5
Te Aj Okyꞌel Kyiꞌj Kye Qꞌinon Qa Nlay Kyebꞌet Tuj Tumeꞌl
1 Etetz aj qꞌinon aꞌix, instzaj echaꞌoꞌ ntzani: ¡Peꞌetoqꞌ, peꞌetxꞌaꞌyun, instzaj enaꞌon tetz tzan tpaj te aj xhchoꞌnal maꞌtx tzul etajsikni! 2 Kyaqil te eqꞌinomal aj kꞌuꞌuꞌ etitzaꞌ maꞌtx ponaj; bꞌix te eqꞌanaq maꞌtx qetbꞌaj pokꞌxik. 3 Te oro bꞌix plat aj at tuq te etetz, ya kꞌontiꞌl token;a bꞌix tzan tpaj te nini owokel en nyaꞌtx galan aꞌix bꞌix okxpoyon tnajsaꞌ iktzaꞌ tzan jun chman qꞌaqꞌ.* Etetz maꞌtx qetbꞌaj echimoꞌ eqꞌinomal tuj tmankbꞌil ja tyempni. 4 Kye xjal aj ejaw in twitz te etawal, ajnaꞌl nkyeqanin etiꞌj, komo kꞌontiꞌl oxik echojoꞌ twiꞌ kykꞌuꞌj, bꞌix te Qajawil aj nkꞌulun mandad tiꞌj kyaqil aj at tuj kaꞌj, tetz maꞌtx xik xhchaꞌoꞌ kywiꞌ kye xjal aj nkyeqanin etiꞌj.* 5 Yatzun etetz, maꞌtx kxꞌanqꞌin tzani twitz txꞌoꞌtxꞌ tukyꞌi tidiꞌchq bꞌan tbꞌanil bꞌix maꞌtx qet ekꞌuluꞌ tidiꞌchq aj nꞌel tganiꞌ te echiꞌjel, maꞌtx qet ewortinsaꞌ etibꞌb iktzaꞌ aloꞌmj aj okyeqtel kansaꞌ. 6 Etetz maꞌtx kyexik epoqoꞌ bꞌix maꞌtx kyeqet ekansaꞌ kye aj kꞌontiꞌl tuq kyil bꞌix kꞌontiꞌl tuq nkyejaw meltzꞌjik etiꞌj.
A Tgan Tzan Sten Nim Qpasens Bꞌix Tzan Qxnaqꞌtzan Witꞌlik Jkꞌuꞌj Tiꞌj Qtata Dios
7 Per etetz waq erman, insten epasens maxkix oj tul te Qajawil. Intok esiꞌ enabꞌl iktzaꞌx nkꞌulun jun xjal aj nꞌawan tawal. Tetz nꞌiyon tzan tok ten twitz tawal, nꞌiyon tukyꞌi tpasens tzan tkyaqul te tbꞌay toq jabꞌ bꞌix yaji tzan tajky te jabꞌ. 8 Ax ikxji etetz, insten waq epasens bꞌix peꞌeten waq jwert tuj etanim tzan tpaj chꞌinky tul te Qajawil. 9 Erman, kꞌon jaw equchiꞌ ewitz tiꞌj junky tzan kꞌon exik siꞌ tuj il, komo te [Qtata Dios] aj qꞌumal kyil kye xjal, tetz chꞌinky tul. 10 Erman, intok esiꞌ waq enabꞌl kyiꞌj kye aj yolil tyol Dios oqtxiꞌ aj eyolin iktzaꞌ tkyꞌixel Qajaw,c kyetz owok kyen twitz xhchoꞌnal bꞌix at tuq nim kypasens. 11 Intok eten, bꞌan galanx-alo kye aj eꞌipan nim xhchoꞌnal tukyꞌi kypasens. Etetz oje tzꞌok echaꞌoꞌ titzaꞌ te Job otipaj te xhchoꞌnal tukyꞌi tpasens bꞌix ax etebꞌen tidiꞌ otkꞌuluj te Qajawil tukyꞌiꞌl mas yaj.* Te Qajawil bꞌan galan nabꞌlin bꞌix nꞌok loꞌet tkꞌuꞌj qiꞌj.*
12 Bꞌix te aj mas presis waq erman, kꞌon xik esiꞌ ejurament tiꞌj te kaꞌj bꞌix ni tiꞌj te txꞌoꞌtxꞌ, kꞌon xik esiꞌ ejurament tiꞌj chꞌinwt. Qa a tgan tzan txik eqꞌumaꞌ “oꞌ” tiꞌj jun tidiꞌ, ntons intxik eqꞌumaꞌ aꞌox “oꞌ,” bꞌix qa a tgan tzan txik eqꞌumaꞌ “nlay” tiꞌj jun tidiꞌ, ntons intxik eqꞌumaꞌ aꞌox “nlay” [bꞌix kꞌontiꞌl tzan txik eqꞌumaꞌ tukyꞌi ejurament].* Ikxji tzan kꞌon exik siꞌ tuj il.
13 Qa at abꞌl jun te etetz nꞌok ten twitz bꞌis, intxnaqꞌtzan tukyꞌi Qtata Dios. Bꞌix te aj at jun chalajbꞌil tuj tanim, intbꞌitzan bꞌitz te Qtata Dios. 14 Qa at jun yabꞌ exol etetz erman, inktzaj etukꞌleꞌ kye tijxjal aj at kyajwalil exol, bꞌix kyetz okyexnaqꞌtzayon tiꞌj tukyꞌi tbꞌi te Qajawil bꞌix oqtel ksiꞌ chꞌimuꞌs aseyt tuj twiꞌ.d 15 Qa nqoxnaqꞌtzan bꞌix witꞌlik jkꞌuꞌj tiꞌj Qtata Dios [tzan tbꞌantik te yabꞌ], ntons obꞌantel te yabꞌ; te Qajawil oqtel tqꞌanaꞌ, bꞌix qa te yabꞌ at xhchoj, oqtel najsaꞌ. 16 [Astilji] intjatz eqꞌumaꞌ te echoj tukyꞌi junky exolx bꞌix peꞌexnaqꞌtzan waq etiꞌj exolx tzan ebꞌantik. Oj txnaqꞌtzan jun xjal aj nbꞌet tuj tumeꞌl tuj twitz Qtata Dios, nkyꞌik tidiꞌchq galan. 17 Te Eliys, tetz jun xjal tuq iktzaꞌx aꞌoꞌ, per aj txnaqꞌtzan nqet tuq twitz twitz Qtata Dios tukyꞌi jun tkꞌuꞌjlal, nqanin tuq tzan kꞌon stzaj te jabꞌ, bꞌix kꞌontiꞌl otzaj te jabꞌ oxe aqꞌbꞌi tukyꞌi mey.* 18 Yaji ya ma xnaqꞌtzan junkyꞌel [tzan stzaj te jabꞌ], otzoqpin junkyꞌel te jabꞌ, bꞌix tuj te txꞌoꞌtxꞌ ojatz te awalj junkyꞌel bꞌix otswaj twitz.*
A Tgan Tzan Tjaw Qin Kykꞌuꞌj Kye Aj Nkyeqet Tzꞌaqik
19 Waq erman, qa at jun te etetz okajel tkolaꞌ te bꞌanꞌax bꞌix qa junky qerman otkꞌuluꞌtz tzan tmeltzꞌjik junkyꞌel, 20 intok echaꞌoꞌ, abꞌl aj otkꞌuluꞌtz tzan tmeltzꞌjik jun joyol choj, tetz okoloyon tiꞌj tanim te xjal tzan kꞌon tponaj bꞌix ntkꞌuluꞌ tzan tqet najsaꞌ xhchoj te xjal anke nim xhchoj.*