4
1 Astilji etetz waq erman aj ganimix witzaꞌ, etetz aj bꞌan ngan xik qꞌolbꞌel etetz, etetz aj bꞌan nkyinchalaj etiꞌj bꞌix etiꞌj etetz telponx oje tzꞌel galan te waqꞌun exol; ntons etetz aj ganimix witzaꞌ, wetz maꞌtx xik nqꞌumaꞌ etetz kyaqil ntzani tzan eten bꞌan jwert tukyꞌi Qajawil.
Nyaꞌtx Galan Qa Nyaꞌtx Dyakwerd Atoꞌ Qxol Tzan Tpaj Cha Jun Te Qajaw Jesukrist
2 Wetz nxik nkawiꞌ te Ebody bꞌix te Síntike, komo [cha jun] te Qajawil, a tgan tzan kyten dyakwerd titzaꞌ nkyebꞌisun. 3 Bꞌix ax yatz [Sísigus]a aj kꞌontiꞌl nkaj asiꞌ tzan awonen wukyꞌiꞌl, nqet nwitz awitz tzan awonen chꞌin kye aj qerman xujni. Komo kyetz ebꞌajꞌonen wukyꞌiꞌl tzan npakbꞌan te tpakbꞌalil galan, bꞌix tukyꞌi Klem bꞌix kye txqꞌanky aꞌeꞌ aj nkyeꞌonen tuq wukyꞌiꞌl, kyetz oje qex tzꞌibꞌaꞌ kybꞌi tuj te uꞌj tuj kaꞌj aj jaꞌ nyolin abꞌleꞌ kye aj at jun kyanqꞌin te jun-eleꞌx.*
4 Pechalaj waq tiꞌj te Qajawil, kꞌon kaj esiꞌ tzan echalajsan tiꞌj. Oxeꞌl nqꞌumaꞌ junkyꞌel: Peꞌechalaj waq.* 5 Peꞌeyolin waq kyebꞌaꞌ kyukyꞌi kyaqil xjal. Komo te Qajawil atqet qxol. 6 Kꞌon kxbꞌisun tiꞌj chꞌinwt sinoke peꞌexnaqꞌtzan tukyꞌi Qtata Dios tiꞌj kyaqil, intqet ewitz twitz tetz bꞌix intxik esiꞌ pixon tetz.* 7 Ikxji te Qtata Dios otzajel xhchewsaꞌ ekꞌuꞌj, per te aj xhchewsbꞌilni kꞌontiꞌl nꞌoknoj qyol tzan txik jqꞌumaꞌ kyaqil tiꞌj, per oqtel tkoloꞌ te etanim bꞌix te enabꞌl tzan tpaj mojbꞌaꞌ etibꞌ tukyꞌi Kristo Jesus.
8 Bꞌix ajnaꞌl waq erman, qa at jun tidiꞌ aj bꞌanꞌax, bꞌix galan tzan tqet qokslaꞌ, bꞌix tumeꞌl, bꞌix aj chꞌinwt nyaꞌtx galan tiꞌj, bꞌix aj nꞌel galan tuj qwitz, bꞌix aj jiqꞌbꞌaꞌ; qa at jun tidiꞌ ikxniꞌn bꞌix bꞌaꞌn tzan qchalaj tiꞌj, intqet ebꞌisuꞌ waq tiꞌj. 9 Bꞌix kyaqil aj owel eteqꞌiꞌ wiꞌj bꞌix kyaqil aj ekꞌamoj wukyꞌiꞌl, kyaqil aj owok echaꞌoꞌ nxik tuq nyoliꞌ bꞌix kyaqil aj owok eten nqet tuq nkꞌuluꞌ, intqet ekꞌuluꞌ etetz ikxji, bꞌix te Qtata Dios aj nchewsan jkꞌuꞌj oqtelten etukyꞌiꞌl.
Aj Txik Tsiꞌ Paꞌk Jun Pixon Kye Aj Filipos
10 Wetz nkyinchalaj tukyꞌi Qajawil tzan tpaj etetz maꞌtx kyintzaj enaꞌoꞌ ajnaꞌl. Etetz bꞌisuꞌ tuq etitzaꞌ tbꞌay per kꞌontiꞌl tuq jun tumeꞌl tzan tbꞌantik etitzaꞌ. 11 Wetz kꞌontiꞌl nxik nqꞌumaꞌ tzan tpaj tidiꞌchq-wit npaltin wetz, komo wetz oje tzꞌel nnikyꞌ titzaꞌ tzan wanqꞌin tukyꞌi jun tumeꞌl aj nkyinchalaj tiꞌj aber titzaꞌ atinqet. 12 Wetz webꞌen titzaꞌ tzan wanqꞌin tuj nmebꞌaꞌul bꞌix qatzun at nim tidiꞌchq wetzji; tuj kyaqil aj oje tzꞌok wen, oje tzꞌel nnikyꞌ tzan nten tukyꞌi jun chalajbꞌil, qa waꞌij atin qatzun at kyaqil nweꞌji, qa at tidiꞌchq wetz qatzun bꞌan mebꞌaꞌ aꞌinji, 13 bꞌaꞌn tzan tbꞌantik kyaqil witzaꞌ tzan tpaj te [Krist] aj ntzaj tsiꞌ nbalor.
14 Per etetz maꞌtx ekꞌuluj galan tzan etonen wukyꞌiꞌl tiꞌj kyaqil aj nyaꞌtx galan aj nkyꞌik wiꞌjni. 15 Etetz aj Filipos, etetz etebꞌen, aj waqꞌik npakbꞌan te tpakbꞌalil galan te Qtata Dios, aj wetz exol etetz tuj tkwentil Masedony, nijunwt bꞌuchꞌuj qerman ebꞌajꞌonen wukyꞌiꞌl sinoke aꞌox aꞌix. 16 Bꞌix aj akyinqet tuq wetz amaqꞌ Tesalonk,* etetz kyꞌilaꞌj-el oxik esamaꞌ etonbꞌil te wetz tzan tbꞌantik kyaqil aj presis tuq te wetz.* 17 Wetz kꞌontiꞌl nkyinjoyon tzan stzaj oyeꞌ tiꞌchq wetz, sinoke nkyinjoyon titzaꞌ tzan tel te etoyej jun galan te etetzx tuj twitz Qtata Dios. 18 Ajnaꞌl at kyaqil aj presis te wetz bꞌix ketant. Ajnaꞌl kabal at te wetz tzan kyaqil aj otzaj esamaꞌ tukyꞌi Epafrodit, bꞌix te etoyej nꞌel tuj twitz Qtata Dios naqe jun present bꞌan tbꞌanil tkꞌokꞌjal aj tetz nchalaj tiꞌj.* 19 Bꞌix te Qtata Dios oxeꞌl tsiꞌ te etetz kyaqil aj presis aj npaltin te etetz, oxeꞌl tsiꞌ iktzaꞌx aj at tidiꞌchq te tetz tuj kaꞌj tukyꞌi Kristo Jesus. 20 Intqet jiqꞌbꞌaꞌxwit te Qtata Dios tuj kyaqil tyemp bꞌeyx te jun-eleꞌx. Intkyꞌikxwit ikxji.
Jun Kawbꞌil
21 Intxik esiꞌ jun limbꞌil kye kyaqil tzi aj pawameꞌ te Qtata Dios tzan tpaj mojbꞌaꞌ kyibꞌ tukyꞌi Kristo Jesus. Jun limbꞌil te etetz tzan kye qerman aj akyeqet wukyꞌiꞌl tzani. 22 Bꞌix ax jun limbꞌil te etetz tzan kyaqil kye qerman [tzani] aj pawameꞌ te Qtata Dios, pyor tzan kye aj tuj tjay te César aj twitzaleꞌ kꞌulul mandad. 23 Qajaw Jesukrist tzaj sinxwit tuj etanim te aj nim bꞌan galan aj kꞌontiꞌl nqajoꞌ. [Intkyꞌikxwit ikxji.]