10
Te Jesukrist Oje Tzꞌel Xhchojoꞌ Kyaqil Te Qchoj Bꞌeyx Te Jun-eleꞌx
1 Komo te aj nyolin tuq te Kawbꞌil oqtxiꞌ, nyaꞌtx tuq te aj bꞌan tbꞌanil aj otzajel siꞌ tuq mas yaj [tzan tpaj te Krist], sinoke cha oyolin tiꞌj te aj otzajel siꞌ [tzan tpaj te Krist]. Astilji, tzan tpaj kye present aj nxik qꞌapoꞌ tuq aqꞌbꞌiaꞌ tzan kye aj nkyepon [naꞌol te Qtata Dios], kꞌontiꞌl tuq nbꞌantik tzan tkaj saq kyanim bꞌeyx te jun-eleꞌx. 2 Qa kye present aj nkyexik tuq qꞌapoꞌ nkykꞌuluꞌ-wit tzan tkaj saq kyanim bꞌeyx te jun-eleꞌx, ikxji kye xjal okaj-tal ksiꞌ tzan txik kyqꞌapoꞌ mas kypresent tzan tpaj kꞌontiꞌl nkynaꞌoꞌ choj tuj kyanim. 3 Per tiꞌj te aj nxik kyqꞌapoꞌni, aqꞌbꞌiaꞌ ntzaj kynaꞌoꞌ [tzunx at te] kchoj. 4 Komo nlay bꞌantik tzan tel in te kchoj bꞌeyx te jun-eleꞌx cha tzan tpaj aꞌox te xhchikyꞌel jun tor bꞌix xhchikyꞌel jun chib. 5 Astilji aj tul te Krist tzani twitz txꞌoꞌtxꞌ, tetz oxik tqꞌumaꞌ [tukyꞌi Qtata Dios] ikxjani: “Yatz nyaꞌtx agan tzan txik qꞌapoꞌ te yatz cha aꞌox present tukyꞌi oyej sinoke yatz maꞌtx tzaj asiꞌ jun nchiꞌjel [tzan txik nqꞌapoꞌ wibꞌ te present te najsbꞌil kchoj]. 6 Kꞌontiꞌl nqet tuj awitz kye present aj nxik kyqꞌapoꞌ kye xjal te yatz tzan tel in kchoj.a 7 Astilji oxik nqꞌumaꞌ, “Tzani akyinqet tzan tqet nkꞌuluꞌ iktzaꞌ yatz agan tat, iktzaꞌx tzꞌibꞌankaj wiꞌj tuj te uꞌj [aj jaꞌ okaj tzꞌibꞌaꞌ ayol oqtxiꞌ].””* 8 Ntons, oyolin ikxjani: “Kyaqil txakl present aj nxik kyqꞌapoꞌ te yatz bꞌix kyaqil oyej bꞌix kyaqil aloꞌmj aj nkyeqet tzꞌeꞌsaꞌ te yatz tzan tpaj te kchoj kye xjal, kyaqil nini kꞌontiꞌl nqet tuj awitz” (anke te Kawbꞌil ntqꞌumaꞌ tzan jkꞌulun ikxji). 9 Yaji ax oxik tqꞌumaꞌ ikxjani: “Tzani atinqet tzan nkꞌulun kyaqil aj yatz agan.” Ntons, ntzani telponx tetz nꞌel tin te tumeꞌl aj okaj siꞌ tbꞌay oqtxiꞌ tzan tkaj tsiꞌ junky akꞌaꞌj tkyꞌixel. 10 Astilji, tzan tpaj ikxji tgan te Qtata Dios, oje qoꞌel pawaꞌ aꞌox te tetz tzan tpaj te Jesukrist oxik tqꞌapoꞌ tibꞌ cha jun-el bꞌix bꞌeyx te jun-eleꞌx oxik tqꞌapoꞌ te xhchiꞌjel te present tzan tel in te qchoj.
11 Kyaqil kye pal bꞌajqꞌij nkyekꞌulun kyopis, nxik kyqꞌapoꞌ present te Dios,* nxik ksiꞌ kyꞌilaꞌj-el axkix txakl present anke kꞌontiꞌl nꞌel in te qchoj tzan tpaj kyaqil nini. 12 Per yatzun [te Jesukrist], tetz cha jun-el bꞌix bꞌeyx te jun-eleꞌx oxik tqꞌapoꞌ tibꞌ te present tzan tel xhchojoꞌ te qchoj, bꞌix yaji oqet witꞌlet tuj tbꞌanqꞌabꞌ te Qtata Dios, 13 bꞌix ajnaꞌl cha nꞌiyon tzan kyqet kye tajqꞌoj tzan te Qtata Dios bꞌix tzan kykaj siꞌ tjaqꞌ toq.* 14 Komo a tetz oxik tqꞌapoꞌ tibꞌx te jun present te Qtata Dios tzan qel bꞌan kꞌontiꞌl qpaj tuj twitz te Qtat bꞌeyx te jun-eleꞌx, qetz aj kyebꞌaꞌ mas galan nꞌok te qnabꞌlin. 15 Bꞌix ax te Txew Dios, ax ntqꞌumaꞌ qetz bꞌanꞌax te nini, komo otzaj tqꞌumaꞌ ikxjani: 16 “Te tumeꞌl akꞌaꞌj aj okajel nsiꞌ kyukyꞌi kye aj Israel tuj aj tyempji, aj ntzani,” kyi te Qajawil. “Oqtel nsiꞌ Nkawbꞌil tuj kyanim bꞌix onkꞌuluꞌtz tzan tkaj tuj kywiꞌ.”* 17 Bꞌix, “Ya nlay tzaj nnaꞌoꞌ junkyꞌel te kchoj bꞌix kyaqil aj nyaꞌtx galan kykꞌulbꞌen.”* 18 Ntons oj tqet najsaꞌ te qchoj [bꞌeyx te jun-eleꞌx], yaji nyaꞌtx presis tzan txik qꞌapet junky oyej tzan tpaj te qchoj.
Kꞌon Kaj Qsiꞌ Tzan Tok Qwitꞌbꞌaꞌ Jkꞌuꞌj Tiꞌj Qajaw Jesukrist
19 Ntons astilji waq erman, kꞌontiꞌl tidiꞌ nꞌel in gan qetz tzan qox tuj te Luwar Aj Bꞌan Xjan [aj jaꞌ atqet te Qtata Dios tuj kaꞌj] tzan tpaj tkamlen te Jesus aj tel xhchikyꞌel. 20 Komo [tetz tkamiky] jun tumeꞌl iktzaꞌ jun bꞌey akꞌaꞌj bꞌix nqoxik teqꞌiꞌ tuj jun qanqꞌin, ntons tzan tpaj tetz xhchiꞌjel [okamik te present te chojbꞌil qchoj], ikxji owel in te pawbꞌil [tzan qok laqꞌchet tiꞌj Qtata Dios]. 21 Bꞌix tzan tpaj a tetz te qpal aj nim tajwalil te twitzaleꞌ tuj Tjay Qtata Dios, 22 astilji qobꞌaj-ok laqꞌchet waqnajji tiꞌj Qtata Dios tukyꞌi jun tkꞌuꞌjlal bꞌix witꞌbꞌaꞌ jkꞌuꞌj tiꞌj bꞌan byenech tukyꞌi jun qanim bꞌan saq tzan te [kyikꞌ] aj owok kyitoꞌ bꞌix te qchiꞌjel ax saq tjawlen siꞌ aꞌ qwiꞌ.b 23 Qobꞌajten waq jwert titzaꞌ witꞌlik jkꞌuꞌj, kꞌontiꞌl tzan tnaꞌnon qanim titzaꞌ loꞌik jkꞌuꞌj, komo jun yolin te [Qtata Dios] aj otzaj tsiꞌ tyol [tzan jqet tkoloꞌ]. 24 Bꞌix intqet qbꞌisuꞌ titzaꞌ tzan qnimsan jkꞌuꞌj qibꞌqibꞌx qxolx tzan kyqet qganiꞌ txqꞌanky bꞌix tzan jkꞌulun tidiꞌchq galan kye txqꞌanky, 25 bꞌix kꞌon kaj jkolaꞌ tzan tok qchimoꞌ qibꞌ iktzaꞌ nkykꞌuluꞌ junjun, sinoke qobꞌajnimsan jkꞌuꞌj qibꞌqibꞌx qxolx, pyor ajnaꞌl qebꞌenky chꞌinky tpon te qꞌij tzan tulky te Qajawil.
26 Per qa qetz nqojoyon choj cha qganx qetz bꞌix ojetq tzꞌok qchaꞌoꞌ te tumeꞌl bꞌanꞌax, ajnaꞌl kꞌontiꞌl junky present aj bꞌaꞌn tzan tel tin te qchoj 27 sinoke aꞌox tzan tok qen twitz jun xhchoꞌnal aj bꞌan nqoxobꞌ tiꞌj, jun xhchoꞌnal aj otzajel tsiꞌ te Qtata Dios kyiꞌj kye tajqꞌoj, jun bꞌan nim qꞌaqꞌ aj omankuyon loꞌon kyetz.* 28 Qa jun xjal kꞌontiꞌl ma qet tokslaꞌ te Kawbꞌil aj okaj tsiꞌ [te Qtata Dios tukyꞌi] Moisés bꞌix qa at kabꞌeꞌ qatzun ox testiwji, ntons nqet kansaꞌ bꞌix kꞌontiꞌl abꞌl nꞌok loꞌet tkꞌuꞌj tiꞌj.* 29 ¿Titzaꞌ etetz tuj enabꞌl, nyaꞌtx petzun mas nim xhchoꞌnal oxeꞌl siꞌ kyiꞌj kye aj nꞌel kyikꞌoꞌc te Tkꞌwaꞌal Qtata Dios? Komo nꞌel kyikꞌoꞌ iktzaꞌ jun nyaꞌtx galan te tkamiky aj telen xhchikyꞌel tzan tpon te tyol Qtata Dios,* te tyol aj oxik tsiꞌ tiꞌj te tumeꞌl akꞌaꞌj tzan tkaj saq qanim tuj twitz. Bꞌix cha nkyexmayin tiꞌj te Txew Dios aj ntzaj tsiꞌ nim bꞌan galan qajsik. 30 Qetz qebꞌenky, te Qtata Dios oje tzaj tqꞌumaꞌ ikxjani: “Aꞌin wetz oxeꞌl nsiꞌ jun xhchoꞌnal kyiꞌj, onkꞌuluꞌtz tzan tel kchojoꞌ te kykꞌulbꞌen nyaꞌtx galan.”* Bꞌix ax otzaj tqꞌumaꞌ ikxjani: “Te Qajawil oxeꞌl tsiꞌ tuj il kye txjalil aj nyaꞌtx galan kykꞌulbꞌen.”* 31 ¡[Qa at qpaj] ntons bꞌan xobꞌaljil nim oj jqet tzꞌaqik tuj tqꞌabꞌ te Qtata Dios aj at jun tanqꞌin!
32 Per kꞌon tzꞌajnaj tuj etanim, oqtxiꞌ aj man tuq txiklen etokslaꞌ te tpakbꞌalil, etetz owok eten twitz nim xhchoꞌnal bꞌix etipaj tidiꞌchq. 33 Atqet junjun etetz okxꞌokbaꞌj yasoꞌ bꞌix owel in ekyꞌexaw kywitz xjal, bꞌix atqet okxꞌonen kyukyꞌi kye aj owok kyen twitz xhchoꞌnal. 34 Komo etetz owok loꞌet ekꞌuꞌj kyiꞌj kye aj pres, bꞌix tukyꞌi jun chalajbꞌil etzoqpij tzan tel in kyaqil aj at tuq etetz, komo etetz etebꞌen, [tuj kaꞌj] at mas bꞌan tbꞌanil te etetz bꞌix bꞌeyx te jun-eleꞌx. 35 Astilji ajnaꞌl etetz kꞌon kaj esiꞌ tzan tok witꞌlet ekꞌuꞌj [tiꞌj Qtata Dios] tzan tpaj ekꞌamoꞌtz jun bꞌan tbꞌanil tukyꞌiꞌl. 36 Etetz presis tzan sten nim epasens tzan eten jwert tuj aj xhchoꞌnalni, tzan ekꞌulun iktzaꞌ tgan te Qtata Dios, ikxji ekꞌamoꞌtz te aj oje xik tsiꞌ tyol tiꞌj. 37 [Tuj te Tuꞌjal Dios nyolin ikxjani]: “Chꞌinky bꞌan chꞌinky, tul te aj [tzꞌibꞌankaj tiꞌj] tzan tul, bꞌix nlay nachqꞌin masky tzan tul. 38 Te aj nbꞌet tuj tumeꞌl iktzaꞌ wetz ngan, nꞌanqꞌin witꞌlik tkꞌuꞌj wiꞌj; per qa okajel tsiꞌ tzan tbꞌet tuj tumeꞌl, nlay kyinchalaj tiꞌj.”* 39 Per yatzun qetz nyaꞌtx aꞌoꞌ iktzaꞌ kye aj nkaj ksiꞌ tzan kybꞌet tuj tumeꞌl bꞌix ikxji okyepoyonaj, sinoke qetz witꞌlik jkꞌuꞌj tzan jkolet.