6
1 Astilji, ya qebꞌenky te aj okaj xnaqꞌtzaꞌ tiꞌj te Krist, ajnaꞌl intok qsiꞌ jkꞌuꞌj tzan tel qnikyꞌ mas, nyaꞌtx aꞌox qokaj tiꞌj chꞌimuꞌs aj qebꞌen, sinoke qobꞌaj-ok mas jwert. Kꞌontiꞌl tzan qyolin cha aꞌox tiꞌj te aj ntzaj xnaqꞌtzaꞌ qetz tbꞌay aj man txiklen qokslaꞌ, iktzaꞌ ntzani: titzaꞌ tzan tjaw qkyꞌixpuꞌ qnabꞌlin tiꞌj jkꞌulbꞌen oqtxiꞌ aj kꞌontiꞌl token, qatzun tiꞌj titzaꞌ tzan tok qwitꞌbꞌaꞌ jkꞌuꞌj tiꞌj Qtata Dios, 2 qatzun tiꞌj te tjawlen siꞌ aꞌ qwiꞌ,a qatzun tiꞌj te tqetlen siꞌlet kyqꞌabꞌ kye tijxjal qajsik, qatzun tiꞌj titzaꞌ okyejawel anqꞌin kye kamnaq, qatzun tiꞌj titzaꞌ [kye aj kꞌontiꞌl nkyeꞌokslan] okyexeꞌl siꞌ tuj il bꞌeyx te jun-eleꞌx. 3 Ntons intok qsiꞌ jkꞌuꞌj tzan tox tuj qwiꞌ mas twitz kyaqil aj nini komo ikxji tgan te Qtata Dios. 4 Komo kye aj otzaj siꞌ jun-el jun chkꞌatunal tuj kywitz bꞌix owok kyen titzaꞌ bꞌan tbꞌanil galan nabꞌlin te Qtata Dios kyukyꞌiꞌl bꞌix okykꞌamoj te Txew Dios tuj kyanim 5 bꞌix owok kyen titzaꞌ bꞌan tbꞌanil te tyol Qtata Dios, bꞌix titzaꞌ bꞌan nim tajwalil tzan tkꞌulun kyaqil aj okyꞌel mas yaj twitz ja txꞌoꞌtxꞌni, 6 qa kyetz okajel kykolaꞌ tzan kyokslan, ya nlay bꞌantik tzan tjaw kkyꞌixpuꞌ kynabꞌlin junkyꞌel, tzan tpaj ikxji iktzaꞌ cha nꞌok kyklabiꞌ junkyꞌel te Jesus twitz krus bꞌix cha nꞌel kyin tkyꞌexaw kywitz kye xjal. 7 Komo iktzaꞌx jun txꞌoꞌtxꞌ aj nxik tukꞌaꞌ te jabꞌ aj nqet tajsik, bꞌix nkaj tsiꞌ jun tawal galan kye aj nqet aqꞌunan tetz, ikxji te txꞌoꞌtxꞌ kyꞌiwlaꞌ tzan te Qtata Dios; 8 yatzun te junky txꞌoꞌtxꞌ aj nswan jun tawal pur kyꞌiꞌx bꞌix kꞌontiꞌl token chꞌinwt, ntzaj qanbꞌeꞌ tajsik bꞌix yaji nꞌok siꞌlet tqꞌaqꞌal. [Ntons ax ikxji kyiꞌj kye aj nkaj ksiꞌ tzan kyokslan.]
Kꞌon Kaj Qsiꞌ Tzan Tok Qwitꞌbꞌaꞌ Jkꞌuꞌj Tiꞌj Qtata Dios Tzan Jkꞌamon Te Aj Oje Xik Tsiꞌ Tyol Tiꞌj
9 Per yatzun etiꞌj etetz erman, etetz aj ganimix nim witzaꞌ, wetz tuj nnabꞌl owelal kyaqil galan etukyꞌiꞌl bꞌix webꞌen etetz kolomix aꞌix. 10 Komo te Qtata Dios nlay kꞌulun jun nyaꞌtx galan etukyꞌiꞌl, nlay tzꞌajnaj tiꞌj tkꞌuꞌj kyaqil aj galan oje qet ekꞌuluꞌ tzan tpaj nqet eganiꞌ te tetz bꞌix titzaꞌ oje kxꞌonen kyukyꞌi kye qermanb bꞌix titzaꞌ tzunx nkxꞌonen kyukyꞌiꞌl ajnaꞌl. 11 Qetza qgana tzan txik jqꞌumaꞌ etetz ekyaqil tzan kꞌon kaj esiꞌ tzan ebꞌet axkix tukyꞌi jun tkꞌuꞌjlalji, tzan eten bꞌan sewur atix titzaꞌ witꞌlik ekꞌuꞌj, max oj tponbꞌaj kyaqil. 12 Ikxji tzan kꞌon etok kyꞌaj sinoke tzan ebꞌet iktzaꞌ kye aj witꞌlik kykꞌuꞌj tiꞌj te Qtata Dios bꞌix at nim kypasens tzan kykꞌamon te aj oje xik tsiꞌ tyol te Qtata Dios tiꞌj. 13 Komo aj txik tsiꞌ tyol te Qtata Dios tukyꞌi Abran, oxik tsiꞌ tjurament tiꞌjx tetz tzan tpaj kꞌontiꞌl tuq junky abꞌl mas nim tajwalil twitz tetz tzan txik tsiꞌ tjurament tiꞌj. 14 Komo oxik tqꞌumaꞌ ikxjani: “Bꞌanꞌax wetz ochtel nkyꞌiwlaꞌ nim bꞌix ax nkꞌuluꞌtz tzan kypuqun bꞌan kyꞌilaꞌj kye awijajil.”* 15 Ntons, te [Abran] otiyoj tukyꞌi nim tpasens [tiꞌj te aj oxik tsiꞌ te Qtata Dios tyol tiꞌj], bꞌix ikxji otkꞌamoj te aj ojetq tuq xik qꞌumaꞌ tetz. 16 Kye xjal oj txik ksiꞌ kyjurament, nxik ksiꞌ tiꞌj jun xjal aj mas nim tajwalil kywitz kyetz, bꞌix tzan tpaj te kyjurament nlay bꞌantik tzan kyjaw meltzꞌjik. 17 Astilji, komo te Qtata Dios tgan tuq tzan tqet tyekꞌuꞌ byenech kyukyꞌi kye aj jaꞌ oxik tsiꞌ tyol, tetz nlay tuq jaw tkyꞌixpuꞌ chꞌinwt tiꞌj te tyolbꞌen. Astilji ax oxik tsiꞌ tjurament, 18 bꞌix ikxji, ateꞌ kabꞌeꞌ tumeꞌl aj telponx nlay bꞌantik tzan tkyꞌixpjik tyol bꞌix tetz kꞌontiꞌl nnikꞌon. Ikxji qetz, aj oje kaj jqꞌapoꞌ qibꞌ tuj tqꞌabꞌ tzan tkolon qiꞌj, bꞌaꞌn tzan tnimsan jkꞌuꞌj byenech tiꞌj te aj jaꞌ oje kaj loꞌet jkꞌuꞌj aj otzajel siꞌ qetz. 19 Tzan tpaj te nini, kꞌontiꞌl nnaꞌnon qanim bꞌix nswan jun qbalor tuj qanim iktzaꞌ tqꞌaꞌel jun bark aj nꞌoken tzan kꞌon tyakꞌun te bark, bꞌan tzinun atqet; bꞌix ikxji qetz loꞌik jkꞌuꞌj tiꞌj [Jesus aj owox] tujx te pawbꞌil [aj jaꞌ atqet te Qtata Dios tuj kaꞌj].* 20 Aj jaꞌ te Jesus oje tzꞌox tbꞌay qwitz [tzan qpon qetz tukyꞌi Qtata Dios], ikxji tetz owok twitzaleꞌ pal bꞌeyx te jun-eleꞌx iktzaꞌx tuq te Melkisedek.*