3
Jun Konsej Kye Xujelbꞌaj Tzan Kybꞌet Tuj Tumeꞌl
1 Ntons, ax exol etetz aj xujelbꞌaj aꞌix, peꞌetokslan kye etichmil;* ikxji kye aj kꞌontiꞌl nkyeꞌokslan te tpakbꞌalil, kyetz bꞌaꞌn tzan kyokslan tzan tpaj nꞌok kyen titzaꞌ nkxkꞌulun etetz kyaqil, bꞌix nyaꞌtx tzan tpaj jun eyol, 2 sinoke tzan tpaj nꞌok kyen titzaꞌ etetz nkxbꞌet bꞌan tumeꞌl bꞌix bꞌan okslon aꞌix. 3 Te tbꞌanil etiꞌj etetz nyaꞌtx tzan tok aꞌox tzan tpaj titzaꞌ nqet etxakuꞌ stzamal ewiꞌ, ni aꞌox tzan tpaj kye tidiꞌchq txakbꞌil etetz aj xtxꞌotxꞌal oro, ni aꞌox tzan tpaj eqꞌanaq bꞌan tbꞌanil,* 4 sinoke [te tbꞌanil te etetz] a tgan instzaj tuj etanim, jun enabꞌlin bꞌan galan bꞌix nim epasens; ikxji te tbꞌanil titzaꞌ kxkaꞌyin kꞌontiꞌl nponaj. Kyaqil nini nꞌel bꞌan tbꞌanil tuj twitz Qtata Dios. 5 Ikxjani tuq nqet ktxakuꞌ kyibꞌ kye xuj bꞌan oqtxiꞌ aꞌeꞌ aj pawameꞌ te Qtata Dios. Kyetz loꞌik tuq kykꞌuꞌj tiꞌj tetz bꞌix nkyeꞌokslan tuq kyichmil. 6 Komo ikxji tuq te Sar, tetz nqet tuq tokslaꞌ te Abran bꞌix nꞌok tqꞌumaꞌ tuq “Wajawil.”* Etetz okxꞌokel [iktzaꞌ] tal Sar qa oqtel ekꞌuluꞌ te galan bꞌix qa nlay kxobꞌ tiꞌj jun tidiꞌ.
Jun Konsej Kye Ichmilbꞌaj Tzan Tqet Kyen Kxuꞌjel
7 Ntons, ax ikxji etetz waq ichmilbꞌaj, intqet ebꞌisuꞌ byenech titzaꞌ tzan kyqet eten galan kye exuꞌjel tzan tpaj kyetz mas kꞌontiꞌl kybalor ewitz etetz.a Intxik esiꞌ kyluwar aj nkyajoꞌ tzan tpaj te Qtata Dios otzajel tsiꞌ kyetz junchꞌin etukyꞌiꞌl tzan etanqꞌin [te jun-eleꞌx] anke kꞌontiꞌl tuq nꞌetajoꞌ. Peꞌekꞌulun waq ikxji tzan stzaj tsiꞌ te Qtata Dios twiꞌ etiꞌj oj exnaqꞌtzan.
Jun Konsej Kye Qkyaqil Tzan Qbꞌet Tuj Tumeꞌl
8 Ntons, ekyaqil etetz waq, peꞌetanqꞌin tukyꞌi jun enabꞌl parej ekyaqil, inkyqet eten kye txqꞌanky galan, intqet eganiꞌ etibꞌ exol iktzaꞌ bꞌan eterman etibꞌ, intok loꞌet ekꞌuꞌj kyiꞌj kye txqꞌanky, bꞌix kꞌon qet ejiqꞌbꞌaꞌ etibꞌ. 9 Kꞌon kxkꞌulun jun nyaꞌtx galan tiꞌj junky tzan tpaj maꞌtx tkꞌuluj jun nyaꞌtx galan etiꞌj, bꞌix kꞌon tzꞌaj etzaqꞌbꞌeꞌ jun yasbꞌil tukyꞌi junky yasbꞌil, sinoke inkyqet ekyꞌiwlaꞌ kye etajqꞌoj. Komo astilji okxtzaj ukꞌleꞌ kyꞌiwlal txqꞌanky bꞌix tzan ekꞌamon etetz te tkyꞌiwlbꞌil te Qtata Dios. 10 Komo abꞌl te aj bꞌan tgan tzan tanqꞌin bꞌix tzan tanqꞌin tukyꞌi jun chalajbꞌil, ntons intok tsiꞌ tnabꞌl tzan kꞌon tyolin yol aj nyaꞌtx galan bꞌix tzan kꞌon kyqet teqꞌiꞌ txqꞌanky tukyꞌi tyol. 11 Intel tpawaꞌ tibꞌ tiꞌj te aj nyaꞌtx galan, bꞌix intkꞌulun te galan, intjoyon tzan sten galan kxol kye txqꞌanky, bꞌix kꞌon kaj tsiꞌ tzan tkꞌulun te galan. 12 Komo te Qajawil nkyeqet ten kye aj nkyeꞌokslan nkyebꞌet tuj tumeꞌl, bꞌix ax nchaꞌon tiꞌj te aj nxik kxnaqꞌtzaꞌ tukyꞌiꞌl, per ntzaj tqꞌoj kyiꞌj kye aj nyaꞌtx galan nkyekꞌulun.*
Kꞌontiꞌl Tzan Qxobꞌ Kyiꞌj Kye Aj Nkyekꞌulun Nyaꞌtx Galan Qiꞌj
13 Ntons, ¿abꞌl okꞌuluyon jun nyaꞌtx galan etiꞌj qa etetz aꞌox atok ekꞌuꞌj tzan ekꞌulun galan? 14 Qa etetz tzan tpaj nkxbꞌet tuj tumeꞌl owokel eten twitz xhchoꞌnal, galanx-alo etetz ikxji.* Bꞌix kyiꞌj kye aj nkyeqꞌojin etiꞌj, kꞌon kxobꞌ bꞌix kꞌon kxbꞌisun, 15 sinoke tuj etanim intqet exjaniꞌ te Krist iktzaꞌ etajawil. Peꞌetenkix list tzan taj etzaqꞌbꞌeꞌ kye aj otzajel kchaꞌoꞌ etetz tiꞌj te aj jaꞌ loꞌik ekꞌuꞌj.* 16 Per intaj etzaqꞌbꞌeꞌ waq tukyꞌi jun tumeꞌl bꞌan galan bꞌix kyebꞌaꞌ, tzan kꞌon tyolin etanim jun nyaꞌtx galan etiꞌj. Ikxji kye aj nkyeyolin nyaꞌtx galan tiꞌj te tumeꞌl titzaꞌ nkxbꞌet mojbꞌaꞌ etibꞌ tukyꞌi Krist, kyetz okyeqtel kyꞌixwik tiꞌj kyyolbꞌen. 17 Mas galan tzan tok qen twitz xhchoꞌnal tzan tpaj jkꞌulbꞌen tumeꞌl, qa ikxji tgan te Qtata Dios, bꞌix nyaꞌtx tzan tok qen twitz xhchoꞌnal tzan tpaj jkꞌulbꞌen aj nyaꞌtx galan. 18 Komo te Jesukrist tzan jun-el okamik tzan tpaj qchoj qetz. Tetz kꞌontiꞌl tuq xhchoj bꞌix okamik tzan kypaj kye joyol choj; ikxji tzan qxik tin tukyꞌi Qtata Dios. Tetz owok ten twitz tkamiky tukyꞌi xhchiꞌjel, per te tanim oje jaw anqꞌinsaꞌ 19 bꞌix ikxji oxik pakbꞌayon kxol kye kyanim xjal aj ateqex tuq pres. 20 Kye ja ntzani aꞌeꞌ kye aj kꞌontiꞌl nkyeꞌokslan tuq oqtxiꞌ tuj aj tyemp aj itzꞌoj tuq te Noe,* bꞌix aj te Qtata Dios nꞌiyon tuq tukyꞌi nim tpasens aj man tuq nbꞌantik tuq te bark. Tuj aj barkji ekolet tuj te aꞌ cha junjun xjal, osey wajxaq tzan kkyaqil. 21 Te aj aꞌji telponx tiꞌj oj tjaw siꞌ aꞌ qwiꞌ ajnaꞌl tzan tpaj kolomoꞌ. Oj tjaw siꞌ aꞌ qwiꞌ nyaꞌtx telponx tzan tel qtxꞌajoꞌ qchiꞌjel sinoke tzan txik jqaniꞌ te Qtata Dios tzan tel teqꞌiꞌ te nyaꞌtx galan tuj qanim tzan tpaj tjawlen anqꞌin te Jesukrist. 22 Tetz ojax tuj kaꞌj bꞌix atqet tuj tbꞌanqꞌabꞌb Qtata Dios, bꞌix oje kyeqet titzaꞌ kye ángel [aj nyaꞌtx galan-eꞌ] bꞌix kye [malspirit] aj tuj kyaqꞌiqꞌ bꞌix kye aj bꞌaꞌn tzan kykꞌulun tidiꞌchq.