2
Titzaꞌ Tzan Qipan Oj Tok Qen Twitz Jun Xhchoꞌnal
1 Yatz nkꞌajol, paten jwert tzan tpaj te aj nim bꞌan galan aj ntzaj tsiꞌ Kristo Jesus awajsik. 2 Te aj owok achaꞌoꞌ aj nxik tuq nqꞌumaꞌ kywitz kyꞌilaꞌj xjal, ax yatz intxik aqꞌumaꞌ ikxji kyukyꞌi kye aj kꞌontiꞌl nkaj kykolaꞌ [tzan kyokslan te Qtata Dios] bꞌix bꞌaꞌn tzan txik kxnaqꞌtzaꞌ txqꞌanky.
3 Ax intxik awin chꞌin yatz aj xhchoꞌnal aj nꞌok qena, iktzaꞌx jun soldad galan [ntipaꞌ tidiꞌchq xhchoꞌnal]. 4 Bꞌix jun soldad [galan] kꞌontiꞌl nꞌox tsamoꞌ tibꞌ tuj tidiꞌchq kxol kye xjal tzan tpaj tgan tzan tkaj galan tuj twitz te twitzaleꞌ kꞌulul mandad tiꞌj. 5 [Bꞌix ax ikxji] tiꞌj jun saqchbꞌilon, tzan tkambꞌan te aj tgan, presis tzan kꞌon tkaj tsiꞌ tzan tsaqchbꞌilan tukyꞌi tumeꞌl. 6 [Bꞌix ax ikxji] tiꞌj jun aj nqet taqꞌunaꞌ xtxꞌoꞌotxꞌ, qa tgan tzan tkꞌamon twitz te awalj, a tgan tbꞌay tzan taqꞌunan byenech tiꞌj. 7 Intqet abꞌisuꞌ tiꞌj aj nxik nqꞌumaꞌni, bꞌix te Qajawil oxeꞌl tsiꞌ jun anabꞌl tzan tel anikyꞌ tiꞌj kyaqil.
8 Instzaj anaꞌoꞌ te Jesukrist aj tijajil Dawid.a Tetz ojaw anqꞌin kxol kye kamnaq, bꞌix aj ntzaꞌn te tpakbꞌalil galan aj nxik npakbꞌaꞌ. 9 Tzan tpaj te ja tpakbꞌalilni wetz nꞌok wen twitz xhchoꞌnal, bꞌix kꞌalomin tukyꞌi kaden [tuj pres] naqe jun eleqꞌ aꞌin, per te tyol Qtata Dios nyaꞌtx kꞌaloꞌ. 10 Astilji wetz nwipaꞌ tidiꞌchq ja xhchoꞌnalni tzan kypaj kyaqil kye aj joyomeꞌ tzan Qtata Dios, tzan kykoletky tzan Kristo Jesus tzan tok kyen xhchqitzꞌunal te jun-eleꞌx. 11 Ja yol ntzani bꞌanꞌax: Qa qokamel tukyꞌiꞌl, ax oqoꞌanqꞌiyon tukyꞌiꞌl. 12 Qa qipaꞌtz twitz xhchoꞌnal, ax oqokꞌuluyon mandad oj tkaj kyaqil tuj tqꞌabꞌ.* Qa qetz oxeꞌl jqꞌumaꞌ kꞌontiꞌl qotzqiꞌ tetz, ax tetz oxeꞌl tqꞌumaꞌ kꞌontiꞌl totzqiꞌ aꞌoꞌ.* 13 Qa qetz okajel jkolaꞌ tetz, tetz tzunx jun yolin tzan tpaj kꞌontiꞌl njaw meltzꞌjik.
Titzaꞌ Tzan Tbꞌet Jun Aqꞌunon Aj Nꞌel Galan Tuj Twitz Qtata Dios
14 Instzaj anaꞌoꞌ kxol kye qerman aj nxik nqꞌumaꞌni bꞌix inkxik akawiꞌ kyetz tukyꞌi tbꞌi Qtata Dios tzan tkaj ksiꞌ tzan kywululun, tzan tpaj kꞌontiꞌl nꞌoken bꞌix cha nꞌok te jun nyaꞌtx galan kye aj nkyechaꞌon kyiꞌj. 15 Intok asiꞌ akꞌuꞌj tzan awel galan tuj twitz Qtata Dios iktzaꞌ jun aqꞌunon aj kꞌontiꞌl tidiꞌ qiꞌj bꞌaꞌn tzan tqet kyꞌixwik, bꞌix nxik txnaqꞌtzaꞌ galan te tpakbꞌalil bꞌanꞌax. 16 Kꞌon tzꞌox asamoꞌ awibꞌ kxol kye aj nkyewululun tiꞌj tidiꞌchq aj kꞌontiꞌl token, tzan tpaj kyebꞌayleꞌ cha mas nkyekꞌulun te aj kꞌontiꞌl nqet tuj twitz Qtata Dios. 17 Te aj nkyyoliꞌ nxik leꞌlon tibꞌ naqe jun yabꞌil aj nxik tqꞌaysaꞌ qchiꞌjel.b Xjal iktzaꞌ kyetz aꞌeꞌ te Iméneo bꞌix Pilet, 18 aꞌeꞌ aj okaj kykolaꞌ te bꞌanꞌax. Komo nkyqꞌumaꞌ oje qojaw anqꞌin bꞌix ikxji cha nkyekꞌulun tzan tkaj kykolaꞌ junjun titzaꞌ witꞌlik kykꞌuꞌj. 19 Per te Qtata Dios oje kaj tsiꞌ jun tumeꞌl aj nlay kyꞌixpjik aj jaꞌ tzꞌibꞌankaj ikxjani: “Te Qajawil totzqiꞌ kye aj etzameꞌ titzaꞌ.”* Bꞌix [ax tuj junky part nyolin ikxjani]: “Etetz ekyaqil aj nqet etokslaꞌ te Qajawil, intel epawaꞌ etibꞌ tiꞌj te aj nyaꞌtx galan.”*
20 Tuj jun nim jay, nyaꞌtx aꞌox okensbꞌil xtxꞌotxꞌal oro bꞌix xtxꞌotxꞌal plata ateꞌ, sinoke ax ateꞌ xtxꞌotxꞌal tzeꞌ bꞌix txꞌoꞌtxꞌ, bꞌix junjun nkyeꞌoken te jun qꞌijbꞌil bꞌix kye txqꞌanky te qwabꞌl bꞌajqꞌij. 21 [Ax ikxji] qa qetz nlay xik qsamoꞌ qibꞌ tuj te nyaꞌtx galan, bꞌaꞌn tzan qoken qetz te jun bꞌan galan te Qajawil tzan tpaj pawamoꞌ aꞌox te tetz iktzaꞌx jun okensbꞌil bꞌaꞌn tzan token te jun bꞌan galan, bꞌix ax ikxji qiꞌj qetz, bꞌaꞌn tzan qoken tzan jkꞌulun tidiꞌchq galan aj tgan te Qajawil.
22 Intel apawaꞌ awibꞌ tiꞌj kyaqil aj nyaꞌtx galan nꞌel kyganiꞌ kye kuꞌxon, pabꞌet tuj tumeꞌl, intok witꞌlet akꞌuꞌj tiꞌj Qajawil, inkyqet aganiꞌ txqꞌanky, bꞌix intok awen titzaꞌ tzan aten galan kxol kye aj nqet kywitz twitz Qajawil tukyꞌi jun kyanim bꞌan saq. 23 Per kꞌon tzꞌok asiꞌ awiꞌ tiꞌj tidiꞌ bꞌan tont aj cha nkywululuꞌ bꞌix cha kyyol aj cha tuj kywiꞌx nꞌetz kyin. Yatz awebꞌen, tzan tpaj nini njaw qꞌoj. 24 Jun xjal aj nꞌaqꞌunan te Qtata Dios, a tgan nyaꞌtx aj cha twululunqet, sinoke a tgan galan nabꞌlin kyukyꞌi txqꞌanky xjal, bꞌix bꞌaꞌn tzan txik txnaqꞌtzaꞌ txqꞌanky, bꞌix at tpasens. 25 Ax a tgan tzan tyolin kyebꞌaꞌ kyukyꞌi kye aj kꞌon kygan okslan. Komo qanq te Qtata Dios otkꞌuluꞌtz tzan tjaw kkyꞌixpuꞌ kynabꞌlin tzan tel kynikyꞌ alkyetz te bꞌanꞌax, 26 bꞌix ikxji tzan kykolpjik tuj tqꞌabꞌ te Tajaw Choj, komo ajnaꞌl cha tzyumeꞌ titzaꞌ tzan kykꞌulun iktzaꞌ tetz tgan.