3
Titzaꞌ Okyebꞌetel Kye Xjal Mas Yajxiꞌ Chꞌinky Tuq Tul Te Qajawil
1 Ntons, ax presis tzan tok achaꞌoꞌ ntzani: Tuj jun tyemp aj tzul mas yaj, aj chꞌinky tuq tul te Qajawil, owokel eꞌelet twitz nim xhchoꞌnal. 2 Kye xjal cha aꞌox owokel ksiꞌ kykꞌuꞌj kyiꞌjx kyetz, cha kybꞌisunqet tiꞌj kytumin, cha kyjiqꞌbꞌanqet kyibꞌ, cha kykꞌulunqet iktzaꞌ kyetz kygan, cha kyyolinqet nyaꞌtx galan tiꞌj Qtata Dios, nlay qet kyokslaꞌ kytat, nlay xik ksiꞌ pixon te nijunwt, cha kykꞌulunqet nyaꞌtx galan, 3 nlay qet kyganiꞌ nijunwt, nlay tzꞌok loꞌet kykꞌuꞌj tiꞌj junky, cha ojawel kynikꞌoꞌ yol kyiꞌj xjal, luwew okyejawel qꞌojlik, okyekꞌuluyon kyukyꞌi txqꞌanky iktzaꞌ kꞌontiꞌl Dios tuj kywitz, owelal kyikꞌoꞌ kyaqil aj galan, 4 okyejawel meltzꞌjik tiꞌj junky, tidiꞌchq okyekꞌuluyon bꞌix kꞌontiꞌl kkyꞌexaw, tuj kynabꞌl kyetz bꞌan galan-eꞌ, cha owelal kyganiꞌ te aj tgan te kchiꞌjel bꞌix nlay tzꞌel kyganiꞌ Qtata Dios. 5 Kyetz okyeꞌokel en iktzaꞌ xjal aj nkyexjanin Qtata Dios, per nyaꞌtx bꞌanꞌax kyitzaꞌ tzan tpaj kꞌontiꞌl okykꞌamoj tajwalil Qtata Dios kyiꞌj. Kꞌon tzꞌox asamoꞌ awibꞌ kxol aj xjal ikxji. 6 Komo kxol kyetz ateꞌ kye aj nkyeꞌewlaj tzan kyox tuj jun jay kyukyꞌi xuj aj nyaꞌtx jwert-eꞌ, ikxji tzan kykaj tuj kyqꞌabꞌ kyetz, xuj aj cha kyjoyonqet choj bꞌix tidiꞌchq aj nꞌel kyganiꞌ. 7 Koꞌchq nkyexik xnaqꞌtzaꞌ per kꞌontiꞌl nꞌox tuj kywiꞌ te bꞌanꞌax. 8 Iktzaꞌx te Jans bꞌix te Jambrs ejaw qꞌojlik tiꞌj Moisés,a bꞌix nkyeyolin tuq nyaꞌtx galan tiꞌj te bꞌanꞌax, ax kye aj xjal ajnaꞌl cha pur tidiꞌchq nyaꞌtx bꞌanꞌax nkybꞌisuꞌ, kꞌontiꞌl witꞌlik kykꞌuꞌj tiꞌj Qtata Dios bꞌan bꞌanꞌax. 9 Per nlay kykꞌuluj masky, [kyekyinal kyetz qa ikx oxeꞌl kymañji] tzan tpaj kyaqil kye xjal okyeꞌokel eꞌen kyetz bꞌan mokꞌ-eꞌ, iktzaꞌx okyꞌik kyiꞌj kye kabꞌeꞌ aj ejaw qꞌojlik tiꞌj Moisés.
Kꞌontiꞌl Tzan Tkaj Jkolaꞌ Te Tumeꞌl Anke Kye Xjal Tiꞌchq Okykꞌuluꞌtz
10 Per yatz awebꞌen bꞌix eqꞌiꞌ awitzaꞌ, te aj nxik nxnaqꞌtzaꞌ tiꞌj Qtata Dios, bꞌix ax te tumeꞌl iktzaꞌ nkyinbꞌet, bꞌix iktzaꞌ aj ngan wetz, bꞌix iktzaꞌ wetz witꞌlik nkꞌuꞌj, bꞌix iktzaꞌ wetz npasens, bꞌix iktzaꞌ wetz nkyeqet nganiꞌ txqꞌanky, bꞌix iktzaꞌ wetz nkyinꞌipan xhchoꞌnal. 11 Ax awebꞌen titzaꞌ wetz injaw lajoꞌ, bꞌix titzaꞌ tuq te xhchoꞌnal aj owok wen tuj Antyokiy* bꞌix tuj Ikony* bꞌix Listr.* Tidiꞌchq nyaꞌtx galan aj oje kyꞌik wiꞌj, per te Qajawil intkoloj tiꞌj kyaqil. 12 Kyaqil kye aj kygan tzan kyanqꞌin mojbꞌaꞌ kyibꞌ tukyꞌi Kristo Jesus, okyejawel lajoꞌ, owokel kyen twitz xhchoꞌnal. 13 Per kye xjal aj nkyekꞌulun nyaꞌtx galan, bꞌix kye aj nkyeqet kyeqꞌiꞌ txqꞌanky, cha masky oqtel kybꞌantzaꞌ kyibꞌ, okyeqtel kyeqꞌiꞌ txqꞌanky bꞌix ax kyetz okyeqtel eqꞌiꞌ.
14 Yatzun yatz kꞌon kaj akolaꞌ tzan txik aweqꞌiꞌ kyaqil aj otzaj xnaqꞌtzaꞌ yatz bꞌix oxik awokslaꞌ, komo awebꞌen abꞌl otzaj xnaqꞌtzan te yatz. 15 Komo atx aj man tuq nekitich owok awotzqilaꞌ te Tuꞌjal Dios, te Tuꞌjal aj bꞌaꞌn tzan txik tsiꞌ jun anabꞌl tzan tel anikyꞌ titzaꞌ tzan jkolet tzan tpaj witꞌlik jkꞌuꞌj tiꞌj Kristo Jesus. 16 Kyaqil te Tuꞌjal Dios, Diosx otzaj yolin tetz, bꞌix at nim token tzan qtzaj txnaqꞌtzaꞌ, bꞌix tzan stzaj tqꞌumaꞌ alkyetz te nyaꞌtx galan aj njkꞌuluꞌ, bꞌix tzan qtzaj tkawiꞌ alkyetz te galan tzan jkꞌulun, bꞌix tzan qtzaj txnaqꞌtzaꞌ titzaꞌ tzan qbꞌet tuj tumeꞌl. 17 Ikxji jun aj nꞌaqꞌunan te Qtata Dios, xnaqꞌtzamaj bꞌix oje tzaj siꞌ jun tnabꞌl tzan tkꞌulun tidiꞌchq galan.