9
Titzaꞌ Tuq Te Nin Jay Nabꞌil Qtata Dios Tzani Twitz Txꞌoꞌtxꞌ
1 Ntons te tumeꞌl aj okaj tsiꞌ te Qtata Dios tbꞌay-el, te nini at tuq xtxolil titzaꞌ tzan tqet kynaꞌoꞌ kye xjal te Qtat, bꞌix [tuj te jay] tzani twitz txꞌoꞌtxꞌ [aj jaꞌ nqet kynaꞌoꞌ kye xjal] te Qtat, at tuq jun tnajbꞌil pawaꞌ aꞌox te tetz. 2 Komo tuj te tbꞌay txol aj jaꞌ tuq nkyeꞌox, tzi kꞌulumaj tuq tukyꞌi jun tumeꞌl ikxjani: Atqet tuq te tqatel kandel* bꞌix te mes,* bꞌix twiꞌ te mes kye kabꞌlajuj wabꞌj* aj qꞌapomaj te Qtata Dios. Te ja ntzani a te txol jay aj nꞌok tuq qꞌumaꞌ “Te Luwar Aj Xjan.” 3 Yaji chaꞌoj qox tuj te xqꞌapj pawbꞌil tuj tkabꞌiꞌ txol mas tujx, a te txol jay aj nꞌok tuq qꞌumaꞌ “Te Luwar Aj Mas Bꞌan Xjan.”* 4 Tzi atqet tuq jun pombꞌil* aj pur xtxꞌotxꞌal oro, bꞌix ax te kaxh* aj pur xtxꞌotxꞌal oro kyaqil tiꞌj, aj telponx tuq tiꞌj te yol aj oxik tsiꞌ te Qtata Dios [kyukyꞌi kye qijajil oqtxiꞌ]. Bꞌix tzi akyeqex tuq tuj te kaxh, jun xar* pur xtxꞌotxꞌal oro aj jaꞌ tuq atqex te wabꞌj mana, bꞌix ax atqex tuq te txbꞌaqꞌen* te Aron aj otzaj xhchuxul, bꞌix ax kye abꞌj* aj jaꞌ tuq tzꞌibꞌaꞌ te aj oxik tyoliꞌ te Qtata Dios kyukyꞌi kye xjal oqtxiꞌ. 5 Bꞌix tajsik te kaxh akyejax tuq kyitzbꞌalil kye kerubins* aj telponx atqet tuq xhchkꞌatunal te Qtata Dios tzi, bꞌix [tukyꞌi te kxikyꞌ] nqet tuq kxmojomal tajsik xtxayil te kaxh aj jaꞌ te Qtata Dios oqet tnajsaꞌ kchoj kye xjal.* Ntons ikxji tuq, per ajnaꞌl nlay qoyolin titzaꞌ atok xtxolil te nini.
6 Ntons, kyaqil atqet tuq ikxji, bꞌix tuj te tbꞌay txol te jay nkyeꞌox tuq kye pal aqꞌunon bꞌajqꞌij.* 7 Per yatzun tuj te tkabꞌiꞌ txol, aꞌox nꞌox tuq te twitzaleꞌ pal, bꞌix nꞌox tuq cha jun-el jun aqꞌbꞌi, bꞌix oj tox, bꞌan presis tuq tzan txik tin xhchikyꞌel aloꞌmj tzan tkaj tkyitoꞌ tzan tpaj tetz xhchojx bꞌix tzan tpaj kchoj kye xjal aj nkykꞌuluꞌ tzan tpaj kꞌontiꞌl kyebꞌen.* 8 Ikxjani te Txew Dios ntzaj tyekꞌuꞌ qetz, aj tzunx tuq atqet Te Luwar Aj Mas Bꞌan Xjan, ntons nyaꞌtx tuq jaqoꞌ tzan kyox kyaqil xjal tzi. 9 Kyaqil ntzani cha jun yekꞌbꞌil tiꞌj te ja tyemp ajnaꞌl, komo kyaqil te oyej bꞌix te present aj nxik kyqꞌapoꞌ te Qtata Dios, kꞌontiꞌl nꞌoken tzan kykaj bꞌan saq tuj kyanim kye aj nkyexik qꞌapon tetz. 10 Komo te nini cha aꞌox tiꞌj wabꞌj bꞌix tiꞌj te qukꞌaꞌ, bꞌix tidiꞌchq kostumbr tzan tel txꞌajoꞌ te qchiꞌjel, bꞌix cha tidiꞌchq aj qꞌumankaj oqtxiꞌ tiꞌj te qchiꞌjel, bꞌix nꞌoken tuq cha aꞌox max oj stzaj tsiꞌ te Qtata Dios junky tumeꞌl akꞌaꞌj.
Te Qajaw Jesukrist Owok Ten Twitz Tkamiky Te Chojbꞌil Te Qchoj Qetz
11 Per yatzun ma tzul te Krist iktzaꞌ te twitzaleꞌ qpal aj otzajel tsiꞌ tidiꞌchq aj bꞌan galan, tetz owox [tuj kaꞌj] aj jaꞌ nnajan te Qtata Dios tuj te Aj Jaꞌ Mas Bꞌan Xjan bꞌix aj mas bꞌan presis bꞌix kꞌontiꞌl tidiꞌ nyaꞌtx galan tuj bꞌix nyaꞌtx kꞌulumaj tzan xjal, nyaꞌtx cha jun tidiꞌ aj kꞌuluꞌ tzani twitz txꞌoꞌtxꞌ. 12 Bꞌix kꞌontiꞌl owox txini tukyꞌi kyikꞌ aj xhchikyꞌel tal chib qatzun xhchikyꞌel tal wakxhji, sinoke tukyꞌi xhchikyꞌelx tetz owox [tuj kaꞌj] tuj te Aj Jaꞌ Mas Bꞌan Xjan, bꞌix owox bꞌeyx te jun-eleꞌx, tzan tpaj owel xhchojoꞌ kyaqil te qchoj tzan jkolet bꞌeyx te jun-eleꞌx. 13 Komo qa te kchikyꞌel kye tal chib bꞌix kye tor bꞌix stzaꞌjul jun tal wakxh, aj nxik kyitoꞌ kyajsik kye aj nyaꞌtx galan ateꞌ tuj twitz Qtata Dios,* qa tzan tpaj te nini bꞌaꞌn tuq tzan kyok laqꞌchet junkyꞌel tiꞌj te Qtata Dios, 14 ntons te xhchikyꞌel Krist mas at tajbꞌen. Komo tzan tpaj te Txew Dios aj atqet te jun-eleꞌx, tetz oxik tqꞌapoꞌ tibꞌx te Qtata Dios iktzaꞌ jun present aj kꞌontiꞌl tidiꞌ nyaꞌtx galan tiꞌj. Ikxji otkꞌuluj tzan tkaj saq qanim tiꞌj kyaqil te jkꞌulbꞌen aj nqoxik tin tuq tuj jkamiky, bꞌix ajnaꞌl bꞌaꞌn tzan tqet qnaꞌoꞌ te Qtata Dios aj at jun tanqꞌin.* 15 Astilji a te Jesus te aj nkꞌulun tzan tponkix te tumeꞌl akꞌaꞌj aj te Qtata Dios oxik tsiꞌ tyol tiꞌj. Ikxji tetz, tzan tpaj tkamiky, owel xhchojoꞌ kyaqil te qchoj tzan jkolet tiꞌj kyaqil te jkꞌulbꞌen aj nyaꞌtx galan aj oqet jkꞌuluꞌ aj tzunx tuq nꞌoken te tumeꞌl oqtxiꞌ aj oxik tsiꞌ te Qtata Dios tyol tiꞌj tbꞌay. Ikxji kye aj oje kyeꞌel joyoꞌ [tzan te Qtata Dios] okykꞌamoꞌtz te aj oje xik tsiꞌ tyol tiꞌj tzan kykꞌamon te jun-eleꞌx. 16 Ntons, tzan token jun testament, a tgan tzan tkamik tbꞌay te aj okaj qꞌuman tetz. 17 Komo jun yol aj ojetq kaj qꞌumaꞌ tuj jun testament, kꞌontiꞌl token qa minaꞌ tuq tkamik te aj okaj qꞌuman tetz, aꞌox at token qa ojetq kamik. 18 Astilji ax te tbꞌay tyol aj oxik tsiꞌ te Qtata Dios oqtxiꞌ, presiskix tuq te kyikꞌ [te chojbꞌil choj]. 19 Komo te Moisés ya ma xik tqꞌumaꞌ kye xjal kyaqil aj otyolij te Qtata Dios tuj te Kawbꞌil, yaji otzaj tin jun noqꞌa kyaq tebꞌl bꞌix otzaj tin txqꞌan txaq isopo bꞌix oqex tmuꞌuꞌ tuj kchikyꞌel kye tal tor bꞌix kye tal chib, aj samoꞌ tuq tukyꞌi aꞌ. Bꞌix yaji oxik tkyitoꞌ tajsik te uꞌj aj te Kawbꞌil bꞌix ax kyajsik kyaqil kye xjal. 20 Bꞌix yaji oxik tqꞌumaꞌ kye xjal ikxjani: “Te ja kyikꞌni telponx tiꞌj tyol te Qtata Dios aj maꞌtx kaj tqꞌumaꞌ qukyꞌiꞌl.”* 21 Te Moisés ax oqet tkyitoꞌ te kyikꞌ tiꞌj te jay tabernáculo aj jaꞌ tuq atqet xhchkꞌatunal te Qtata Dios bꞌix kyiꞌj kyaqil kye okensbꞌil aj nꞌoken tuq tzan kynaꞌon te Qtata Dios. 22 Iktzaꞌx nyolin tuj te Kawbꞌil, chꞌinky tuq kyaqil aꞌox tukyꞌi kyikꞌ bꞌaꞌn tuq tzan tkaj saq, bꞌix qa kꞌontiꞌl te kyikꞌ, kꞌontiꞌl tuq nqet najsaꞌ te qchoj.*
23 Ntons ikxji presis tuq tzan token kyikꞌ tzan kykaj saq kyaqil tidiꞌ [aj at tuq tuj te jay najbꞌil Qtata Dios tzani twitz txꞌoꞌtxꞌ], aj cha jun titzbꞌalil tuq te jay tuj kaꞌj. Per kyaqil te aj at tuj kaꞌj nkaj saq tukyꞌi jun present aj mas galan twitz te jun present tzani twitz txꞌoꞌtxꞌ. 24 Komo te Aj Jaꞌ Mas Bꞌan Xjan aj jaꞌ owox Krist, te aj jayji nyaꞌtx kꞌuluꞌ tzan xjal, bꞌix nyaꞌtx cha jun titzbꞌalil te bꞌanꞌax aj at tuj kaꞌj, sinoke owoxkix tuj kaꞌj aj jaꞌ atqet tetz ajnaꞌl [nqanin] twitz te Qtata Dios qiꞌj qetz. 25 Tetz kꞌontiꞌl owox txini tzan txik tqꞌapoꞌ tibꞌx kyꞌilaꞌj-elwit, iktzaꞌ nkykꞌuluꞌ kye twitzaleꞌ pal aqꞌbꞌiaꞌ nkyeꞌox tuj te Luwar Aj Mas Bꞌan Xjan tzani twitz txꞌoꞌtxꞌ qꞌapol kyikꞌ aj nyaꞌtx tuq kchikyꞌelx. 26 Cha ikxji-wit ntons te Jesus presis tuq tzan tkamik kyꞌilaꞌj-el atx aj tbꞌantlen te twitz txꞌoꞌtxꞌ. Per ajnaꞌl tuj ja tyempni oxik tqꞌapoꞌ tibꞌ cha jun-el bꞌeyx te jun-eleꞌx, oxik tqꞌapoꞌ tibꞌ iktzaꞌ te jun present tzan tel tin kyaqil te qchoj. 27 Komo iktzaꞌx qꞌumankaj kyiꞌj kyaqil xjal, kyaqil nkyekamik cha jun-el bꞌix yaji oxeꞌl qꞌumaꞌ [tzan Qtata Dios] qa at kyil; 28 bꞌix ax ikxji te Krist cha jun-el oxik qꞌapoꞌ tzan tel tin kchoj kyꞌilaꞌj xjal bꞌix yaji tzul junkyꞌel tkaꞌmjjiꞌn-el, ya nyaꞌtx tzan tpaj te qchoj sinoke kolol te qetz aj nqoꞌiyon tiꞌj tukyꞌi jun tkꞌuꞌjlal.*