2
1 Astilji intkaj esiꞌ tzan ekꞌulun nyaꞌtx galan kyiꞌj txqꞌanky. Kꞌon kxnikꞌon bꞌix kꞌon kxꞌok xmeletzꞌ, bꞌix kꞌon tzꞌok eqꞌojiꞌ junky tuj etanim tzan tpaj jun tidiꞌ tetz, bꞌix kꞌon tzꞌok eyasoꞌ junky. 2 Naqe neꞌ aj man kyitzꞌjlen nkyejoyon ktxuꞌ, ax ikxji etetz [aj aꞌix tkꞌwaꞌal Qtata Dios], peꞌejoyon te aj bꞌan galan aj ntzaj tsiꞌ tzan eten jwert tukyꞌiꞌl eqetlen tkoloꞌ, 3 komo oje tzꞌok eten bꞌan galan nabꞌlin te Qajawil etukyꞌiꞌl.*
A Te Jesukrist Te Aj Mas Bꞌan Presis Qxol Qetz Aj Nqoxnaqꞌtzan
4 Ntons, peꞌetok laqꞌchet tiꞌj te Qajaw, tetz iktzaꞌ jun abꞌj te twitꞌlel jun jay, per itzꞌoj, bꞌix owel ikꞌoꞌ tzan kye xjal, per tuj twitz Qtata Dios owel bꞌan chilan bꞌix nim tbalor. 5 Bꞌix yatzun etetz naqe abꞌj, per itzꞌojix, abꞌj aj nꞌoken tzan te Txew Dios te kꞌulbꞌil tjay Qtata Dios. Tzoqpij waq tzan etoken ikxji titzaꞌ. Ikxji tzan etok pal pawamix aꞌox te Qtata Dios tzan txik eqꞌapoꞌ te tetz, te galan aj nqet tuj twitz tetz tzan tpaj te Qajaw Jesukrist. 6 Astilji te Tuꞌjal Dios oqtxiꞌ nyolin ikxjani: “Wetz oqtel nsiꞌ [jun nlajen tuj Sión bꞌix tetz nim token naqe] jun abꞌj aj mas bꞌan presis aj nꞌoken te eskin te jun jay, bꞌan chilan bꞌix nim tbalor. Abꞌl aj owokslayon tiꞌj, tetz nlay tzꞌel in tkyꞌexaw.”* 7 Ntons, te etetz aj nkxꞌokslan tiꞌj tetz, tetz at nim tbalor; yatzun kye aj kꞌontiꞌl nkyeꞌokslan, nkyꞌikkix iktzaꞌ ntqꞌumaꞌ te Tuꞌjal Qtata Dios ikxjani: “Te abꞌj owel ikꞌoꞌ tzan kye kꞌulul jay, per oje tzꞌok jun abꞌj aj mas presis te eskin.”* 8 Bꞌix ax nyolin ikxjani: “Tetz iktzaꞌ jun abꞌj aj jaꞌ okyejawel xpetkꞌan bꞌix aj jaꞌ okyejawel jilan txqꞌanky.”* Kyetz nkyejaw xpetkꞌan tiꞌj tzan tpaj kꞌontiꞌl nqet kyokslaꞌ te tpakbꞌalil; kyetz ikxji ebꞌajkaj siꞌ.
Titzaꞌ Tzan Qbꞌet Tuj Tumeꞌl Kxol Kye Aj Kꞌontiꞌl Nkyexnaqꞌtzan
9 Yatzun ekyaqil etetz, joyomix aꞌix,a bꞌix pal aꞌix aj nkxꞌaqꞌunan [te Qtata Dios] aj twitzaleꞌ kꞌulul mandad tiꞌj kyaqil. Bꞌix aꞌix jun amaqꞌ pawaꞌ aꞌox te Qtata Dios, bꞌix etzamix tzan te Qtata Dios tzan etok txjalil.* Ikxji tzan txik epakbꞌaꞌ aj tidiꞌchq tbꞌanil oje tkꞌuluj Qtata Dios, aj okxjatz tin tuj te nyaꞌtx galan aj jaꞌ tuq nkxbꞌet iktzaꞌ tuj jun qlolj, bꞌix tzan etox tuj chkꞌatunal tetzx aj bꞌan tbꞌanil. 10 Etetz tbꞌayaꞌ nyaꞌtx tuq aꞌix jun amaqꞌ, per ajnaꞌl jun amaqꞌ aꞌix tzan tpaj aꞌix txjalil Qtata Dios. Bꞌix tbꞌayaꞌ kꞌontiꞌl tuq abꞌl nꞌok loꞌet tkꞌuꞌj etiꞌj, per ajnaꞌl te Qtata Dios nꞌok loꞌet tkꞌuꞌj etiꞌj.*
11 Ntons, etetz erman aj ganimix witzaꞌ, wetz nqet nwitz ewitz iktzaꞌ aꞌix xjal aj man atix tuj ebꞌey [tzan epon twitz Qtata Dios] bꞌix aj cha oqxenaꞌ etibꞌ [tzani twitz txꞌoꞌtxꞌ], wetz nqet nwitz ewitz tzan tkaj esiꞌ kyaqil aj nyaꞌtx galan aj nꞌel tganiꞌ te echiꞌjel, aj njoyon tumeꞌl tzan eqet tzꞌaqik. 12 Peꞌebꞌet tuj tumeꞌl galan kxol kye xjal aj kꞌontiꞌl nkyeꞌokslan tiꞌj Qtata Dios.b Ikxji anke ajnaꞌl kyetz nkxqet kyyoliꞌ iktzeꞌxtzun etetz aꞌix xjal aj pur joyol choj, kyetz owokel kyen te galan aj nꞌekꞌuluꞌ bꞌix oqtel kyjiqꞌbꞌaꞌ te Qtata Dios oj tul chaꞌol tiꞌj kyaqil jkꞌulbꞌen. 13 Ntons, etetz tzan [tqet jiqꞌbꞌaꞌ] te Qajawil [kxol kye xjal], inkyqet etokslaꞌ etetz kye aj nkyekꞌulun mandad exol: tbꞌay, te twitzaleꞌ kꞌulul mandad tzan tpaj a tetz te aj mas nim tajwalil, 14 bꞌix ax kye txqꞌanky kꞌulul mandad aj lajomeꞌ titzaꞌ tzan txik ksiꞌ xhchoꞌnal kyiꞌj kye aj nkyekꞌulun nyaꞌtx galan bꞌix tzan kyqet kyjiqꞌbꞌaꞌ kye aj nkyekꞌulun galan. 15 Komo te Qtata Dios tgan tzan ekꞌulun etetz te galan tzan kꞌon toknoj jun tidiꞌ etiꞌj tzan eqet yoliꞌ tzan kye aj ma mokꞌ bꞌix kye aj kꞌontiꞌl nꞌel kynikyꞌ chꞌinwt. 16 Peꞌebꞌet waq tuj tumeꞌl iktzaꞌx xjal aj kolpimix tiꞌj echoj, bꞌix nyaꞌtx tzan tpaj kolomix oqtel ekꞌuluꞌ tidiꞌchq aj nyaꞌtx galan, sinoke peꞌebꞌet waq iktzaꞌ xjal qꞌapoꞌ etibꞌ nkxꞌaqꞌunan te Qtata Dios. 17 Inkyqet elimaꞌ waq kyaqil xjal. Inkyqet eganiꞌ kye txqꞌanky qerman, intqet exjaniꞌ te Qtata Dios, bꞌix intqet elimaꞌ te twitzaleꞌ kꞌulul mandad.
Jun Konsej Titzaꞌ Tzan Kybꞌet Tuj Tumeꞌl Kye Aqꞌunon Te Junky
18 Etetz aj nkxꞌaqꞌunan te jun etajaw, inkyqet etokslaꞌ tukyꞌi jun tkꞌuꞌjlal kye etajaw, nyaꞌtx aꞌox kye aj galan kyenabꞌlin sinoke ax kye aj nyaꞌtx galan kyenabꞌlin. 19 Komo qa tzan tpaj etokslbꞌen tiꞌj te Qtata Dios nꞌok eten twitz xhchoꞌnal bꞌix kꞌontiꞌl epaj, ntons tzan tpaj nini okxtel jiqꞌbꞌaꞌ tzan te Qtat. 20 Per qa etetz owokel eten twitz xhchoꞌnal tzan tpaj ekꞌulbꞌen nyaꞌtx galan, ntons ¿tidiꞌ qiꞌj bꞌaꞌn tzan tqet ejiqꞌbꞌaꞌ etibꞌ qa etipaꞌtz tukyꞌi epasens bꞌix at epaj? Per qa etetz nꞌok eten twitz xhchoꞌnal tzan tpaj ekꞌulbꞌen galan, bꞌix nꞌetipaꞌ tukyꞌi epasens, te nini nꞌel galan tuj twitz Qtata Dios bꞌix okxtel tjiqꞌbꞌaꞌ. 21 Komo astilji te Qtat okxtzaj tukꞌleꞌ, bꞌix astilji te Krist owok ten twitz xhchoꞌnal tzan epaj, bꞌix okaj tsiꞌ tzan tel etin iktzaꞌx otkꞌuluj tetz. 22 Tetz kꞌontiꞌl xhchoj chꞌinwt, bꞌix kꞌontiꞌl oqet teqꞌiꞌ nijunwt tukyꞌi tyol.* 23 Aj tokbꞌaj yasoꞌ, kꞌontiꞌl owaj stzaqꞌbꞌeꞌ tukyꞌi jun yasbꞌil, bꞌix aj tqetbꞌaj kꞌuluꞌ joder, kꞌontiꞌl owaj tqꞌumaꞌ “Owelalkix achojoꞌ yatz,” sinoke cha okaj tqꞌapoꞌ tibꞌ tuj tqꞌabꞌ Qtata Dios aj nkyexik tpoqoꞌ kye xjal tukyꞌi tkawbꞌil tuj tqꞌabꞌ. 24 Axk tetz oxik tin te qchoj tuj xhchiꞌjel twitz krus, tzan kꞌon jkaj tuj tqꞌabꞌ te chojc bꞌix tzan qbꞌet tuj tumeꞌl. Bꞌix tzan tpaj te okꞌol aj owok tiꞌj, etetz okxqet qꞌanaꞌ.* 25 Etetz nkxbꞌet tuq oqtxiꞌ iktzaꞌ karner aj ojetq tuq kyekajnaj,* per ajnaꞌl oje kxꞌok lapet tiꞌj te Qajaw Jesukrist aj nqet kꞌulun kwent te etetz naqe jun pastoriyon bꞌix nxik tkꞌuluꞌ kwent te etanim.