Te Tkabꞌiꞌ Uꞌj Stzꞌibꞌen Xhpeꞌy
1
Jun Limbꞌil
1 Wetz aꞌin Simon Xhpeꞌy,* qꞌapoꞌ wibꞌ nkyinꞌaqꞌunan te Jesukrist bꞌix aꞌin jun tkyꞌixel tetz. Wetz nqet ntzꞌibꞌaꞌ ja uꞌjni te etetz aj witꞌlik ekꞌuꞌj iktzaꞌ qetza tzan tpaj tkꞌulbꞌen te Jesukrist, aj Dios ntzaj qnaꞌoꞌ bꞌix a tetz te Koloyon qiꞌj.* 2 Nimxwit bꞌan galan tzaj siꞌ etajsik etetz bꞌix qet chewsaꞌxwit ekꞌuꞌj bꞌan byenech tzan tpaj oje tzꞌok etotzqilaꞌ byenech te Qtata Dios bꞌix te Qajaw Jesukrist.
Tzan Tpaj Te Aj Oje Tzaj Tsiꞌ Te Qtata Dios Qetz, Bꞌaꞌn Tzan Qbꞌet Tuj Tumeꞌl
3 Ntons, tzan tpaj tajwalil [te Qtata Dios], oje tzaj tsiꞌ qetz kyaqil aj nꞌoken tzan qanqꞌin bꞌix tzan qbꞌet tuj tumeꞌl tuj twitz, tzan tpaj toklen qotzqilaꞌ tetz aj otzaj ukꞌlen te qetz tzan tpaj xhchqitzꞌunal bꞌix tzan tpaj nbꞌantik kyaqil bꞌan tumeꞌl titzaꞌ. 4 Ntons ikxji, oje tzaj tsiꞌ te tyol aj tbꞌanil bꞌix nim token; bꞌix ikxji bꞌaꞌn tzan tok qotzqilaꞌ bꞌix tzan tok qen te tetz, bꞌix tzan tkaj jkolaꞌ kyaqil te nyaꞌtx galan twitz ja txꞌoꞌtxꞌni iktzaꞌ aj nꞌel kyganiꞌ kye xjal. 5 Bꞌix tzan tpaj te nini, bꞌix tzan tpaj maꞌtx tzꞌok ewitꞌbꞌaꞌ ekꞌuꞌj [tiꞌj Jesus], ax intok esiꞌ ekꞌuꞌj tzan ebꞌet tuj jun tumeꞌl bꞌan galan kxol kye xjal iktzaꞌ nqet tuj twitz te Qtata Dios. Bꞌix tiꞌj te tumeꞌl titzaꞌ nkxbꞌet kxol kye xjal, ax a tgan tzan tok etotzqilaꞌ [mas te Qtata Dios]. 6 Bꞌix tiꞌj te tumeꞌl titzaꞌ nꞌok etotzqilaꞌ te Qtata Dios, ax a tgan tzan ekꞌulun mandad etibꞌx tzan kꞌon ekꞌulun aj nyaꞌtx galan iktzaꞌ ntqaniꞌ te echiꞌjel.* Bꞌix tiꞌj te tumeꞌl titzaꞌ nkxkꞌulun mandad etibꞌx, ax a tgan tzan tok esiꞌ ekꞌuꞌj tzan kꞌon kaj eswaꞌ tzan ekꞌulun galan chaꞌoj tul te preb.* Bꞌix tiꞌj te tumeꞌl titzaꞌ nkxꞌipan te preb, ax a tgan tzan ebꞌet nkxjanin te Qtata Dios. 7 Bꞌix tiꞌj te tumeꞌl titzaꞌ nkxjanin te Qtata Dios, ax a tgan tzan tqet eganiꞌ etibꞌ exolx iktzaꞌ eterman etibꞌ. Bꞌix tiꞌj te tumeꞌl titzaꞌ nqet eganiꞌ etibꞌx, ax a tgan tzan kyqet eganiꞌ kyaqil kye txqꞌanky. 8 Qa nkxkꞌulun ikxji ajnaꞌl mas twitz oqtxiꞌ, ntons nlay kxqet en iktzaꞌ chꞌinwt tidiꞌ nꞌekꞌuluꞌ, sinoke okxꞌokel en nkxkꞌulun tidiꞌchq bꞌan galan tzan tpaj toklen etotzqilaꞌ byenech te Qajaw Jesukrist. 9 Yatzun abꞌl aj kꞌontiꞌl nkꞌulun ikxji, tetz moy,* kꞌontiꞌl nꞌok ten te aj oje kyꞌik tiꞌj, bꞌix oje tzꞌajnaj tiꞌj tkꞌuꞌj qa owel in te xhchoj tbꞌay. 10 Astilji waq erman, intok esiꞌ ekꞌuꞌj tzan eten bꞌan jwert tiꞌj etzajlen ukꞌleꞌ bꞌix tiꞌj etelen joyoꞌ. Komo qa etetz oqtel ekꞌuluꞌ kyaqil ntzani, nlay kxqet tzꞌaqik, 11 bꞌix ikxji te Qajaw Jesukrist aj koloyon qiꞌj, okxtkꞌamoꞌtz tukyꞌi jun tkꞌuꞌjlal tzan eten tukyꞌiꞌl tuj kaꞌj aj jaꞌ nkꞌulun mandad te jun-eleꞌx.
Te Xhpeꞌy Nyolin Tistil Oqet Stzꞌibꞌaꞌ Ja Uꞌj Ntzani
12 Astilji, wetz otzajelkix nnaꞌoꞌ tuj etanim kyaqil ntzani, anke etetz ya etebꞌenky bꞌix nqet ekꞌuluꞌ byenech iktzaꞌ aj oje xik xnaqꞌtzaꞌ etetz tiꞌj te bꞌanꞌax aj atqex tuj etanim. 13 Man atin twitz ja txꞌoꞌtxꞌni,a wetz tuj nnabꞌl tumeꞌl tzan stzaj nnaꞌoꞌ tuj etanim ja konsej etetzni. 14 Komo te Qajaw Jesukrist oje tzaj tqꞌumaꞌ wetz, chꞌinky tpon or wetz [tzan nkamik] tzan tkaj nsiꞌ ja nchiꞌjelni. 15 Wetz owokel nsiꞌ nkꞌuꞌj tzan stzaj nnaꞌoꞌ tuj etanim kyaqil ntzani tzan kꞌon taj naj tiꞌj ekꞌuꞌj, bꞌix anke ojetq kyinkamik, bꞌaꞌn tzan stzaj enaꞌoꞌ.
Te Tpakbꞌalil Nyaꞌtx Cha Tuj Qwiꞌx Nꞌetz
16 Komo te aj oxik qxnaqꞌtzaꞌna etetz tiꞌj tajwalil te Qajaw Jesukrist bꞌix tiꞌj titzaꞌ tuq tetz omeltzꞌjelky, nyaꞌtx cha ojaw bꞌantik qitzaꞌna tukyꞌi jun qlistulna, sinoke bꞌanꞌax tzan tpaj owok qena tukyꞌi kykabꞌil qwitz te tajwalil. 17 Komo te Qtata Dios aj mas nim tajwalil kywitz kyaqil, tetz oqet tjiqꞌbꞌaꞌ [te Qajaw Jesukrist] bꞌix otzaj tyekꞌuꞌ xhchqitzꞌunal aj txik tqꞌumaꞌ ikxjani: “Aj ntzani te nkꞌwaꞌal aj ganiꞌ nim witzaꞌ bꞌix nkyinchalaj tiꞌj.” 18 Qetza aj aqoqet tuq tukyꞌiꞌl twiꞌ te witz aj jaꞌ otzaj yolin te Qtata Dios aj tuj kaꞌj,* qetza aꞌoꞌxkna oxik chaꞌon aj stzaj tyoliꞌ ikxji. 19 Astilji ajnaꞌl oje tzꞌok eꞌelet bꞌanꞌax te aj okyqꞌumaj kye aj yolil tyol Dios oqtxiꞌ. Bꞌix a tgan tzan tok esiꞌ ekꞌuꞌj tiꞌj te aj okaj ktzꞌibꞌaꞌ oqtxiꞌ, komo te nini iktzaꞌ jun jqꞌanal swal chkꞌatunal tuj qlolj, nqꞌanalin max oj stzaj txekaꞌj bꞌix oj tjaw txaqtxon te nin cheꞌw tuj etanim.b 20 Instzaj enaꞌoꞌ waq, presisc tzan tel enikyꞌ te ntzani: Kyaqil aj tzꞌibꞌankaj tuj Tuꞌjal Dios aj jaꞌ nyolin tidiꞌ oxik kyqꞌumaꞌ kye aj yolil tyol Dios, nyaꞌtx cha owetz tuj kywiꞌx kye xjal. 21 Komo kye aj yolil tyol Dios, kyetz kꞌontiꞌl oxik kyqꞌumaꞌ jun tidiꞌ aj cha tuj kywiꞌx-wit, sinoke kyetz ebꞌajyolin te aj ntzaj tqꞌumaꞌ tuq te Txew Dios tuj kyanim.