2
Kꞌon Qobꞌajqet Eqꞌiꞌ Tzan Kye Aj Nyaꞌtx Tumeꞌl Nkyexnaqꞌtzan
1 Ateꞌ tuq junjun xjal kxol kye qijajil oqtxiꞌ aj nkyqꞌumaꞌ tuq qa aj yolil tyol Dios-eꞌ, per nyaꞌtx tuq bꞌanꞌax kyitzaꞌ. Bꞌix ax ikxji ajnaꞌl, okyejawel kanet junjun xnaqꞌtzon exol aj nyaꞌtx bꞌanꞌax kyitzaꞌ, oxeꞌl kxnaqꞌtzaꞌ jun xnaqꞌtzbꞌilj akꞌaꞌj bꞌix chuktky tzan tpon najsaꞌ [te xnaqꞌtzbꞌilj bꞌanꞌax], bꞌix cha owelal kyikꞌoꞌ te Qajawil aj owel xhchojoꞌ te qchoj, bꞌix ikxji aꞌeꞌxk kyetz nkyejoyon tzan stzaj siꞌ derepent jun nim xhchoꞌnal kyajsik tzan kyponaj. 2 Kyꞌilaꞌj qerman oxeꞌl kyin [te kxnaqꞌtzbꞌeꞌtz] tzan kypakꞌachin bꞌix tidiꞌchq ikxji, bꞌix tzan kypaj kyetz, kyꞌilaꞌj xjal okyeyoliyon bꞌan nyaꞌtx galan tiꞌj te tumeꞌl bꞌanꞌax. 3 Bꞌix tzan tpaj te aj nꞌel kyganiꞌ te kyetzx, kyetz okxtel kyeqꞌiꞌ tukyꞌi kyyol pur tbꞌanil per nyaꞌtx bꞌanꞌax kyitzaꞌ, sinoke cha tzan eqetbꞌaj kymosiꞌ. Per atx bꞌan oqtxiꞌ oqet kꞌuluꞌ listar te xhchoꞌnal aj kyajoꞌtz bꞌix okyepoyon najsaꞌ naj.
4 Komo te Qtata Dios kꞌontiꞌl oqet tnajsaꞌ kchoj kye ángel aj ekꞌulun nyaꞌtx galan tuj twitz, sinoke ebꞌajxik txon tuj te luwar aj jaꞌ te xhchoꞌnal kꞌontiꞌl nmankun bꞌix bꞌan qlolj bꞌan xop,a tzan kykaj txini max oj tul te jwisy. 5 Bꞌix ax kꞌontiꞌl eqet tnajsaꞌ kye xjal oqtxiꞌ, sinoke otkꞌuluj tzan tjaw libꞌan te twitz txꞌoꞌtxꞌ tukyꞌi aꞌ kyajsik kye xjal aj nyaꞌtx tuq galan kyemodin. Per oqet tkoloꞌ te Noe, aj npakbꞌan tuq titzaꞌ tzan kybꞌet tuj tumeꞌl, bꞌix ax ekolet wuqky aꞌeꞌ aj tuj tjay.* 6 Bꞌix ax te Qtata Dios ebꞌajpon tnajsaꞌ kyaqil tuj Gomor bꞌix Sodom, ebꞌajqet tkyꞌeꞌsaꞌ, bꞌan tzaꞌj ekaj tswaꞌ,* tzan tok kyen kye txqꞌanky xjal aj nyaꞌtx galan nkyekꞌulun. 7 Bꞌix tetz oqet tkoloꞌ te Lot kxol, jun xjal aj galan tuq bꞌix nꞌok ten tuq nim xhchoꞌnal tzan kypaj kye aj xjal aj pakꞌach aj kꞌontiꞌl tuq Dios tuj kywitz.* 8 Tetz jun xjal aj nbꞌet tuq tuj tumeꞌl, bꞌix bꞌajqꞌij nbꞌisun tuq tzan tpaj kyaqil aj nyaꞌtx galan aj nꞌok tuq teꞌeꞌ bꞌix aj nꞌok tuq xhchaꞌoꞌ kyiꞌj kye xjal aj jaꞌ tuq nnajan, xjal aj kꞌontiꞌl tuq tuj kywitz.
9 [Ntons tzan tpaj kyaqil nini, nꞌel qnikyꞌ] te Qajawil bꞌaꞌn tzan kyqet tkoloꞌ tiꞌj jun preb kye aj nkyexjanin te tetz, bꞌix nxik tswaꞌ xhchoꞌnal kyiꞌj kye aj joyol choj ajnaꞌl bꞌix ax oje qet tbꞌisuꞌ tzan txik tsiꞌ xhchoꞌnal kyiꞌj chaꞌoj tul te jwisy. 10 Bꞌix pyor okyꞌel kyiꞌj kye aj cha kyganinqet iktzaꞌ tgan te kchiꞌjel bꞌix nꞌel kyikꞌoꞌ kye aj nkyekꞌulun mandad, bꞌan kuch-eꞌ bꞌix kꞌontiꞌl tuj kywitz tzan tok kyyasoꞌ kye [ángel] aj at nim kyajwalil tuj kaꞌj. 11 Enkamby kye ángel konser kyetz at mas kyjwers bꞌix at mas kyajwalil, kyetz kꞌontiꞌl nkyeqanin twitz Qajawil jun xhchoꞌnal kyiꞌj kye aj xjal nyaꞌtx galan kyenabꞌlin. 12 Kye aj xjal ntzani iktzaꞌ txkup-eꞌ, kꞌontiꞌl kywiꞌ tzan kybꞌisun, bꞌix eꞌitzꞌjik cha tzan kykaj tzyuꞌ bꞌix tzan kypon najsaꞌ [tzan tpaj te nyaꞌtx galan aj nkykꞌuluꞌ]. Nkyeyolin nyaꞌtx galan tiꞌj tidiꞌchq aj kꞌontiꞌl nꞌel kynikyꞌ tiꞌj, per okyepoyon najsaꞌ iktzaꞌ nkyeponajsaꞌ kye txkup. 13 Owokel kyen twitz xhchoꞌnal chojbꞌil kyaqil aj kykꞌulbꞌen txiklen ksiꞌ xhchoꞌnal kyiꞌj txqꞌanky. Kyetz nkyechalaj tiꞌj kyaqil aj nyaꞌtx galan nkyekꞌulun bꞌan chijqꞌij. Kyetz eqꞌil kyꞌexawil te etetz oj kywaꞌan junx etukyꞌiꞌl, kyetz iktzaꞌ tzꞌil-eꞌ bꞌix nkyechalaj tzan eqet kyeqꞌiꞌ. 14 Kyetz cha kyjoyonqet titzaꞌ tzan kykꞌajajin, bꞌix kꞌontiꞌl nkyesiktik tzan kyjoyon choj. Mer kygan tzan tqet kyeqꞌiꞌ kye aj nyaꞌtx jwert ateꞌ. Kyetz tuj kyanim cha kybꞌisunqet titzaꞌ tzan tel kyetzaꞌ jun tidiꞌ te junky. Tzan tpaj kyaqil aj tidiꞌchq nyaꞌtx galan kykꞌulbꞌen, te Qtata Dios oxeꞌl tsiꞌ nim xhchoꞌnal kyajsik. 15 Kyetz oje xik kyin junky bꞌey, oje kaj kykolaꞌ te bꞌey aj galan. Oje xik kyin aj okaj tyekꞌuꞌ te Balam aj tkꞌajol Beor; tetz okaj tkolaꞌ te bꞌey galan tzan tpaj owel tganiꞌ mas te aj bꞌaꞌn tuq tzan tkꞌamon kyukyꞌi kye aj nyaꞌtx galan tuq kyenabꞌlin. 16 Per tetz owok iliꞌ tzan tpaj te xhchoj; jun bur aj kꞌontiꞌl stziꞌ owel stziꞌ naqexkix jun xjal bꞌix kꞌontiꞌl ostzoqpij tzan tkꞌulun te aj ntkꞌuluꞌ nyaꞌtx tuq tumeꞌl.*
17 Kye ja xnaqꞌtzon aj nkyinyolin kyiꞌjni, kyetz iktzaꞌ soch bꞌan kyꞌixkꞌoj [tzan tpaj te kyyol kꞌontiꞌl nꞌoken te jun galan], bꞌix kyetz iktzaꞌ muj jaꞌchq nxik in tzan jun kyaqꞌiqꞌ bꞌan jwert. Per kyetz oje kyexik poqoꞌ tzan kyten te jun-eleꞌx tuj jun qlolj bꞌan xop. 18 Kyetz nqet kyjiqꞌbꞌaꞌ kyibꞌ tukyꞌi kyyol aj kꞌontiꞌl token, bꞌix nkyeqet kyeqꞌiꞌ kye xjal tukyꞌi tidiꞌchq aj nꞌel tganiꞌ te kchiꞌjel bꞌix ikxji ntzaj ktxokoꞌ kye aj man tuq tkajlen ksiꞌ tzan kybꞌet tuj te nyaꞌtx galan. 19 Kyetz nxik ksiꞌ kyyol tzan kykꞌulun kye xjal tidiꞌchq aj kygan, per aꞌeꞌxk kyetz mosimeꞌ tzan te nyaꞌtx galan iktzaꞌx jun xjal aj oje qet tzan junky, tetz mosiꞌ tzan te aj oqet eqꞌin te tetz.* 20 Komo kyetz oje tzꞌok kyotzqilaꞌ te Qajaw Jesukrist aj koloyon qiꞌj, bꞌix oje kaj kykolaꞌ te nyaꞌtx galan aj ntzꞌilan tuq tiꞌj kyanim. Bꞌix qa oqtel kykꞌuluꞌ tidiꞌchq iktzaꞌ oqtxiꞌ, okyekajel junkyꞌel tuj tqꞌabꞌ te nyaꞌtx galan, bꞌix ikxji okyekajel pyor twitz tbꞌayaꞌ.* 21 Mejor-tal kꞌontiꞌl owok kyotzqilaꞌ te tumeꞌl, bꞌix nyaꞌtx-tal tzan tok kyotzqilaꞌ bꞌix yaji tzan tkaj kykolaꞌ te aj okaj tsiꞌ te Qtata Dios tzan tqet qokslaꞌ. 22 Kyiꞌj kyetz nkyꞌik iktzaꞌ nyolin jun qꞌumbꞌenj bꞌanꞌax ikxjani: “Te txꞌyaꞌn nmeltzꞌjik junkyꞌel tuj txaꞌawx, bꞌix te kuch aj man telen txꞌajoꞌ tiꞌj, nqex xpataqꞌun junkyꞌel tuj xhchuqꞌbꞌenx.”*