4
Te Qꞌoj Nꞌok Tzan Tpaj Te Nyaꞌtx Galan Aj Nꞌel Qganiꞌ
1 ¿Jaꞌ ntzaj kyaqil te qꞌoj aj nꞌok exol etetz? ¿Tistil nkxluchꞌun exolx? ¿Nyaꞌtx petzun tzan tpaj te qꞌoj aj at tuj etanim tzan tpaj tidiꞌchq aj nꞌel eqꞌajabꞌ tiꞌj? 2 Etetz nꞌel eqꞌajabꞌ tiꞌj tidiꞌchq bꞌix kꞌontiꞌl nbꞌantik tzan toknoj etitzaꞌ, astilji nkxkansan* bꞌix nꞌok eqꞌojiꞌ junky tzan tpaj tidiꞌ tetz bꞌix kꞌontiꞌl nbꞌantik tzan toknoj etitzaꞌ. Astilji nkxluchꞌun bꞌix nkxjoyon qꞌoj exol. Kꞌontiꞌl nꞌoknoj etitzaꞌ te aj egan tzan tpaj kꞌontiꞌl nxik eqaniꞌ tukyꞌi Qtata Dios. 3 Qa nxik eqaniꞌ, kꞌontiꞌl ntzaj siꞌ tzan tpaj nyaꞌtx tumeꞌl nxik eqaniꞌ, tzan tpaj cha egan tzan tqet exqꞌeꞌlaꞌ tiꞌj tidiꞌ aj etetz egan. 4 Atx-al aꞌix ikxniꞌn, ikxji etetz maꞌtx kxjaw meltzꞌjik tiꞌj Qtata Dios.a ¿Tiꞌtzun, kꞌontiꞌl etebꞌen qa qetz nꞌel qganiꞌ tidiꞌchq iktzaꞌ aj nꞌel kyganiꞌ kye xjal aj kꞌontiꞌl nkyeꞌokslan Dios, ikxji nqoꞌok tajqꞌoj Qtata Dios?* 5 ¿Tiꞌtzun, nkxbꞌisun etetz qa nyaꞌtx bꞌanꞌax te Tuꞌjal Dios aj jaꞌ nyolin tiꞌj te ntzani? Komo nyolin ikxjani: “Te Qtata Dios aj oje tzaj tsiꞌ te qanim tuj qchiꞌjel, tetz bꞌan tgan tzan tok te qanim aꞌox te tetz.”* 6 Bꞌix tetz nꞌonen nim qukyꞌiꞌl, komo ax nyolin ikxjani: “Te Qtata Dios nqꞌojin kyiꞌj kye xjal aj nqet kyjiqꞌbꞌaꞌ kyibꞌ, per nꞌonen bꞌan nim kyukyꞌi kye xjal aj nqet kyokslaꞌ te tetz.”* 7 Intqet etokslaꞌ najji te Qtata Dios, bꞌix peꞌewaꞌlet tukyꞌi jun ebalor twitz te Tajaw Choj, bꞌix tetz owoqel ewitz. 8 Peꞌetok laqꞌchet tiꞌj Qtata Dios bꞌix tetz owokel laqꞌchet etiꞌj. Intkaj esiꞌ tzan ekꞌulun nyaꞌtx galan,b etetz waq aj chimol choj aꞌix. Etetz waq aj egan tzan etok lapet tiꞌj Qtata Dios bꞌix ax nꞌel eganiꞌ te nyaꞌtx galan twitz ja txꞌoꞌtxꞌni, intkaj ekolaꞌ te nyaꞌtx galan tzan tkaj saq te etanim. 9 Peꞌebꞌisun [tiꞌj te aj oje ekꞌuluj], instzaj enaꞌon tetz bꞌix peꞌeqet ten oqꞌel. Qa tbꞌay nkxtzeꞌen tuq [tiꞌj te nyaꞌtx galan, ajnaꞌl] mejor tzan etoqꞌ [tiꞌj te nini], bꞌix qa tbꞌay nkxchalaj tuq [tiꞌj te nyaꞌtx galan, ajnaꞌl] mejor tzan ebꞌisun [tiꞌj te nini]. 10 Instzaj enaꞌoꞌ tuj etanim te ekꞌulbꞌen nyaꞌtx galan tuj twitz Qajawil bꞌix tetz otkꞌuluꞌtz tzan tjaw tinky ekꞌuꞌj.*
11 Erman, kꞌon qet eyoliꞌ etibꞌx. Abꞌl aj nqet tyoliꞌ junky qerman, qatzun nyolin tidiꞌ nyaꞌtx galan nkꞌulun junky, ntons cha nyolin nyaꞌtx galan tiꞌj te Kawbꞌil aj otzaj tsiꞌ te Qtata Dios, bꞌix ikxji cha nxik tqꞌumaꞌ nyaꞌtx galan te Tkawbꞌil; bꞌix qa nxik tqꞌumaꞌ qa nyaꞌtx galan te Kawbꞌil, ntons kꞌontiꞌl nqet tokslaꞌ sinoke cha nyolin tiꞌj iktzaꞌ mas nim tajwalil tetz twitz te Kawbꞌil. 12 Aꞌox cha jun te aj okaj sin te Kawbꞌil, bꞌix aꞌox tetz bꞌaꞌn tzan tpoqon xjal bꞌix bꞌaꞌn tzan tkolon jun xjal, bꞌix bꞌaꞌn tzan tpon tnajsaꞌ. ¿Per abꞌl yatz aꞌich tuj anabꞌl tzan txik aqꞌumaꞌ til junky abꞌl yatz?
13 Ajnaꞌl instzaj echaꞌoꞌ etetz waq aj nꞌeqꞌumaꞌ ikxjani: “Ajnaꞌl qa nchiꞌjji, oqoxeꞌl tuj junky amaqꞌ, bꞌix oqoxeꞌl teyona jun aqꞌbꞌi, qoxkꞌaꞌmayona tzi bꞌix owokel nim qtumin.” 14 Per etetz kꞌontiꞌl etebꞌen qa itzꞌojix nchiꞌj. Te etanqꞌin cha iktzaꞌ muj, njaw kanet cha jun rat bꞌix junky rat nqet naj.* 15 Mas tumeꞌl tzan txik eqꞌumaꞌ ikxjani: “Qa te Qajawil tgan bꞌix qa itzꞌojoꞌ, oqtel jkꞌuluꞌ ntzani qatzun junky tidiꞌji.” 16 Per etetz nim nqet ejiqꞌbꞌaꞌ etibꞌ, bꞌix oj tqet qjiqꞌbꞌaꞌ qibꞌ, nyaꞌtx galan. 17 Abꞌl te aj tebꞌen titzaꞌ tzan tkꞌulun jun galan bꞌix qa kꞌontiꞌl nqet tkꞌuluꞌ ikxniꞌn, njoyon choj.