3
Tzulkix Junkyꞌel Te Jesukrist Bꞌix A Tgan Tzan Qten List
1 Etetz erman aj ganimix nim witzaꞌ, aj ntzani te tkabꞌiꞌ wuꞌuj aj nqet ntzꞌibꞌaꞌ te etetzni. Tuj kykabꞌil wuꞌuj, wetz nqet ntzꞌibꞌaꞌ junjun konsej te etetz tzan tqet ebꞌisuꞌ tuj tumeꞌl. 2 A tgan tzan stzaj enaꞌoꞌ te aj oje xik xnaqꞌtzaꞌ etetzni tzan kye aj yolil tyol Dios oqtxiꞌ, aꞌeꞌ aj pawameꞌ aꞌox te Qtata Dios, bꞌix tzan stzaj enaꞌoꞌ te aj okaj tqꞌumaꞌ te Qajawil aj koloyon qiꞌj, instzaj enaꞌoꞌ te tyol aj oxik xnaqꞌtzaꞌ te etetz tzan kye tkyꞌixel. 3 Ntons bꞌan presisa tzan tel enikyꞌ tiꞌj ja ntzani: Oj tpon tyemp aj chꞌinky tuq tul te Jesukrist junkyꞌel, kyeꞌul xjal aj xmayiyon-eꞌ, aj cha okyexmayiyon bꞌix okykꞌuluꞌtz iktzaꞌx tgan te kchiꞌjel.* 4 Okyqꞌumaꞌtz ikxjani: “¿Jani qa oje pon najji iktzaꞌx tkajlen tqꞌumaꞌ? Komo atx aj kynajlen kye qijajil oqtxiꞌ, kyaqil axkix atqetji, iktzaꞌx atx aj tqetlen kꞌuluꞌ te twitz txꞌoꞌtxꞌ.” 5 Kyetz kꞌon kygan tzan tel kynikyꞌ te tumeꞌl, atx oqtxiꞌ te Qtata Dios oxik tyoliꞌ tzan tqet tkꞌuluꞌ te twitz kaꞌj bꞌix te twitz txꞌoꞌtxꞌ cha aꞌox tukyꞌi aꞌ bꞌix tzan [tel tpawaꞌ tibꞌ tiꞌj te] aꞌ.* 6 Bꞌix ax [tukyꞌi tyol te Qtata Dios] opon tnajsaꞌ kyaqil te twitz txꞌoꞌtxꞌ tjaqꞌ te aꞌ.* 7 Bꞌix ax te ja twitz kaꞌj bꞌix twitz txꞌoꞌtxꞌ aj at ajnaꞌl, cha koloꞌ tzan te tyol Qtata Dios, per tzan tqetbꞌaj loꞌ tzan te qꞌaqꞌ chaꞌoj tul te jwisy oj kypon najsaꞌ kyaqil xjal aj kꞌontiꞌl nkyeꞌokslan. 8 Per yatzun etetz erman aj ganimix nim witzaꞌ, kꞌon tzꞌaj naj tiꞌj ekꞌuꞌj waq, jun qꞌij tuj twitz te Qajawil iktzaꞌ jun mil aqꞌbꞌi, bꞌix jun mil aqꞌbꞌi iktzaꞌ jun qꞌij teꞌen tetz.* 9 Te Qajawil kꞌontiꞌl nnachqꞌin tzan tkꞌulun kyaqil aj okaj tyoliꞌ, iktzaꞌx nkybꞌisuꞌ junjun qa maꞌtx nachqꞌin, sinoke tetz cha at nim tpasens etiꞌj. Tetz kꞌon tgan tzan tponaj nijunwt xjal, sinoke tgan tzan tjaw kkyꞌixpuꞌ kynabꞌlin kyaqil xjal.* 10 Per tuj te qꞌij oj tul te Qajawil, tetz tzul iktzaꞌ jun eleqꞌ, [kꞌontiꞌl abꞌl tebꞌen tujbꞌaꞌn tzul].* Kyaqil te twitz kaꞌj oqtel xitan tukyꞌi jun twiꞌ ma trenun, bꞌix kyaqil tidiꞌchq aj at oqtel naj tzan te qꞌaqꞌ, bꞌix te twitz txꞌoꞌtxꞌ bꞌix kyaqil aj at twitz txꞌoꞌtxꞌ, oqtel naj tzan te qꞌaqꞌ.
11 Ntons tzan tpaj ikxjani opoyonaj kyaqil, a tgan tzan qbꞌet tuj tumeꞌl bꞌix tzan qxjanin Qtata Dios tuj kyaqil aj nqokꞌulun. 12 Kꞌon kaj esiꞌ tzan etiyon tiꞌj Qtata Dios bꞌix peꞌekꞌulun waq kyaqil tuj tumeꞌl tzan tpon luwew aj qꞌijji. Tuj aj qꞌijji te twitz kaꞌj opoyonaj tzan te qꞌaqꞌ bꞌix xtxꞌotxꞌal kyaqil tidiꞌchq aj at oqtel ulan tuj te qꞌaqꞌ. 13 Per qetz qiyoꞌtz junky kaꞌj akꞌaꞌj, bꞌix junky twitz txꞌoꞌtxꞌ akꞌaꞌj aj oje kaj tqꞌumaꞌ te Qtata Dios,* te tzi kyaqil owokel tuj tumeꞌl. 14 Astilji waq erman aj ganimix witzaꞌ, intok esiꞌ ekꞌuꞌj tzan etzaj tkꞌulbꞌaꞌ Qtata Dios nkxbꞌet tuj jun tumeꞌl bꞌan galan bꞌix chꞌinwt etil bꞌix galan atix tukyꞌiꞌl. 15 Bꞌix kꞌon tzꞌaj naj tiꞌj etanim, te Qajawil at nim tpasens tzan tpaj tgan tzan jkolet.* Ax te qerman Paꞌk aj ganiꞌ nim qitzaꞌ, ax tetz oqet stzꞌibꞌaꞌ te etetz iktzaꞌx ntzani bꞌix tukyꞌi jun tnabꞌl aj oxik siꞌ tetz tzan Qtata Dios. 16 Bꞌix ikxji nqet stzꞌibꞌaꞌ tuj kyaqil tuꞌuj, nyolin tiꞌj kyaqil ntzani. At junjun tidiꞌ aj nqet stzꞌibꞌaꞌ aj pen nꞌel qnikyꞌ tiꞌj, bꞌix kye aj kꞌontiꞌl nꞌox tuj kywiꞌ bꞌix kye aj kꞌontiꞌl witꞌlik kykꞌuꞌj byenech tzan kyokslan, kyetz njaw kkyꞌixpuꞌ tidiꞌ telponx tzan tok chuktky, mer iktzaꞌx nkyekꞌulun kyukyꞌi kye txqꞌanky uꞌj tuj Tuꞌjal Dios, bꞌix ikxji cha npon kynajsaꞌ kyibꞌx. 17 Astilji waq erman aj ganimix witzaꞌ, etetz ajnaꞌl etebꞌen tiꞌj kyaqil ntzani; astilji intok esiꞌ enabꞌl tzan kꞌon exik samoꞌ kxol kye aj kꞌontiꞌl Dios tuj kywitz, kebal exik samoꞌ bꞌix yaji etetz okxtel tzꞌaqik. 18 Per intok eten kyebꞌaꞌ te aj nim bꞌan galan aj kꞌontiꞌl nqajoꞌ aj ntzaj siꞌ tzan te Qtata Dios, bꞌix intel enikyꞌ kyebꞌaꞌ tiꞌj te Qajaw Jesukrist aj koloyon qiꞌj. ¡Intqetxwit jiqꞌbꞌaꞌ ajnaꞌl bꞌix tuj kyaqil tyemp te jun-eleꞌx! Kyꞌikxwit ikxji.