dios tiꞌj. Bꞌix [oje kxꞌok laqꞌchet] tiꞌj [tzan tpaj te tkamiky aj telen] xhchikyꞌel [aj nkꞌulun tzan tkaj saq qanim] bꞌix mas nim token twitz tkamiky Abel.*
25 Astilji, intok esiꞌ enabꞌl tzan kꞌon tel etikꞌoꞌ te Qtata Dios aj nkxtzaj tkawiꞌ. Komo kye qijajil oqtxiꞌ kꞌontiꞌl obꞌantik tzan kykolon kyibꞌ tiꞌj tetz aj ktzaj tkawiꞌ tzani twitz txꞌoꞌtxꞌ, pyorx-al qetz ajnaꞌl nlay bꞌantik tzan jkolet qa okajel jkolaꞌ te aj ntzaj kawin qetz max tuj kaꞌj. 26 Tuj aj tyempji te Qtata Dios oyolin bꞌix ojaw kyitlik te twitz txꞌoꞌtxꞌ, per yatzun ajnaꞌl oje xik tsiꞌ tyol ikxjani: “Onkꞌuluꞌtz tzan tjaw nkyitoꞌ nyaꞌtx aꞌox te twitz txꞌoꞌtxꞌ sinoke ax te twitz kaꞌj.”* 27 Aj stzaj tqꞌumaꞌ ikxji telponx kyaqil kye tidiꞌchq aj at twitz txꞌoꞌtxꞌ ojawel kyitoꞌ bꞌix opoyonaj, bꞌix ikxji cha aꞌox okajel te aj [tuj kaꞌj] aj nlay bꞌantik tzan tponaj. 28 Bꞌix komo qetz aqoqet tuj tqꞌabꞌ te Qtata Dios bꞌix kꞌontiꞌl titzaꞌ tzan qel in, astilji intxik qsiꞌ pixon tetz, bꞌix ikxji tzan tqet qnaꞌoꞌ tukyꞌi jun tumeꞌl bꞌan galan bꞌix tzan tqet qxjaniꞌ tuj jun tumeꞌl aj nqet tuj twitz. 29 Komo te Qtata Dios [opoyon tnajsaꞌ kyaqil te aj nyaꞌtx galan, iktzaꞌ] jun nim qꞌaqꞌ npon tnajsaꞌ kyaqil.*