8
Te Tumeꞌl Tiꞌj Te Jesus Mas Tbꞌanil Twitz Te Tumeꞌl Kyiꞌj Kye Pal Oqtxiꞌ
1 Ntons, te aj bꞌan presis tzan tel enikyꞌ tiꞌj te aj nqoyolinni, a te ja ntzani: Qetz at jun qpal ikxji aj mas nim tajwalil kywitz kyaqil, bꞌix tetz witꞌliqet tuj twitꞌlel tuj tbꞌanqꞌabꞌ te Qtata Dios aj Twitzaleꞌ tuj kaꞌj,* 2 bꞌix tetz nꞌaqꞌunan [tuj kaꞌj] tuj aj jay tabernáculo aj jaꞌ atqet bꞌanꞌax xhchkꞌatunal te Qtata Dios, aj ajixk tetz kꞌulul tetz bꞌix nyaꞌtx kykꞌulbꞌen xjal. 3 Kyaqil kye twitzaleꞌ pal [tzani twitz txꞌoꞌtxꞌ] nkyekaj siꞌ tzan txik kyqꞌapoꞌ kyoyej kye xjal te Qtata Dios bꞌix tzan txik kyqꞌapoꞌ kye present tzan tqet najsaꞌ te kchoj kye xjal; astilji ax ikxji te [Jesus] aj qpal, ax tetz presis tzan txik tqꞌapoꞌ tidiꞌ te Qtata Dios. 4 Qa tetz tzunxwit atqet tzani twitz txꞌoꞌtxꞌ, tetz nyaꞌtx-tal pal tzan tpaj ya ateꞌ kye pal tzani aj nxik ksiꞌ te oyej te Qtata Dios iktzaꞌx tkajlen qꞌumaꞌ tzan te Kawbꞌil oqtxiꞌ. 5 Ikxji aj jaꞌ kyetz nkyeꞌaqꞌunan cha iktzaꞌ titzbꞌalil te aj at tuj kaꞌj. Komo iktzaꞌx aj oxik qꞌumaꞌ te Moisés [tzan te Qtata Dios] aj taqꞌik tzan tqet tkꞌuluꞌ te jay aj tnajbꞌil Qtata Dios tzani twitz txꞌoꞌtxꞌ, oxik tqꞌumaꞌ te Qtata Dios tetz ikxjani: “Intok asiꞌ anabꞌl, presis tzan tqet akꞌuluꞌ kyaqil iktzaꞌ aj oxik nyekꞌuꞌ yatz twiꞌ te witz.”* 6 Per ajnaꞌl te Jesus [aj twitzaleꞌ qpal], tetz oje tkꞌamoj jun topis mas bꞌan tbꞌanil kywitz kye txqꞌanky pal, tzan tpaj tetz opoyonkix kyaqil tiꞌj te tumeꞌl akꞌaꞌj aj mas bꞌan tbꞌanil aj oxik tsiꞌ te Qtata Dios tyol tiꞌj. Komo te galan aj nꞌel tiꞌj te tumeꞌl akꞌaꞌj mas tbꞌanil twitz te aj owel tiꞌj te tumeꞌl oqtxiꞌ. 7 Cha kabal-wit te tumeꞌl aj oxik tsiꞌ te Qtata Dios tyol tiꞌj tbꞌay-el, nyaꞌtx-tal presis te junky. 8 Komo tzan tpaj owel tuj twitz te Qtata Dios nyaꞌtx galan nkyekꞌulun tuq kye xjal, astilji okaj tzꞌibꞌaꞌ oqtxiꞌ ikxjani: “Te Tajaw Tiꞌj Kyaqil nxik tqꞌumaꞌ, “Tzul jun qꞌij oxeꞌl nsiꞌ nyol tiꞌj junky tumeꞌl akꞌaꞌj kyukyꞌi kye aj tijajil Israel bꞌix kye aj tijajil Juda. 9 Te tumeꞌl aj okajel nsiꞌ kyukyꞌiꞌl nyaꞌtx iktzaꞌ te tumeꞌl aj okaj nsiꞌ kyukyꞌi kye kyijajil oqtxiꞌ aj kyetz win kyebꞌaꞌ tuj te amaqꞌ Ejipt; komo kyetz oqtxiꞌ okaj kykolaꞌ te tumeꞌl aj okaj nsiꞌ, astilji wetz ekaj nkolaꞌ,” kyi te Qajawil ikxjani. 10 “Astilji, te tumeꞌl akꞌaꞌj aj okajel nsiꞌ kyukyꞌi kye aj Israel oj tponbꞌaj aj tyempji, a te ja ntzani,” kyi te Qajawil ikxjani. “Oxeꞌl nsiꞌ Nkawbꞌil tuj kywiꞌ bꞌix onkꞌuluꞌtz tzan tkaj tuj kyanim, bꞌix wetz okyinꞌokel te Dios aj otzajel kynaꞌoꞌ bꞌix kyetz okyeꞌokel kye nxjalil. 11 Ya nlay tzꞌok presis tzan txik kxnaqꞌtzaꞌ te junky abꞌl kyetz ikxjani: ‘Intok awotzqilaꞌ te Qajawil.’ Komo kkyaqil okyinꞌokel kyotzqilaꞌ, kyaqil kye kꞌwaꞌl bꞌix kyaqil kye tijxjal. 12 Wetz oqtel nnajsaꞌ kyaqil aj nyaꞌtx galan nkykꞌuluꞌ bꞌix nlay tzaj nnaꞌoꞌ chꞌinwt te kchoj,”” kyi te Qajawil ikxjani.* 13 Ntons aj txik tqꞌumaꞌ te Qtata Dios tzan tkaj tiꞌj “junky tumeꞌl akꞌaꞌj,” ikxji te aj tbꞌay oje tzꞌok qꞌanq, bꞌix chꞌinky tponaj.