2
A Tgan Tzan Kyqet Qen Kyaqil Parej
1 Etetz waq erman aj witꞌlik ekꞌuꞌj tiꞌj Qajaw Jesukrist aj at nim tajwalil, kꞌon tzꞌok eteꞌeꞌ jun xjal mas twitz junky. 2 Ntons qokyi-wit etetz nꞌok echimoꞌ etibꞌ bꞌix owokex jun xjal bꞌan qꞌinon, ateꞌok txmulqꞌabꞌ pur xtxꞌotxꞌal or bꞌix tqꞌanaq pur tbꞌanil xqꞌapj, bꞌix yaji owokex junky xjal chꞌi mebꞌaꞌ xjal bꞌix te tqꞌanaq bꞌan tzꞌil. 3 Bꞌix qokyi-wit etetz aꞌox owokel esiꞌ ekꞌuꞌj tiꞌj te qꞌinon bꞌix oxeꞌl eqꞌumaꞌ tetz ikxjani: “Paqet witꞌlet yatz tzani tuj ja tbꞌanil witꞌleljni,” bꞌix te aj chꞌi mebꞌaꞌ oxeꞌl eqꞌumaꞌ tetz ikxjani: “Yatz cha paqet waꞌlet txini, o mejor paqet witꞌlet tzani txeꞌ woq.”a 4 Ntons [qa nkxkꞌulun etetz ikxji] ¿kꞌontiꞌl petzun nꞌel etikꞌoꞌ te jun twitz te junky? Bꞌix ikxji nꞌok esiꞌ enabꞌl kyiꞌj xjal tukyꞌi jun enabꞌl nyaꞌtx tumeꞌl.
5 Waq erman aj ganimix witzaꞌ, instzaj echaꞌoꞌ te ntzani: ¿Kꞌontiꞌl petzun eꞌel tjoyoꞌ te Qtata Dios kye mebꞌaꞌ xjal tzani twitz txꞌoꞌtxꞌ, tzan kyok kyetz bꞌan qꞌinon titzaꞌ witꞌlik kykꞌuꞌj tiꞌj? Komo oje xik tsiꞌ tyol tzan kykꞌamon tukyꞌiꞌl jun kyajwalil kyaqil kye aj nkyeqet ganin tetz. 6 Bꞌix etetz nkyeꞌel etikꞌoꞌ kye mebꞌaꞌ xjal. ¿Nyaꞌtx petzun aꞌeꞌ kye qꞌinon aj nkyeqetbꞌaj kꞌulun joder te etetz, bꞌix nkyexik eqꞌin etetz alajwers tuj despach? 7 ¿Nyaꞌtx petzun aꞌeꞌ kyetz kye aj nkyeyolin bꞌan nyaꞌtx galan tiꞌj te Jesukrist aj bꞌan galan nabꞌlin bꞌix tetz Qajawil? 8 Qa etetz bꞌanꞌax nqet etokslaꞌ te Kawbꞌil aj mas presis iktzaꞌxkix tzꞌibꞌankaj tuj Tuꞌjal Dios ikxjani: “Intqet aganiꞌ junky abꞌl yatz iktzaꞌx nqet aganiꞌ awibꞌx,”* qa nkxkꞌulun ikxji, ntons etetz nkxkꞌulun tumeꞌl. 9 Per qa etetz nkyeꞌel etikꞌoꞌ txqꞌan kywitz kye txqꞌanky, ntons nkxjoyon choj, bꞌix axk te Tkawbꞌil Qtata Dios nyolin etiꞌj etetz at epaj. 10 Komo qa jun xjal nqet tokslaꞌ kyaqil te Kawbꞌil [aj okaj tqꞌumaꞌ te Qtata Dios oqtxiꞌ] bꞌix qa npaltin chꞌimuꞌs tiꞌj jun tidiꞌ, ikxji at til tiꞌj kyaqil te Kawbꞌil. 11 Komo axk te Qtata Dios aj okaj qꞌuman “kꞌon chkꞌajajin,”* ax okaj tqꞌumaꞌ “kꞌon chkansan.”* Ntons qa etetz kꞌontiꞌl nkxkꞌajajin, per nkxkansan, ikxji kꞌontiꞌl nqet etokslaꞌ te Kawbꞌil. 12 Ntons etetz a tgan tzan eyolin bꞌix tzan ebꞌet tuj tumeꞌl tzan tpaj kolpimix tzan te junky kawbꞌil aj nkolpin qetz. 13 Komo kye aj kꞌontiꞌl maꞌtx tzꞌok loꞌet kykꞌuꞌj tiꞌj junky, ax ikxji okyexeꞌl poqoꞌ, nlay tzꞌok loꞌet tkꞌuꞌj [te Qtata Dios] kyiꞌj. Yatzun kye aj nꞌok loꞌet kykꞌuꞌj kyiꞌj txqꞌanky, kyetz kꞌontiꞌl tzan kxobꞌ oj tul te jwisy.
Qa Bꞌanꞌax Witꞌlik Jkꞌuꞌj Tiꞌj Qtata Dios, Owokel Eꞌelet Jun Jkꞌulbꞌen Galan
14 Ntons waq erman ¿tidiꞌ jun galan nꞌok qa jun xjal oxeꞌl tqꞌumaꞌ, “Wetz witꞌlik nkꞌuꞌj tiꞌj Qtata Dios” okyitel, per qa kꞌontiꞌl nqet tyekꞌuꞌ tukyꞌi jun tkꞌulbꞌen galan? ¿Oꞌ petzun okoletel tzan tpaj [cha aꞌox txiklen tqꞌumaꞌ] witꞌlik tkꞌuꞌj? 15 Qa jun qerman ichan qatzun xujji, bꞌan chꞌi mebꞌaꞌ xjal kꞌontiꞌl tqꞌanaq bꞌix npaltin tweꞌ, 16 bꞌix jun te etetz oxeꞌl tqꞌumaꞌ, “Kyebꞌaꞌ txik, naꞌojxwit qꞌuqꞌl bꞌix nojnaqxwit akꞌuꞌj” okyitel, per qa nlay xik tsiꞌ te aj presis te tetz, ¿tidiꞌ token te aj nxik tqꞌumaꞌ? Chagan. 17 Ntons ax ikxji nkyꞌik tukyꞌi te tumeꞌl titzaꞌ nꞌok qwitꞌbꞌaꞌ jkꞌuꞌj tiꞌj te Qtata Dios: Qa kꞌontiꞌl nqet qyekꞌuꞌ tukyꞌi jun jkꞌulbꞌen galan, ikxji kꞌontiꞌl token.
18 Qanq at abꞌl otzajel tqꞌumaꞌ ikxjani: “Yatz [nchyolin] witꞌlik akꞌuꞌj tiꞌj Qtata Dios, yatzun wetz at tidiꞌchq nkꞌulbꞌen galan. Intqetchaq ayekꞌuꞌ te tumeꞌl titzaꞌ witꞌlik akꞌuꞌj qa kꞌontiꞌl jun akꞌulbꞌen galan nꞌakꞌuluꞌ, bꞌix wetz tukyꞌi nkꞌulbꞌen galan oqtel nyekꞌuꞌ titzaꞌ wetz witꞌlik nkꞌuꞌj tiꞌj Qtata Dios. 19 Yatz nxik awokslaꞌ cha jun te Qtata Dios at. Nini galan per ax kye malspirit nxik kyokslaꞌ ikxji, bꞌix twitz tetz kyetz bꞌan nkyeluꞌlun tzan kxobꞌal.”b
20 Etetz kꞌon kxchꞌok mokꞌ; intox tuj ewiꞌ te tumeꞌl titzaꞌ nꞌok qwitꞌbꞌaꞌ jkꞌuꞌj tiꞌj te Qtata Dios. Qa kꞌontiꞌl nꞌok en jun jkꞌulbꞌen galan, ntons chagan titzaꞌ witꞌlik jkꞌuꞌj. 21 Instzaj enaꞌoꞌ te qijajil Abran. ¿Nyaꞌtx petzun tzan tpaj te aj oqet tkꞌuluꞌ aj txik tqꞌapoꞌ te Isak aj tkꞌajol twiꞌ te tzꞌeꞌsbꞌil ikxji owel tuj twitz Qtata Dios iktzaꞌ ya kꞌontiꞌl xhchoj?* 22 Nꞌok eten ajnaꞌl titzaꞌ tuq nqet tkꞌuluꞌ te Abran, titzaꞌ witꞌlik tuq tkꞌuꞌj tiꞌj Qtata Dios bꞌan parej iktzaꞌx tuq tkꞌulbꞌen; ikxji titzaꞌ witꞌlik tuq tkꞌuꞌj owok bꞌan kabal bꞌix tumeꞌl tukyꞌi tkꞌulbꞌen. 23 Ikxji oponkix iktzaꞌx nyolin tuj Tuꞌjal Dios ikxjani: “Te Abran oxik tokslaꞌ [tyol] Qtata Dios, bꞌix tzan tpaj tokslbꞌen, owel tuj twitz te Qtat iktzaꞌ ya kꞌontiꞌl xhchoj,”* bꞌix ikxji tetz owok qꞌumaꞌ jun tajyol te Qtata Dios.* 24 Ntons ajnaꞌl nꞌel enikyꞌ, jun xjal nꞌel tuj twitz Qtata Dios iktzaꞌ ya kꞌontiꞌl xhchoj tzan tpaj nkꞌulun iktzaꞌ te Qtata Dios tgan bꞌix nyaꞌtx aꞌox tzan tpaj toklen witꞌlet tkꞌuꞌj tiꞌj. 25 Ax ikxji okyꞌik oqtxiꞌ tukyꞌi te Raáb te aj xuj aj kꞌayil tibꞌ. Tetz owel tuj twitz Qtata Dios iktzaꞌ kꞌontiꞌl xhchoj tzan tpaj aj otkꞌuluj, kyqetlen tkꞌamoꞌ tuj tjay kye aj xhlukꞌiyon bꞌix exik tlajoꞌ tzan kxik tuj junky bꞌey [tzan kykolet].* 26 Ntons ax iktzaꞌx te qchiꞌjel; qa kꞌontiꞌl te qanim, ntons kꞌontiꞌl itzꞌojoꞌ, bꞌix ax ikxji oj tok witꞌlet jkꞌuꞌj tiꞌj Qtata Dios, qa kꞌontiꞌl jun jkꞌulbꞌen galan, ntons ax kꞌontiꞌl token te tumeꞌl titzaꞌ witꞌlik jkꞌuꞌj.