Te Tbꞌay Uꞌj Stzꞌibꞌen Xhpeꞌy
1
Jun Limbꞌil
1 Wetz Xhpeꞌy* aj tkyꞌixel Qajaw Jesukrist aꞌin, jun limbꞌil te etetz aj joyomix tzan Qtata Dios, aj oje kxik slabꞌjik jaꞌchq,* aj cha oqxenaꞌ etibꞌ aj nkxnajan tuj Pont, Galasy, Kapadosy, Asy bꞌix Bitiny. 2 Etetz aꞌix joyomix tzan tpaj te Qtata Dios oqet tbꞌisuꞌ ikxji, bꞌix te Txew Dios okxkaj tpawaꞌ aꞌox te Qtat, tzan tqet etokslaꞌ te Jesukrist bꞌix tzan tkaj saq etanim tzan te [tkamiky aj telen] xhchikyꞌel. Tzaj siꞌxwit etajsik etetz jun nim bꞌan galan bꞌix qetxwit chewsaꞌ ekꞌuꞌj.
Tzan Tpaj Te Jesukrist, Bꞌaꞌn Tzan Qchalaj Oj Qojaw Lajoꞌ
3 Pixon te Qtata Dios, aj stat te Qajaw Jesukrist, tzan tpaj bꞌan nim nloꞌet tkꞌuꞌj qiꞌj bꞌix tjawlen tanqꞌinsaꞌ te Jesukrist kxol kye kamnaq. Tetz otkꞌuluj tzan qitzꞌjik junkyꞌel tuj qanim* bꞌix ikxji tzan tkaj loꞌet jkꞌuꞌj tiꞌj tukyꞌi jun chalajbꞌil. 4 Otkꞌuluj tzan ekꞌamon jun etanqꞌin tuj kaꞌj aj bꞌisuꞌ titzaꞌ, aj nlay bꞌantik tzan tpon najsaꞌ tzan nijunwt bꞌix nlay bꞌantik tzan tok-wit chꞌin tzꞌil tiꞌj bꞌix nlay bꞌantik tzan tponaj kyebꞌaꞌ, bꞌix te ja etanqꞌinni koloꞌ te etetz tuj kaꞌj. 5 Tzan tpaj witꞌlik ekꞌuꞌj tiꞌj Qtata Dios, tetz nkxqet tkoloꞌ tukyꞌi nim tajwalil tzan ekolet titzaꞌ tuj te jwisy, bꞌix nꞌiyon etiꞌj te aj otzajel tsiꞌ etetz tuj aj qꞌijji. 6 Tzan tpaj nini, etetz bꞌan nkxchalaj, anke ajnaꞌl tuj jun tyemp nyaꞌtx nim tuj, a tgan tzan tok eten twitz tidiꞌchq txakl xhchoꞌnal. 7 Te xhchoꞌnal nꞌoken tzan tok en qa bꞌanꞌax witꞌlik jkꞌuꞌj tiꞌj Qtata Dios. Komo titzaꞌ witꞌlik jkꞌuꞌj mas nim token twitz te oro aj nponaj anke ojetq qex txikoꞌ tuj jun qꞌaqꞌ tzan tok en qa bꞌanꞌax oro. Bꞌix chaꞌoj tul te Jesukrist junkyꞌel, ntons iktzaꞌx maꞌtx tzꞌok en bꞌanꞌax witꞌlik jkꞌuꞌj tiꞌj Qtata Dios, owelal te jun nim chalajsbꞌil bꞌix owokel eꞌeꞌ jun chqitzꞌunal Qtata Dios qiꞌj bꞌix owelal te jun jiqꞌbꞌil [qetz tukyꞌiꞌl]. 8 Etetz nqet eganiꞌ nim te tetz anke minaꞌ tok eten, bꞌix nkxꞌokslan tiꞌj anke minaꞌ tok eten,* bꞌix bꞌan nkxchalaj nim tukyꞌi jun chalajbꞌil aj tzajnaq tuj kaꞌj bꞌix kꞌontiꞌl nꞌoknoj qyol tzan txik jqꞌumaꞌ tiꞌj. 9 Bꞌix ikxji te etanim nkolet, aj nini te aj nꞌekꞌamoꞌ tzan tpaj toklen witꞌlet ekꞌuꞌj tiꞌj Jesukrist.
10 Atx bꞌan oqtxiꞌ, kye aj yolil tyol Dios nqet tuq kxnaqꞌtzaꞌ bꞌix nkyejoyon nkyebꞌisun tuq tiꞌj ja tumeꞌl titzaꞌ nqokoletni, ja nim bꞌan galan aj ntzaj tsiꞌ Qtata Dios anke kꞌontiꞌl nqajoꞌ, bꞌix ebꞌajpakbꞌan tiꞌj te aj otzajel tsiꞌ te Qtata Dios qetz. 11 Kyetz nkyejoyon abꞌl tuq te xjal, bꞌix alkyetz tyemp, aj ntqꞌumaꞌ tuq te Txew Krist aj nyolin tuq tuj kyanim tiꞌj te xhchoꞌnal aj okyꞌel tuq tiꞌj Krist, bꞌix titzaꞌ otzajel siꞌ jun xhchqitzꞌunal mas yajx. 12 Per oxik qꞌumaꞌ te kyetz, kꞌontiꞌl nkyeꞌaqꞌunan tuq te kyetzx tuj aj tyempji, sinoke te jun galan tuq te qetz ajnaꞌl. [Bꞌix ajnaꞌl oje ponkixiꞌ kyetz ktzꞌibꞌen] bꞌix maꞌtx xik pakbꞌaꞌ te etetz tzan kye pakbꞌon aj oxik kypakbꞌaꞌ tukyꞌi tajwalil te Txew Dios aj otzaj lajoꞌ tuj kaꞌj. Kyaqil ja bꞌan tbꞌanilni, ax kye ángel kygan tzan tok kyen.
A Tgan Tzan Kꞌon Qjoyon Choj
13 Ntons, astilji peꞌeten waq list tukyꞌi enabꞌl tuj ewiꞌ, peꞌekꞌulun mandad etibꞌx tzan ebꞌet tuj tumeꞌl, bꞌix intkaj loꞌet ekꞌuꞌj tiꞌj te aj nim bꞌan galan aj otzajel siꞌ qetz oj tul Jesukrist. 14 Etetz, iktzaꞌ kꞌwaꞌl okslon aꞌix, kꞌon kxꞌanqꞌin tuj te nyaꞌtx galan aj nꞌel tuq eganiꞌ aj minaꞌ tuq tok etotzqilaꞌ [te Qtata Dios], 15 sinoke iktzaꞌx te aj otzaj ukꞌlen te etetz pawaꞌ tibꞌ tiꞌj te nyaꞌtx galan, ax intel epawaꞌ etetz etibꞌ tiꞌj te nyaꞌtx galan tuj kyaqil etanqꞌin 16 tzan tpaj tzꞌibꞌankaj [tuj Tyol Dios] ikxjani: “Intel epawaꞌ etetz etibꞌ tiꞌj te nyaꞌtx galan tzan tpaj wetz pawaꞌ wibꞌ tiꞌj te nyaꞌtx galan.”*
17 Qa etetz nꞌok eqꞌumaꞌ “Qtat” te Qtata Dios aj nkyexik tpoqoꞌ xjal iktzaꞌx ojetq kykꞌuluj, bꞌix kꞌontiꞌl nkaj alkawet tiꞌj nijunwt, ntons intqet exjaniꞌ tuj kyaqil tyemp aj itzꞌojix twitz ja txꞌoꞌtxꞌni. 18 Komo etetz etebꞌen te Qtata Dios okxjatz tkolpiꞌ tuj kyaqil aj nyaꞌtx galan aj owel etin kyiꞌj etijajil oqtxiꞌ. Bꞌix etebꞌen te echoj kꞌontiꞌl owel xhchojoꞌ tukyꞌi tidiꞌchq aj nmankun, iktzaꞌ te oro bꞌix te xtxꞌotxꞌal plat, 19 sinoke tukyꞌi [tkamiky aj telen] xhchikyꞌel te Qajaw Jesukrist aj at nim token. Komo tetz owok te present naqe jun tal moch [aj nxik qꞌapoꞌ te jun present bꞌix] nyaꞌtx yajnaq, chꞌinwt tidiꞌ nyaꞌtx galan tiꞌj. 20 Te Qajaw Jesukrist, atx aj minaꞌ tuq tqet kꞌuluꞌ te twitz txꞌoꞌtxꞌ, tetz ojetqkix tuq kaj siꞌ tzan token ikxji, per man ajnaꞌl oje tzaj lajoꞌ tzani twitz txꞌoꞌtxꞌ te jun galan te qetz. 21 Tzan tpaj te Qajaw Jesukrist, etetz nkxꞌokslan tiꞌj te Qtata Dios aj ojaw anqꞌinsan tetz bꞌix oqet tjiqꞌbꞌaꞌ; astilji nꞌok witꞌlet ekꞌuꞌj tiꞌj Qtata Dios bꞌix nkaj loꞌet ekꞌuꞌj tiꞌj. 22 Oje kaj saq etanim tzan tpaj tqetlen etokslaꞌ te tumeꞌl tzan kyqet eganiꞌ bꞌanꞌax kye txqꞌanky qerman. Ajnaꞌl intqet eganiꞌ etibꞌx exolx per tukyꞌi jun tumeꞌl bꞌan galan tuj etanim. 23 Etetz ajnaꞌl oje kxꞌitzꞌjik junkyꞌel tuj etanim,* per nyaꞌtx tzan tpaj jun tidiꞌ aj opoyonaj-wit sinoke tzan tpaj te tyol Qtata Dios aj nlay ponaj, tetz tyol aj bꞌaꞌn tzan tyolin tuj qanim te jun qanqꞌin bꞌix kꞌontiꞌl nponaj. 24 Komo te Tuꞌjal Qtata Dios nyolin ikxjani: Kyaqil xjal mer iktzaꞌ kꞌul bꞌix kyaqil aj tidiꞌchq tbꞌanil te kyetz mer iktzaꞌ txmakal kꞌul. Te kꞌul njaw kyꞌixwik bꞌix te txmakal ntzaj pulan. 25 Per te tyol Qajaw nlay ponaj. Bꞌix te ja yol ntzani a te tpakbꞌalil titzaꞌ tzan jkolet bꞌix te ntzani aj oje xik pakbꞌaꞌ te etetz.*