4
1 Astilji, iktzaꞌx te Krist owok ten twitz xhchoꞌnal tuj xhchiꞌjel, ax etetz a tgan [tzan eten dispwest] tzan tok eten twitz xhchoꞌnal. Komo abꞌl aj oje tzꞌok ten twitz xhchoꞌnal tuj xhchiꞌjel, oje kaj tsiꞌ tzan tjoyon choj. 2 Ikxji te tanqꞌin aj atxk tzani twitz txꞌoꞌtxꞌ, ya kꞌontiꞌl nkꞌulun tidiꞌchq iktzaꞌ kye xjal, sinoke nꞌanqꞌin aꞌox iktzaꞌ te Qtata Dios tgan. 3 Etetz oqtxiꞌ oje enajsaj nim tyemp iktzaꞌ nkyekꞌulun kye aj kꞌontiꞌl nkyeꞌokslan; aj cha pur nkxbꞌisun tuq tzan epakꞌachin bꞌix tidiꞌchq ikxji, bꞌix nkxkꞌulun tuq tidiꞌchq nyaꞌtx galan aj nꞌel tuq tganiꞌ te echiꞌjel, pur xhbꞌaꞌj tuq etaqꞌun bꞌix cha nkxpyestinqet nxik tuq etachoꞌ tidiꞌchq, bꞌix nkxnaꞌon tuq kyitzbꞌalil tidiꞌchq aj bꞌan ntzaj tqꞌoj te Qtata Dios tiꞌj. 4 Bꞌix ajnaꞌl kye aj kꞌontiꞌl nkyeꞌokslan bꞌan nkyelabꞌan etiꞌj bꞌix cha nkyeyolinqet nyaꞌtx galan etiꞌj tzan tpaj kꞌontiꞌl ajunix kyukyꞌiꞌl tuj kyaqil aj bꞌan nyaꞌtx galan aj nxik in tzan kyponaj. 5 Per kyetz [tuj te jwisy] a tgan tzan taj kyqꞌumaꞌ kyaqil aj otzajel qaniꞌ tiꞌj kykꞌulbꞌen tzan te [Qtata Dios] aj list at tzan tul poqol kye aj itzꞌojeꞌ bꞌix kye aj kamnaqeꞌ. 6 Komo astilji ax oxik pakbꞌaꞌ te tpakbꞌalil galan kxol kye aj kamnaqeꞌ; ikxji anke kyetz tukyꞌi kchiꞌjel oje tzꞌok kyeꞌeꞌ twitz kamikyja iktzaꞌx kyaqil xjal, per yaji bꞌaꞌn tuq tzan tanqꞌin te kyanim iktzaꞌx te Qtata Dios tgan.
A Tgan Tzan Jkꞌulun Kyukyꞌi Txqꞌanky Iktzaꞌx Oje Jkꞌamoj Tukyꞌi Qtata Dios
7 Cha chꞌinky tpon tmankbꞌil kyaqil tidiꞌchq; astilji peꞌeten nkxbꞌisun tuj tumeꞌl bꞌix peꞌeten bwenisan tzan exnaqꞌtzan tukyꞌi te Qtata Dios. 8 Per te aj mas presis, a tgan tzan tqet eganiꞌ etibꞌ exolx tukyꞌi jun tkꞌuꞌjlal,* komo oj kyqet qganiꞌ kye txqꞌanky ikxji npon qnajsaꞌ nim choj. 9 Peꞌetok waq galan xjal tzan txik esiꞌ kyposad txqꞌanky,* per tukyꞌi jun tkꞌuꞌjlal bꞌix kꞌontiꞌl tzan ejaw ilin. 10 Peꞌetonen etibꞌx exolx tukyꞌi te etajbꞌen aj ntzaj tsiꞌ te Qtata Dios te etetz, bꞌix peꞌetonen tuj jun tumeꞌl iktzaꞌ jun aqꞌunon galan aj nꞌaqꞌunan tzan tok en kye kyꞌilaꞌj tumeꞌl titzaꞌ ntzaj tsiꞌ te Qtata Dios jun nim bꞌan galan qajsik. 11 Kye aj bꞌaꞌn tzan kypakbꞌan [Tyol Dios], inkyyolin [tukyꞌi jun tkꞌuꞌjlal] tzan tpaj Tyol Qtata Dios; bꞌix kye aj nkyeꞌonen kxol kye qerman, inkyonen tukyꞌi jun kybalor aj ntzaj tsiꞌ te Qtat; ikxji tzan tqet jiqꞌbꞌaꞌ te Qtat tzan tpaj Jesukrist. Te Qtata Dios a te aj nqet jiqꞌbꞌaꞌ bꞌix mas nim tajwalil twitz kyaqil tuj kyaqil tyemp te jun-eleꞌx. Kyꞌikxwit ikxji.
Kꞌontiꞌl Tzan Qlabꞌan Qa Nꞌok Qen Twitz Xhchoꞌnal
12 Etetz aj ganimix witzaꞌ, etetz nꞌok eten twitz nim xhchoꞌnal tzan eqet siꞌ tuj preb, per kꞌon kxlabꞌan waq tiꞌj ntzani iktzaꞌ-wit jun tidiꞌ bꞌan chuktky. 13 Chaꞌoj tok eten twitz xhchoꞌnal iktzaꞌ te Qajaw Jesukrist owok ten, peꞌechalaj waq tzan tpaj okxchalajel nim oj tul junkyꞌelky tukyꞌi nim tajwalil bꞌix nim xhchqitzꞌunal.* 14 Galanx-alo etetz qa at abꞌl ma tzꞌok yason te etetz tzan tpaj te Qajaw Jesukrist, galanx-alo etetz tzan tpaj te Txew Qtata Dios aj bꞌan nim tajwalil, tetz atqet etajsik.b 15 Nijunwt exol etetz intkꞌulun nyaꞌtx galan, ikxji tzan kꞌon tok ten twitz xhchoꞌnal iktzaꞌ jun aj nkansan, qatzun aj nꞌelqꞌanji, qatzun aj nkꞌulun nyaꞌtx galanji, qatzun aj nꞌox tsamoꞌ tibꞌ tuj jun tidiꞌ aj jaꞌ kꞌontiꞌl toklenji. 16 Per qa nꞌok eten twitz xhchoꞌnal tzan tpaj nkxꞌokslan tiꞌj Jesukrist, ntons kꞌon kxqet kyꞌixwik sinoke intqet ejiqꞌbꞌaꞌ te Qtata Dios tzan tpaj etoklen lapet tiꞌj Krist. 17 Komo maꞌtx pon or tzan tok qen twitz xhchoꞌnal, bꞌix qa owaqꞌel qukyꞌiꞌl qetz [aj nqoꞌokslan],* ntons pyor okyꞌel kyiꞌj kye aj kꞌontiꞌl nqet kyokslaꞌ te tpakbꞌalil Qtata Dios. 18 Bꞌix qa qetz aj nqobꞌet tuj tumeꞌl tuj twitz Qtata Dios pen oqokoletel, ntons ¿titzaꞌ obꞌantel kykolon kyibꞌ kye aj nyaꞌtx galan kyenabꞌlin tuj twitz Qtata Dios bꞌix kye aj joyol choj?* 19 Ntons qa te Qtata Dios nstzoqpiꞌ tzan tok qen twitz xhchoꞌnal, komo tetz te kꞌulul kyaqil twitz txꞌoꞌtxꞌ bꞌix jun yolin,* ntons intkaj jqꞌapoꞌ qibꞌ tuj tqꞌabꞌ bꞌix kꞌon kaj qsiꞌ tzan qbꞌet tuj tumeꞌl.