5
Jun Konsej Kye Tijxjal Titzaꞌ Tzan Tqet Kyen Kye Qerman
1 Wetz ngan tzan kxik nkawiꞌ kye aj tijxjal aj at kyajwalil exol etetz. Wetz ax aꞌin jun tijxjal iktzaꞌx aꞌix, bꞌix owok wen te xhchoꞌnal aj okyꞌik tiꞌj Krist, bꞌix ax wetz iktzaꞌx etetz loꞌik nkꞌuꞌj owokel weꞌeꞌ xhchqitzꞌunal oj tul junkyꞌelky.a 2 Inkyqet ekꞌuluꞌ kwent kye qerman aj oje kyekaj siꞌ tuj ekwent, inkyqet ekꞌuluꞌ kwent nyaꞌtx tzan tpaj lajomix alajwers sinoke tzan tpaj ikxji egan iktzaꞌ tgan te Qtata Dios, bꞌix nyaꞌtx tzan tpaj egan jun etumin sinoke inkyqet ekꞌuluꞌ kwent tukyꞌi jun tkꞌuꞌjlal.* 3 Bꞌix kꞌon kxꞌok iktzaꞌ aꞌix kyajawil, sinoke intqet eyekꞌuꞌ kywitz te tumeꞌl galan. 4 Ikxji chaꞌoj tul junkyꞌelky te aj Twitzaleꞌ Kꞌulul Kwent kyiꞌj kye qerman,* etetz ekꞌamoꞌtz tukyꞌiꞌl jun jiqꞌbꞌil bꞌan galan te ekanabꞌb aj kꞌontiꞌl nponaj.
Jun Konsej Titzaꞌ Tzan Kybꞌet Kye Kuꞌxon Bꞌix Kye Txqꞌanky
5 Bꞌix ax etetz aj kuꞌxon aꞌix, inkyqet etokslaꞌ kye tijxjal exol. Bꞌix yatzun etetz ekyaqil, intqet etokslaꞌ jun te jun, peꞌenaꞌon iktzaꞌ aꞌix aqꞌunon te junky tzan tpaj te Qtata Dios kꞌontiꞌl nqet tuj twitz kye aj nqet kyjiqꞌbꞌaꞌ kyibꞌ; per yatzun kye aj kꞌontiꞌl nqet kyjiqꞌbꞌaꞌ kyibꞌ, tetz ntzaj tsiꞌ jun nim bꞌan galan kyajsik.* 6 Peꞌetok najji okslon twitz Qtata Dios aj bꞌaꞌn tzan tkꞌulun kyaqil, bꞌix ikxji tzan eqet tjiqꞌbꞌaꞌ tuj jun tyemp aj bꞌisuꞌ titzaꞌ.* 7 Intkaj esiꞌ tuj tqꞌabꞌ tetz kyaqil aj nkxbꞌisun tiꞌj, komo tetz nkꞌulun kwent te etetz.* 8 Peꞌekꞌulun mandad etibꞌx tzan ebꞌet tuj tumeꞌl bꞌix intok esiꞌ enabꞌl tzan tpaj te etajqꞌoj aj Tajaw Choj, tetz njoyon etiꞌj iktzaꞌ jun leonc njulin njoyon aber abꞌl oqtel tbꞌaꞌoꞌ. 9 Peꞌetipan tetz, peꞌeten waq jwert, kꞌon kaj esiꞌ tzan tok witꞌlet ekꞌuꞌj tiꞌj te Qtata Dios. Etetz etebꞌenky kyaqil jaꞌchq twitz txꞌoꞌtxꞌ ateꞌ txqꞌanky qerman ax nꞌok kyen twitz xhchoꞌnal iktzaꞌx etetz. 10 Etetz tuj jun tyemp nyaꞌtx nim tuj nꞌok eten twitz xhchoꞌnal; bꞌix oj tkyꞌik ntzani, yaji te Qtata Dios aj ntzaj sin nim bꞌan galan te qetz anke kꞌontiꞌl nqajoꞌ, komo tetz okxtzaj tukꞌleꞌ tzan tok eten tukyꞌi Krist kyaqil tajwalil bꞌix xhchqitzꞌunal aj kꞌontiꞌl nponaj, ntons tetz otkꞌuluꞌtz tzan tjaw etin etibꞌ junkyꞌel bꞌix tzan eten bꞌan jwert, bꞌix tzan tjaw tin ekꞌuꞌjx bꞌix tzan ekaj bꞌan galan bꞌeyx te jun-eleꞌx. 11 A tetz te aj at tajwalil tiꞌj kyaqil bꞌeyx te jun-eleꞌx. ¡Ikxji kixiꞌ!
Jun Kawbꞌil
12 Ntons, te qerman Silbánod nꞌonen wukyꞌiꞌl tzan tqet ntzꞌibꞌaꞌ te ja uꞌjni, bꞌix tetz jun qerman aj kꞌontiꞌl nkaj tsiꞌ tzan tokslan. Ntons tzan tpaj tetz, maꞌtx qet ntzꞌibꞌaꞌ kabꞌeꞌ nyol tuj ja uꞌjni tzan nnimsan ekꞌuꞌj bꞌix tzan txik nqꞌumaꞌ te bꞌanꞌax aj webꞌen tiꞌj te tumeꞌl bꞌanꞌax titzaꞌ te nim bꞌan galan aj ntzaj tsiꞌ te Qtata Dios etetz. 13 Kye qerman aj akyeqet tuj Babilony aj eꞌel joyoꞌ tzan Qtata Dios iktzaꞌx etetz, kyetz nxik ksamaꞌ jun limbꞌil te etetz. Bꞌix ax jun limbꞌil te etetz tzan te Mak* [aj iktzaꞌ] nkꞌajol. 14 Bꞌix peꞌeliman etetz etibꞌx exolx tzi, tukyꞌi jun limbꞌil bꞌan tumeꞌl iktzeꞌxtzun bꞌan eterman etibꞌ.e Chewsaꞌxwit ekꞌuꞌj etetz ekyaqil tzi, etetz aj mojbꞌaꞌ etibꞌ tukyꞌi Krist.