4
Kꞌontiꞌl Tzan Tkaj Qsiꞌ Tzan Qpakbꞌan Te Tpakbꞌalil Galan
1 Ntons, wetz twitz te Qtata Dios bꞌix Qajaw Kristo Jesus aj qꞌumal kyil kye aj itzꞌojeꞌ bꞌix kye aj kamnaqeꞌ, bꞌix tzan tpaj tetz tzul bꞌix okajel kyaqil tuj tqꞌabꞌ, oxeꞌl nqꞌumaꞌ yatz ikxjani: 2 Intxik apakbꞌaꞌ chꞌin te tpakbꞌalil galan tuj kyaqil tyemp bꞌisuꞌ qa nyaꞌtxji; intxik akubꞌsaꞌ kykꞌuꞌj tzan kyokslan, intxik aqꞌumaꞌ alkyetz te aj nyaꞌtx galan aj nkykꞌuluꞌ, inkxik akawiꞌ, bꞌix panimsan kykꞌuꞌj [titzaꞌ tzan kyanqꞌin tuj tumeꞌl], bꞌix kyaqil nini tukyꞌi apasens, bꞌix paxnaqꞌtzan kyetz. 3 Komo tzul jun qꞌij kye xjal nlay kykꞌamoj te xnaqꞌtzbꞌilj aj bꞌan tumeꞌl tiꞌj te Qtata Dios; sinoke tzan tpaj ktzꞌakal kyetzx, okyeqtel kyjoyoꞌ kyꞌilaꞌj aj okyexnaqꞌtzayon kxol, per aꞌox aj kygan kyetz chaꞌon. 4 Kyetz nlay ktzoqpij tzan tok kchaꞌoꞌ te bꞌanꞌax bꞌix owokel ksiꞌ kywiꞌ tiꞌj tidiꞌchq xnaqꞌtzbꞌilj aj nyaꞌtx bꞌanꞌax. 5 Per yatz, intok asiꞌ anabꞌl byenech, ipaj te kyaqil xhchoꞌnal, intok asiꞌ akꞌuꞌj tzan apakbꞌan te tpakbꞌalil titzaꞌ nqokolet, pakꞌulun galan kyaqil te awaqꞌun te Qtata Dios.
6 Per yatzun wetz, cha chꞌinky nkamik, chꞌinky nxik qꞌapoꞌ iktzaꞌ jun oyej te Qtata Dios. 7 Maꞌtx kyinꞌaqꞌunana nim tuj taqꞌun Qtata Dios, maꞌtx kyinpon aj jaꞌ tuq ngan tzan npon,b bꞌix kꞌontiꞌl maꞌtx kaj nkolaꞌ tzan tok witꞌlet nkꞌuꞌj [tiꞌj Krist]. 8 Ajnaꞌl [chꞌinky] tzan nkꞌamon te tbꞌanil aj otzajel tsiꞌ te Qajawil wetz tzan tpaj nkyinbꞌet tuj tumeꞌl, ntons te Qajaw aj pujul il aj at tkawbꞌil tuj tqꞌabꞌ, tetz otzajel tsiꞌ te aj tbꞌanil wetz oj tul junkyꞌel, bꞌix nyaꞌtx aꞌox te wetz sinoke ax kye kyaqil kye aj nkyechalaj tzan tul.
Junjun Tidiꞌ Aj Presis Tuq Tzan Tkꞌulun Te Timotey
9 Tzaj asakꞌsoꞌ tzan awul qꞌolbꞌel wetz naj. 10 Komo te Démas* owel tganiꞌ mas tidiꞌchq aj at tzani twitz ja txꞌoꞌtxꞌni, ajnaꞌl maꞌtx kyinkaj tkaꞌyiꞌ, maꞌtx xik amaqꞌ Tesalonk. Te Kresent maꞌtx xik tuj tkwentil Galasy, bꞌix te Tit* tuj Dalmasy. 11 Aꞌox te Luks* atqet wukyꞌiꞌl. Intqet ajoyoꞌ te Mak* bꞌix instzaj awin awukyꞌiꞌl, komo tetz owoneyon wukyꞌiꞌl tzani tuj waqꞌun te Qtata Dios. 12 Te Tíkiko* maꞌtx xik nlajoꞌ tuj amaqꞌ Efeso. 13 Oj atzaj, otzajel awin chꞌin te ntxoꞌw aj okaj nsiꞌ tuj amaqꞌ Troas* tuj tjay Karp, bꞌix ax kye uꞌj bꞌix te aj mas presis kye uꞌj pergamino.
14 Te Jant* aj nꞌaqꞌunan tukyꞌi kꞌuxbꞌil, tetz tidiꞌchq nyaꞌtx galan maꞌtx tkꞌuluj wiꞌj; Qtata Dios xik sinxwit tetz iktzaꞌx aj maꞌtx tkꞌuluj.* 15 Ax yatz intok asiꞌ anabꞌl tiꞌj tzan tpaj tetz nim nꞌaqꞌunan tzan kꞌon txik okslaꞌ te aj nxik qpakbꞌaꞌ.
16 Aj nxwaꞌq tbꞌay-el [kywitz kye aj at kyajwalil] tzan txik nqꞌumaꞌ qa at tuq wil, nijunwt eꞌonen wiꞌj, kyaqil inkaj kykolaꞌ. Kꞌonxwit kyexik siꞌ tuj il tzan tpaj nini. 17 Per te Qajawil oqet ten wukyꞌiꞌl bꞌix otzaj tsiꞌ nbalor tzan txik npakbꞌaꞌ kyaqil te tpakbꞌalil aj nkolon qetz, bꞌix ikxji tzan tok kchaꞌoꞌ kye aj kꞌontiꞌl nkyeꞌokslan. Ikxji te Qajawil inꞌel tkoloꞌ tuj tqꞌabꞌ te nyaꞌtx galan.c 18 Te Qajawil okyintkoloꞌtz tiꞌj kyaqil aj nyaꞌtx galan bꞌix okyintkoloꞌtz tzan nten tukyꞌiꞌl tuj kaꞌj. Intqetxwit jiqꞌbꞌaꞌ tetz te jun-eleꞌx. Kyꞌikxwit ikxji.
Jun Kawbꞌil
19 Intxik asiꞌ jun limbꞌil te qerman Akiy bꞌix Xhil,* bꞌix kye aꞌeꞌ aj tuj tjay te Onesíforo.* 20 Te Erast* okaj tuj amaqꞌ Korint, bꞌix te Trófimo* yabꞌ tuq, okaj nsiꞌ tuj amaqꞌ Milet.
21 Tzaj asakꞌsoꞌ chꞌin tzan awul minaꞌ tuq qok jabꞌalil. Jun limbꞌil te yatz tzan Eubúlos bꞌix tzan te Pudénte, bꞌix tzan te Lin bꞌix ax tzan Claudia bꞌix tzan kyaqil kye aꞌeꞌ qerman.
22 Qajaw Jesukrist qet tenxwit awukyꞌiꞌl bꞌix tzaj tsiꞌxwit te Qtata Dios jun nim bꞌan galan awajsik.