7
Te Qajaw Jesukrist A Te Qpal Bꞌeyx Te Jun-eleꞌx
1 Komo te Melkisedek tetz te twitzaleꞌ kꞌulul mandad tuq tuj te amaqꞌ Salem, bꞌix tetz ax Pal aj nꞌaqꞌunan tuq te Qtata Dios. Te Abran, aj ojetq tuq kyeqet titzaꞌ txqꞌan kꞌulul mandad,a tetz aj tmeltzꞌjik tuj tamaqꞌ, te Melkisedek owetz kanol tetz bꞌix oqet tkyꞌiwlaꞌ. 2 Te Abran tetz oxik toyeꞌ te Melkisedek te tlajujiꞌ part tiꞌj kyaqil aj ojetq tuq tzaj tkambꞌaꞌ tuj te qꞌoj. Te ja Melkisedekni, tetz tbꞌi kabꞌeꞌ telponx; tbꞌay telponx “te twitzaleꞌ kꞌulul mandad aj nkꞌulun kyaqil tuj tumeꞌl,” bꞌix [komo tetz tamaqꞌ tbꞌi Salem aj telponx “jaꞌ kꞌontiꞌl qꞌoj,” astilji tetz tbꞌi ax telponx] “te twitzaleꞌ joyol tumeꞌl tzan tmankun te qꞌoj.” 3 Tiꞌj tnan bꞌix tiꞌj stat bꞌix kyiꞌj tijajil te Melkisedek, kꞌontiꞌl qebꞌen chꞌinwt, bꞌix ax kꞌontiꞌl qebꞌen janikꞌle owitzꞌjik bꞌix janikꞌle okamik, bꞌix ikxji tetz iktzaꞌx te Tkꞌwaꞌal Dios tzan tpaj jun pal aj te jun-eleꞌx. 4 Intok esiꞌ enabꞌl tiꞌj te Melkisedek: Tetz jun xjal nim tajwalil tuq, astilji ax te Abran aj qijajil, tetz oxik toyeꞌ te tlajujiꞌ part tiꞌj kyaqil aj otzaj tkambꞌaꞌ. 5 Iktzaꞌx nyolin te Kawbꞌil, kye pal aj tijajil Lewi at kyoklen tzan kykꞌamon kyiꞌj kye xjal te tlajujiꞌ part tiꞌj kyaqil iktzaꞌx nyolin te Kawbꞌil,* anke ax kyetz aꞌeꞌ tijajil Abran. 6 Per te [Melkisedek], anke tetz nyaꞌtx tuq jun tijajil Lewi, tetz otkꞌamoj te jun lajuj part tukyꞌi Abran bꞌix oqet tkyꞌiwlaꞌ te Abran, axkix te Abran aj te Qtata Dios oxik tsiꞌ tyol tukyꞌiꞌl. 7 Qetz qebꞌenky jun aj nkyꞌiwlan a te mas nim tajwalil twitz te aj nkꞌamon te kyꞌiwlbꞌil.
8 Ntons tzani twitz ja txꞌoꞌtxꞌni kye [pal] aj nkyekꞌamon te tlajujiꞌ part, kyetz xjal-eꞌ bꞌix nkyekamik, yatzun [tiꞌj te Melkisedek nyaꞌtx ikxji tzan tpaj] tetz iktzaꞌ tzunx itzꞌoj ajnaꞌl. 9 Ax bꞌaꞌn tzan txik jqꞌumaꞌ, komo te Lewi tzi owel tijajil tiꞌj te Abran, ntons aj txik xhchojoꞌ te Abran te tlajujiꞌ part, ax kye tijajil Lewi mas yaj, ax oxik kchojoꞌ te jun lajuj part aj txik xhchojoꞌ te Abran [tukyꞌi Melkisedek]. 10 Komo te tijajil te Lewi atqet tuq tuj xhchiꞌjel te xhchman Abran aj tetz te Melkisedek kanol tetz.
11 Ntons cha tzan kypaj-wit kye pal aj tijajil Lewi bꞌaꞌn-wit tzan tkaj saq qanim bꞌeyx te jun-eleꞌx, (komo tuj kykwent kyetz okaj siꞌ te Kawbꞌil kxol kye xjal), ikxji nyaꞌtx-tal presis te junky pal aj iktzaꞌ te Melkisedek bꞌix aj nyaꞌtx iktzaꞌ tijajil Aron [aj tijajil Lewi]. 12 Komo oj tkyꞌixpjik te tumelil kyiꞌj kye pal, ax presiskix tzan tkyꞌixpjik te tumelil tiꞌj te Kawbꞌil. 13 Bꞌix te ja pal aj nqoyolin tiꞌjni [osey te Jesus], kyaqil okyꞌixpjik tiꞌj tzan tpaj tetz tijajil junky bꞌuchꞌuj xjal [aj nyaꞌtx tijajil Lewi], bꞌix kxol kye aj tijajil, nijunwt kyetz oje kyeꞌok pal jun-el tzan kyaqꞌunan twiꞌ te tzꞌeꞌsbꞌil. 14 Qetz qebꞌen te Qajaw Jesus tzajnaq tiꞌj tijajil Juda, bꞌix te Kawbꞌil aj okaj stzꞌibꞌaꞌ Moisés kꞌontiꞌl nyolin tiꞌj aj bꞌuchꞌuj xjalji tzan kyok-wit pal. 15 Bꞌix nꞌok eꞌeꞌ mas byenech tiꞌj te ntzani tzan tpaj [te Jesus aj] te junky pal nyaꞌtx iktzaꞌ kye txqꞌanky pal [aj tijajil Lewi] sinoke iktzaꞌ te Melkisedek. 16 Bꞌix astilji, tetz kꞌontiꞌl owok pal cha tzan tpaj-wit te tijajil iktzaꞌ nyolin te Kawbꞌil, sinoke tzan tpaj jun tanqꞌin aj kꞌontiꞌl nponaj. 17 Komo tiꞌj tetz nyolin [te Tuꞌjal Dios] ikxjani: “Yatz aꞌich te pal bꞌeyx te jun-eleꞌx iktzaꞌx te Melkisedek.”* 18 Ntons te Kawbꞌil aj okaj qꞌumaꞌ tbꞌayaꞌ, tetzji oponaj tzan tpaj ya kꞌontiꞌlky tuq tbalor bꞌix ya kꞌontiꞌlky tuq token, 19 tzan tpaj kꞌontiꞌl obꞌantik titzaꞌ tzan tkaj saq qanim bꞌeyx te jun-eleꞌx twitz Qtata Dios. Per yatzun ajnaꞌl tzan te junky tumeꞌl akꞌaꞌj bꞌaꞌn tzan tkaj loꞌet jkꞌuꞌj tiꞌj Qtata Dios [tzan tkaj saq qanim tuj twitz] bꞌix ikxji bꞌaꞌn tzan qok laqꞌchet tiꞌj. 20 Te Qtata Dios oxik tsiꞌ tyol tzan stzaj tsiꞌ [te Jesus iktzaꞌ] junky qpal, per yatzun kyiꞌj kye txqꞌanky pal kꞌontiꞌl oxik tsiꞌ tyol kyiꞌj ikxji. 21 Komo kye txqꞌanky pal kꞌontiꞌl ekaj siꞌ tuj kyopis tzan tpaj-wit te Qtata Dios oxik tsiꞌ tyol kyiꞌj, per yatzun [tiꞌj te Jesus] nyolin ikxjani: “Oje xik tsiꞌ te Qtata Dios tyol ikxjani bꞌix nlay kyꞌixpjik: “Yatz aꞌich te pal bꞌeyx te jun-eleꞌx.””* 22 Astilji tzan tpaj te Jesus opoyonkix kyaqil te tumeꞌl akꞌaꞌj aj mas at token te qetz [twitz te aj oqtxiꞌ]. 23 Kye txqꞌanky pal tbꞌayaꞌ, kyetz presis tuq bꞌan kyꞌilaꞌj kybꞌet tzan tpaj nkyekamik tuq, kꞌontiꞌl obꞌantik tzan kykaj pal bꞌeyx te jun-eleꞌx. 24 Per yatzun te Jesus tzan tpaj tetz kꞌontiꞌl nkamik, te tajwalil iktzaꞌ pal kꞌontiꞌl nkyꞌik te junky. 25 Astilji bꞌaꞌn tzan tkolon bꞌeyx te jun-eleꞌx qiꞌj qetz aj nqoꞌok laqꞌchet tiꞌj te Qtat tzan tpaj tetz. Komo tetz itzꞌoj bꞌeyx te jun-eleꞌx bꞌix nxnaqꞌtzan twitz te Qtata Dios qiꞌj qetz.
26 Ntons te Jesus, aji tetz te twitzaleꞌ pal aj presis te qetz. Komo aji pawaꞌ aꞌox te Qtata Dios bꞌix kꞌontiꞌl xhchoj, bꞌix nichꞌinwt nyaꞌtx galan tiꞌj, bꞌix owel pawaꞌ kyiꞌj kye chimol choj bꞌix a tetz oqet jiqꞌbꞌaꞌ tuj kaꞌj mas twitz kyaqil. 27 Bꞌix tetz nyaꞌtx iktzaꞌ kye txqꞌanky pal aj bꞌajqꞌij presis tuq tzan txik kyqꞌapoꞌ kypresent twiꞌ tzꞌeꞌsbꞌil, tbꞌay tzan tpaj kyetz kchojx bꞌix yaji tzan tpaj kchoj kye xjal, sinoke axk tetz oxik tqꞌapoꞌ tibꞌx te present cha jun-el bꞌix bꞌeyx te jun-eleꞌx.* 28 Te Kawbꞌil aj okaj tsiꞌ te Moisés ntkꞌuluꞌ tzan kykaj tsiꞌ kye pal aj mas nim kyajwalil, per kyetz ax xjal-eꞌ aj at kchoj. Per yatzun te aj oxik tsiꞌ te Qtata Dios tyol tiꞌj mas yaj twitz te Kawbꞌil, tetzji Tkꞌwaꞌal Qtata Dios bꞌix bꞌan chꞌinwt nyaꞌtx galan tiꞌj, bꞌix a tetz [te qpal aj mas nim tajwalil twitz kyaqil] bꞌeyx te jun-eleꞌx.