3
Intok Qsiꞌ Qnabꞌl Byenech Tiꞌj Te Aj Nxik Qyoliꞌ
1 Erman, kꞌon kyeꞌok kyꞌilaꞌj exol etetz aj kygan tzan kxnaqꞌtzan txqꞌanky, komo kye aj nxik kxnaqꞌtzaꞌ txqꞌanky, te Qtata Dios mas owokel tsiꞌ tnabꞌl kyiꞌj titzaꞌ nkyebꞌet. 2 Komo qkyaqil qetz, tidiꞌchq nyaꞌtx galan nqokꞌulun. Qa at abꞌl aj kꞌontiꞌl nyolin jun nyaꞌtx galan, tetz jun xjal bꞌan galan bꞌix nbꞌantik tzan tkꞌulun mandad tiꞌjx. 3 Iktzaꞌx oj tox qsiꞌ fren tuj stziꞌ jun kway, te kway nqoqet tokslaꞌ, bꞌix ikxji ax bꞌaꞌn tzan txik qin jaꞌ qetz qgan. 4 Bꞌix ax intok esiꞌ enabꞌl kyiꞌj kye chman bark aj nkyebꞌet tuj te nim aꞌ. Anke bꞌan chmanot-eꞌ bꞌix tzan jun nim kyaqꞌiqꞌ bꞌaꞌn tzan kxik in, per tzan jun chꞌi tal kꞌuxbꞌil bꞌan chꞌi nekit bꞌaꞌn tzan kybꞌet aj jaꞌ te chofer tgan. 5 Ax ikxji nkyꞌik tukyꞌi te qaqꞌ. Te qaqꞌ bꞌan chꞌi nekit per tukyꞌi qaqꞌ bꞌaꞌn tzan tqet qjiqꞌbꞌaꞌ qibꞌ nim, iktzaꞌx tzan jun chꞌi tal qꞌaqꞌ bꞌaꞌn tzan tqet tzꞌeꞌk jun nim witz titzaꞌ. 6 Te qaqꞌ iktzaꞌ jun qꞌaqꞌ bꞌix bꞌaꞌn tzan tkꞌulun tidiꞌchq nyaꞌtx galan.* Te qaqꞌ jun chꞌi part te qchiꞌjel bꞌan nekit, per bꞌaꞌn tzan tkꞌulun jun nyaꞌtx galan qiꞌj, bꞌix nkꞌulun jun nyaꞌtx galan tiꞌj kyaqil qanqꞌin, komo te qaqꞌ iktzaꞌ jun qꞌaqꞌ aj ntilun tzan tpaj te nim qꞌaqꞌ aj ni kꞌontiꞌl nqextzaj. 7 Kyaqil txakl txkup bꞌix pichꞌ bꞌix txkup aj cha nkyexik jilin bꞌix txkup tuj aꞌ, bꞌaꞌn tzan kykꞌulun mansar kye xjal kyiꞌj bꞌix oje kyeqet kꞌuluꞌ mansar tzan kye xjal.* 8 Per nijunwt xjal bꞌaꞌn tzan tqet te taqꞌx titzaꞌ. Te qaqꞌ jun part te qchiꞌjel aj nkꞌulun tidiꞌchq nyaꞌtx galan bꞌix tuj qtziꞌ nꞌetz tidiꞌchq iktzaꞌ jun benen aj bꞌaꞌn tzan tkansan. 9 Tukyꞌi te qaqꞌ bꞌaꞌn tzan qyolin yol bꞌan galan tiꞌj te Qajawil bꞌix Qtat tuj kaꞌj, bꞌix ax tukyꞌi te qaqꞌ ntzaj jqanbꞌeꞌ nyaꞌtx galan kyajsik txqꞌanky xjal aj kꞌulumeꞌ [tzan te Qtata Dios] tzan kyten iktzaꞌx tetz. 10 Tuj axkix te qtziꞌ nꞌetz yol tzan qkyꞌiwlan xjal bꞌix nꞌetz yol tzan jqanbꞌen kyajsik txqꞌanky. Erman, te ja ntzani nyaꞌtx galan. 11 ¿Tuj jun soch tzun petzun njatz xhbꞌurbꞌuꞌin txqꞌan saq aꞌ bꞌix txqꞌanky kaparros aꞌ? 12 Bꞌix ax tiꞌj jun wiꞌ igos, ¿tzun petzun ntswaꞌ twitz, twitz aseytunas? Bꞌix ax tiꞌj jun wiꞌ ub, ¿tzun petzun ntswaꞌ twitz, twitz igos? Bꞌix ax jun soch aj jaꞌ njatz kꞌakꞌj aꞌ nlay bꞌantik tzan tjatz saq aꞌ tuj.
Titzaꞌ Nꞌok En Qa Nqobꞌisun Tuj Jun Tumeꞌl
13 ¿Abꞌl jun exol etetz nbꞌisun tuj tumeꞌl bꞌix jun chaꞌon? Ntons intqet tyekꞌuꞌ titzaꞌ nbꞌet tuj tumeꞌl bꞌix titzaꞌ nkꞌulun kyaqil galan kyukyꞌi kye xjal tukyꞌi jun tnabꞌl bꞌan galan tzan tpaj bꞌaꞌn bꞌisun tuj tumeꞌl. 14 Per qa nꞌok eqꞌojiꞌ tuj etanim jun abꞌl tzan tpaj jun tidiꞌ tetz, bꞌix qa nꞌel eganiꞌ tidiꞌchq tzan tok te etetz, kꞌon qet ejiqꞌbꞌaꞌ etibꞌ bꞌix kꞌon kxnikꞌon tiꞌj alkyetz te tumeꞌl bꞌanꞌax. 15 Te ja tumeꞌl titzaꞌ nkxbꞌisun, nyaꞌtx tukyꞌi Qtata Dios ntzaj, sinoke te nini cha aj twitz txꞌoꞌtxꞌ, cha tuj kywiꞌx kye xjal nꞌetz, bꞌix jun tidiꞌ aj ntzaj tukyꞌi te Tajaw Choj. 16 Komo qa at qꞌoj tuj kyanim kye xjal bꞌix qa nꞌel kyganiꞌ tidiꞌchq tzan tok te kyetzx, kxol kyetz kꞌontiꞌl jun tumeꞌl bꞌix tidiꞌchq nyaꞌtx galan nkyekꞌulun. 17 Per [jun xjal aj at] jun tnabꞌl bꞌan galan aj ntzaj tukyꞌi Qtata Dios, te nini kꞌontiꞌl jun nyaꞌtx galan tiꞌj bꞌix kꞌontiꞌl njoyon qꞌoj, galan nabꞌlin kyukyꞌi kye txqꞌanky, nꞌok tsiꞌ twiꞌ tiꞌj aj nkyyoliꞌ txqꞌanky, bꞌan nim nꞌok loꞌet tkꞌuꞌj kyiꞌj txqꞌanky, bꞌix nkꞌulun tidiꞌchq galan, bꞌix jun yolin bꞌix nyaꞌtx xmeletzꞌ. 18 Kye aj nkyejoyon tumeꞌl tzan kyten galan kyaqil kye xjal kxolx, kyetz kykꞌulbꞌen nꞌel te jun galan tuj twitz Qtata Dios.