11
Intel Qin Iktzaꞌ Kye Aj Owok Kywitꞌbꞌaꞌ Kykꞌuꞌj Tiꞌj Qtata Dios Oqtxiꞌ
1 Ntons, oj tok witꞌlet jkꞌuꞌj telponx sewur atoꞌ ojkꞌamoꞌtz te aj loꞌik jkꞌuꞌj tzan jkꞌamon, bꞌix sewur atoꞌ tiꞌj jun tidiꞌ a minaꞌ tok qen. 2 Kye qijajil oqtxiꞌ, kyetz eꞌel galan tuj twitz Qtata Dios tzan tpaj kyetz owok witꞌlet kykꞌuꞌj tiꞌj. 3 Tzan tpaj witꞌlik jkꞌuꞌj tiꞌj tetz, nꞌel qnikyꞌ kyaqil te twitz txꞌoꞌtxꞌ bꞌix kyaqil te twitz kaꞌj obꞌantik cha aꞌox tukyꞌi tyol Qtata Dios aj oxik tqꞌumaꞌ;* ikxji nꞌel qnikyꞌ ajnaꞌl kyaqil aj nxik qenni oqet kꞌuluꞌ tiꞌj jun tidiꞌ aj kꞌontiꞌl tuq ebꞌajil.
4 Te Abel witꞌlik tuq tkꞌuꞌj tiꞌj Qtata Dios, bꞌix astilji oxik tqꞌapoꞌ jun tpresent aj owel mas galan tuj twitz te Qtat twitz te aj oxik tqꞌapoꞌ te Kain.* Astilji te Abel owel tuj twitz Qtata Dios jun xjal aj nbꞌet tuq tuj tumeꞌl bꞌix oqet tuj twitz te Qtat te aj oxik toyeꞌ. Anke tetz oqtxiꞌ tkamlen, ajnaꞌl iktzaꞌ tzunx nyolin [titzaꞌ tzan tok qwitꞌbꞌaꞌ jkꞌuꞌj].
5 Bꞌix te Enok, ax tetz witꞌlik tuq tkꞌuꞌj tiꞌj Qtata Dios, bꞌix astilji oxik in itzꞌoj [tuj kaꞌj] tzan kꞌon tuq tok ten twitz tkamiky. “Ya kꞌontiꞌl owoknoj tzani twitz txꞌoꞌtxꞌ tzan tpaj te Qtata Dios oxik in tetz”* bꞌix aj minaꞌ tuq txik in, tetz ojetq tuq tzꞌel galan tuj twitz Qtata Dios. 6 Komo qa kꞌontiꞌl witꞌlik jkꞌuꞌj tiꞌj Qtat, nlay bꞌantik tzan qel galan tuj twitz; komo tzan qok laqꞌchet tiꞌj a tgan tzan qokslan tetz atqet bꞌix ntzaj tsiꞌ te aj nqojoyon tukyꞌiꞌl.
7 Bꞌix te Noe, ax tetz witꞌlik tuq tkꞌuꞌj tiꞌj Qtata Dios, bꞌix aj txik tqꞌumaꞌ Qtata Dios tetz tiꞌj kyaqil aj okyꞌel tuq anke minaꞌ tuq tok eꞌelet, te Noe oqet tokslaꞌ bꞌix oqet tkꞌuluꞌ te bark tzan kykolet kye aj tuj tjay. Astilji kye xjal exik siꞌ tuj il, bꞌix te Noe, te Qtata Dios oqet tkꞌuluꞌ tumeꞌl tukyꞌiꞌl iktzaꞌx tuq witꞌlik tkꞌuꞌj.*
8 Bꞌix te Abran, ax tetz witꞌlik tuq tkꞌuꞌj tiꞌj Qtata Dios, bꞌix astilji tetz, aj txik lajoꞌ tzan te Qtata Dios, tetz oqet tokslaꞌ, owex tuj tamaqꞌ bꞌix oxik tuj te luwar aj jaꞌ otkꞌamoꞌtz tuq te xtxꞌoꞌotxꞌ, per aj txik kꞌontiꞌl tuq tebꞌen jaꞌ ikjaꞌn tuq txik.* 9 Bꞌix tzan tpaj witꞌlik tuq tkꞌuꞌj tiꞌj Qtata Dios, tetz onajan tzi iktzaꞌ jun laqꞌchik xjal tuj te luwar aj oxik tsiꞌ te Qtata Dios tyol tiꞌj. Tzi, tetz onajan tjaqꞌ sakꞌabꞌteꞌ iktzaꞌx kye aꞌeꞌ tijajil mas yaj, te Isak bꞌix te Jacob, ax kyetz okyiyoj tzan tponkix tuq te tyol Qtata Dios aj oxik tsiꞌ kyetz.* 10 Komo te Abran loꞌik tuq tkꞌuꞌj tiꞌj te amaqꞌ [tuj kaꞌj] aj nlay ponaj,a bꞌix te aj bꞌisul kyaqil bꞌix aj kꞌulul tetz, a te Qtata Dios.
11 Bꞌix te Sar, ax tetz tzan tpaj witꞌlik tuq tkꞌuꞌj tiꞌj Qtata Dios, bꞌaꞌn tuq tzan tok ten tal anke bꞌan bꞌiꞌxhtky tuq. Komo otokslaj te Qtata Dios jun yolin tzan tkꞌulun te aj ojetq tuq xik tsiꞌ tyol tiꞌj.* 12 Astilji tiꞌj jun ichan, anke bꞌan tijky tuq, tiꞌj tetz etzaj bꞌan kyꞌilaꞌj tijajil iktzaꞌ cheꞌw twitz kaꞌj [bꞌan kyꞌilaꞌj bꞌix iktzaꞌ sanik],b kꞌontiꞌl nbꞌantik tzan kyajlet.*
13 Ntons kyaqil kye ja xjalni, kyetz witꞌlik tuq kykꞌuꞌj tiꞌj Qtata Dios, bꞌix aj kykamik, minaꞌ tuq kykꞌamon te aj ojetq tuq xik tsiꞌ te Qtata Dios tyol tiꞌj. Per tzan tpaj witꞌlik tuq kykꞌuꞌj, kyetz sewur tuq ateꞌ tiꞌj te tyol Qtata Dios aj oje xik tsiꞌ kyetz bꞌix nkyechalaj tuq tiꞌj. Komo kyebꞌen tuq kꞌontiꞌl nkyenajan tuj kyamaqꞌ bꞌix cha kabꞌeꞌ qꞌij akyeqet tuq tzani twitz txꞌoꞌtxꞌ. 14 Komo kye aj nkyqꞌumaꞌ ikxji, nꞌel qnikyꞌ kyiꞌj kyetz tzunx nkyejoyon jun luwar jaꞌ tzan kynajan bꞌeyx te jun-eleꞌx. 15 Qa kyetz cha nkyebꞌisun-wit tuq tiꞌj te kyamaqꞌ aj jaꞌ ebꞌajꞌetz, bꞌaꞌn tuq tzan kymeltzꞌjik txini. 16 Per kyetz kygan tuq jun kyamaqꞌ mas tbꞌanil, te kyamaqꞌ tuj kaꞌj; astilji te Qtata Dios kꞌontiꞌl nqet kyꞌixwik kyiꞌj tzan tpaj nkyenaꞌon tetz, komo tetz oje qet tkꞌuluꞌ jun luwar te kyetz.
17 Bꞌix te Abran, aj txik tsiꞌ Qtata Dios tyol tukyꞌiꞌl, komo te Abran witꞌlik tuq tkꞌuꞌj tiꞌj Qtat, tetz aj tqet siꞌ tuj preb, oxik tin te Isak aj tkꞌajol aj cha jun tuq, bꞌix oxik tqꞌapoꞌ te jun present te tetz [iktzaꞌx otqꞌumaj te Qtat tukyꞌiꞌl],* 18 anke te Qtat ojetq tuq xik tsiꞌ tyol ikxjani: “Tiꞌj te akꞌajol Isak okyeꞌelal kye awijajil.”* 19 Te Abran tebꞌenky tuq, te Qtata Dios at tajwalil tzan kyjaw anqꞌin kye kamnaq titzaꞌ, bꞌix te nini telponx iktzaꞌx okyꞌik tiꞌj [te Isak aj tkꞌajol, tzan tpaj] te Abran dispwest tuq tzan tkꞌulun iktzaꞌ te Qtata Dios tgan.*
20 Bꞌix te Isak, ax tetz witꞌlik tuq tkꞌuꞌj tiꞌj Qtata Dios, bꞌix astilji oqet tkyꞌiwlaꞌ te Jacob bꞌix te Sawu tukyꞌi jun galan aj okyꞌel tuq kyiꞌj mas yaj.*
21 Bꞌix te Jacob, ax tetz witꞌlik tuq tkꞌuꞌj tiꞌj Qtata Dios, bꞌix astilji tetz eqet tkyꞌiwlaꞌ kye tkꞌajol te Chep bꞌix onaꞌon Qtata Dios qajlik tuq tajsik te txbꞌaqꞌen.*
22 Bꞌix te Chep, ax tetz witꞌlik tuq tkꞌuꞌj tiꞌj Qtata Dios, bꞌix astilji, aj chꞌinky tuq tkamik, oxik tqꞌumaꞌ kye aj tijajil Israel okyeꞌelatzkix tuq tuj te tkwentil Ejipt, bꞌix okaj tyoliꞌ tzan txik tuq kyin chꞌin kye tbꞌaqil oj kyex.*
23 Bꞌix kye stat te Moisés, ax kyetz witꞌlik tuq kykꞌuꞌj tiꞌj Qtata Dios, bꞌix astilji, aj titzꞌjik te Moisés, kyetz owel kyewaꞌ oxe qyaꞌ tzan tpaj jun neꞌ bꞌan tbꞌanil tuq bꞌix kꞌontiꞌl ebꞌajxobꞌ tiꞌj aj ojetq xik tkꞌuluꞌ mandad te twitzaleꞌ kꞌulul mandad tzi [tzan kykanslet tuq kye neꞌ ichan].* 24 Bꞌix te Moisés, ax tetz witꞌlik tuq tkꞌuꞌj tiꞌj Qtata Dios, bꞌix astilji ya ma pon tijxjal kꞌontiꞌl ostzoqpij tzan tok qꞌumaꞌ qa tetz tnan a te tmeꞌal te twitzaleꞌ kꞌulul mandad tuj aj amaqꞌji. 25 Tetz oqet tbꞌisuꞌ mas galan tzan tok ten twitz xhchoꞌnal junx kyukyꞌi kye aj nkyenaꞌon te Qtata Dios bꞌix nyaꞌtx tzan sten tuj tidiꞌchq aj cha nꞌel tganiꞌ te xhchiꞌjel. 26 Ostzaqꞌbꞌej tzan tel in tkyꞌexaw iktzaꞌ aj okyꞌel tuq mas yaj tiꞌj te Krist, te nini iktzaꞌ jun tqꞌinomal mas nim twitz kyaqil tidiꞌchq bꞌan tbꞌanil tuj te amaqꞌ Ejipt; oqet tbꞌisuꞌ ikxji tzan tpaj tetz loꞌik tuq tkꞌuꞌj tiꞌj te aj bꞌan galan otzajel siꞌ tuq te tetz mas yaj. 27 Bꞌix yaji, komo te Moisés witꞌlik tuq tkꞌuꞌj tiꞌj Qtata Dios, astilji owex tuj te amaqꞌ Ejipt* bꞌix kꞌontiꞌl oxobꞌ twitz te kꞌulul mandad aj ojetq tuq tzaj nim tqꞌoj tiꞌj. Tetz kꞌontiꞌl okaj tsiꞌ titzaꞌ witꞌlik tkꞌuꞌj, iktzaꞌ jun xjal aj nꞌok ten te Qtata Dios aj kꞌontiꞌl ebꞌajil. 28 Bꞌix tzan tpaj tetz witꞌlik tuq tkꞌuꞌj tiꞌj Qtata Dios, tetz oqet tqꞌijlaꞌ te ninqꞌij Paskw bꞌix owok tkyitoꞌ xhchikyꞌel [jun tal moch tiꞌj tlamelul kyjay kye xjal] tzan kꞌon tok tidiꞌ kyiꞌj oj tkyꞌik te ángel aj oqet tkansaꞌ kye tbꞌay kꞌwaꞌl [kxol kye aj Ejipt].* 29 Bꞌix tzan tpaj witꞌlik tuq kykꞌuꞌj tiꞌj Qtata Dios, ebꞌajkyꞌix tuj tbꞌey aꞌ aj te Aꞌ Kyaq Tebꞌl tbꞌi, per ebꞌajkyꞌix bꞌet iktzaꞌ tuj jun bꞌey kyꞌixkꞌoj txꞌoꞌtxꞌ. Yatzun kye aj Ejipt, ya ma kyekyꞌik tuq kyetz, ebꞌajjaw jeqꞌbꞌik bꞌix ebꞌajkamik.*
30 Bꞌix tzan tpaj witꞌlik tuq kykꞌuꞌj tiꞌj Qtata Dios, astilji te nim loqꞌ aj peꞌon tuq tiꞌj te amaqꞌ Jeriko oqet tzꞌaqik tibꞌx aj nkyebꞌet tuq kye aj Israel wuq qꞌij tiꞌj.*
31 Bꞌix te Raáb aj nkꞌayin tuq xhchiꞌjel [tbꞌayaꞌ], ax tetz owok twitꞌbꞌaꞌ tkꞌuꞌj tiꞌj Qtata Dios; astilji tetz kꞌontiꞌl okamik kyukyꞌi kye aj kꞌontiꞌl ebꞌajꞌokslan tzan tpaj tetz etkꞌamoj galan kye aj tijajil Israel aj ebꞌajxwaꞌq xhlukꞌiyon.*
32 ¿Ntons, tidiꞌ mas oxeꞌl nqꞌumaꞌ? Nlay-tal kanon tyemp tzan txik nqꞌumaꞌ tiꞌj te Jedyon,* bꞌix te Barak,* bꞌix te Sanson,* bꞌix te Jefte,* bꞌix te Dawid,* bꞌix te Samuel,* bꞌix kye aj yolil tyol Dios. 33 Kyetz tzan tpaj witꞌlik tuq kykꞌuꞌj tiꞌj Qtata Dios, kyetz ebꞌajqet kyꞌilaꞌj amaqꞌ kyitzaꞌ, bꞌix oqet kykꞌuluꞌ mandad tukyꞌi jun kykawbꞌil tuj kyqꞌabꞌ, bꞌix okykꞌamoj aj ojetq tuq xik tsiꞌ te Qtata Dios tyol tiꞌj, bꞌix bꞌaꞌn tuq tzan kykolon kyibꞌ kyiꞌj kye leon,* 34 bꞌix bꞌaꞌn tuq tzan kykolon kyibꞌ tiꞌj jun nim qꞌaqꞌ,* bꞌix ebꞌajkolet tzan kꞌon kykamik tukyꞌi teꞌ machit aj kansbꞌil,* bꞌix kye aj kꞌontiꞌl kybalor, jwert tuq ateꞌ [tukyꞌi Qtata Dios],* bꞌix bꞌaꞌn tuq kyitzaꞌ tzan kyoqik kyajqꞌoj aj tzajnaqeꞌ laqꞌchik,* 35 bꞌix ax ateꞌ junjun xuj aj okykꞌamoj junkyꞌel kye kyfamily aj kamnaqeꞌ tuq bꞌix ebꞌajjaw anqꞌin junkyꞌel.* Per yatzun txqꞌanky qerman, kyetz [kꞌontiꞌl owel kyukyꞌiꞌl ikxji, sinoke] owok kyen twitz xhchoꞌnal, kꞌontiꞌl oktzoqpij tzan kyqet koloꞌ tzan tpaj sewur tuq ateꞌ tzan kyjaw anqꞌin junkyꞌelky. 36 Bꞌix ax ateꞌ tuq junjunky eqet xmayiꞌ bꞌix eqet jubꞌchaꞌ bꞌix eqet kꞌaloꞌ tukyꞌi kaden bꞌix ebꞌajqex siꞌ pres.* 37 Ebꞌajqet kansaꞌ tukyꞌi abꞌj, bꞌix eqet kabꞌinsaꞌ, bꞌix owok kyen twitz preb, bꞌix eqet kansaꞌ tukyꞌi machit aj kansbꞌil, bꞌix cha ejaw bꞌet jaꞌchq bꞌix te kyqꞌanaq cha stzꞌumal karner bꞌix stzꞌumal chib, bꞌix mebꞌa-eꞌ; kyetz nꞌok kyen tuq twitz nim xhchoꞌnal, bꞌix owok kꞌuluꞌ tidiꞌchq nyaꞌtx galan kyiꞌj tzan txqꞌanky xjal.* 38 Kye xjal twitz ja txꞌoꞌtxꞌni, kyetz nyaꞌtx tuq kymeres tzan kyten kye ja galan xjal kxolni. Kye ja galan xjalni xbꞌakꞌoneꞌ tuq jaꞌchq tuj te kyꞌixkꞌoj txꞌoꞌtxꞌ bꞌix twiwitz bꞌix tuj jul bꞌix jaꞌchq tuj chman jul tjaqꞌ txꞌoꞌtxꞌ.
39 Ntons, kyaqil kye ja xjal ntzanijeꞌ eꞌel galan tuj twitz Qtata Dios tzan tpaj witꞌlik tuq kykꞌuꞌj tiꞌj, per nijunwt te kyetz okykꞌamoj aj ojetq tuq xik tsiꞌ te Qtata Dios tyol tiꞌj. 40 Te Qtata Dios ojetq tuq qet tbꞌisuꞌ jun galan te qetz bꞌix ikxji junx qukyꞌiꞌl ax kyetz okyekajel galan tuj twitz Qtata Dios.