3
Nlay Bꞌantik Tzan Jkolonx Qibꞌ Tukyꞌi Jkꞌulbꞌen Galan
1 Ajnaꞌl waq erman, aꞌox oxeꞌl nqꞌumaꞌ etetz ja ntzani: Peꞌechalaj waq tiꞌj Qajawil. Wetz kꞌontiꞌl nkyinsiktik tzan tqet ntzꞌibꞌaꞌ junkyꞌel etetz aj oje qet ntzꞌibꞌaꞌ jun-elxiꞌ, komo nkxtkoloꞌ [tiꞌj te aj nyaꞌtx bꞌanꞌax]. 2 Intok esiꞌ waq enabꞌl kyiꞌj kye aj naqe txꞌyaꞌn-eꞌ, aꞌeꞌ aj nkyekꞌulun pur nyaꞌtx galan, bꞌix aꞌeꞌ aj cha nkyeꞌokꞌonsan kchiꞌjel. 3 Per yatzun qetz, at jun qechalul bꞌan bꞌanꞌax, qetz aj nqet qnaꞌoꞌ Qtata Dios tzan tpaj te Txew [tuj qanim], qetz nqet qjiqꞌbꞌaꞌ te Kristo Jesus, bꞌix kꞌontiꞌl witꞌlik jkꞌuꞌj tiꞌj te jkꞌulbꞌen tukyꞌi qchiꞌjel.* 4 Wetz bꞌaꞌn-tal tzan tok witꞌlet nkꞌuꞌj tiꞌj nkꞌulbꞌen tiꞌj nchiꞌjel [iktzaꞌ te wijajil bꞌix jaꞌ tzajnaqin]. Qa at abꞌl ntbꞌisuꞌ tzan tok witꞌlet tkꞌuꞌj tiꞌj tkꞌulbꞌen tiꞌj xhchiꞌjel, per wetz mas at-tal woklen tzan tok witꞌlet nkꞌuꞌj ikxji. 5 Wetz owok siꞌ wechalul tiꞌj nchiꞌjel aj man tuq jun samanxiꞌ witzꞌjlen, wetz aꞌin tijajil Israel bꞌan bꞌanꞌax, komo inꞌitzꞌjik txol bꞌuchꞌuj tijajil Minch* bꞌix kye ntat ax kyetz aj tijajil Israel, bꞌix tiꞌj te Kawbꞌil te qamaqꞌ Israel aꞌin tuq wetz aj bꞌuchꞌuj Parisey, 6 [komo bꞌan eqꞌiꞌ witzaꞌ tuq te aj eqꞌiꞌ kyitzaꞌ kye nxjalil,] wetz bꞌan nkyejaw nlajoꞌ tuq kye aj nkyeꞌokslan tuq tiꞌj Krist,* bꞌix wetz tzan tqet nkꞌuluꞌ tuq titzaꞌ tgan te Kawbꞌil nijunwt abꞌl otzaj qꞌuman te wetz qa nyaꞌtx galan tuq nkꞌuluꞌ. 7 Per kyaqil nini aj wetz tuj nnabꞌl nꞌoken tuq te jun galan te wetz, ajnaꞌl nꞌel tuj nwitz kꞌontiꞌl token chꞌinwt tzan tpaj te Krist. 8 Oj tqet nparejsaꞌ kyaqil te nkꞌulbꞌen oqtxiꞌ tukyꞌi te aj tbꞌanil tzan tpaj toklen wotzqilaꞌ te Wajaw Kristo Jesus, nꞌel tuj nwitz kyaqil aj nkꞌulbꞌen oqtxiꞌ iktzaꞌ kyꞌis aj kꞌontiꞌl token chꞌinwt tzan tpaj te aj ngan wetz ajnaꞌl, tzan tok wotzqilaꞌ te Krist 9 bꞌix tzan nten junchꞌin tukyꞌiꞌl, nyaꞌtx tzan tpaj tqetlen nkꞌuluꞌ kyaqil aj ntqꞌumaꞌ te Kawbꞌil, sinoke tzan tpaj toklen witꞌlet nkꞌuꞌj tiꞌj Krist, bꞌix ikxji tzan tel in te nchoj tzan te Qtata Dios tzan tpaj toklen witꞌlet nkꞌuꞌj tiꞌj Krist. 10 Aj tidiꞌ ngan wetz, tzan tok wotzqilaꞌ te tetz, bꞌix tzan tok wen te tajwalil aj okꞌulun tzan tjaw anqꞌin, bꞌix tzan tok wen twitz xhchoꞌnal iktzaꞌ aj owok ten tetz, bꞌix tzan wok iktzaꞌ tetz aj tkamik, 11 ikxji tzan njaw anqꞌin oj kyjaw anqꞌin kye kamnaq. 12 Wetz kꞌontiꞌl nxik nqꞌumaꞌ etetz qa wetz maꞌtx bꞌantik kyaqil witzaꞌ bꞌix ajnaꞌl bꞌan galan aꞌin. ¡Nyaꞌtx! Wetz tzunx nkyinbꞌet tuj nbꞌey tzan tbꞌantik wukyꞌiꞌl te aj presis aj tzan tpajji inꞌel joyoꞌ tzan te Kristo Jesus. 13 Wetz kꞌontiꞌl nxik nqꞌumaꞌ etetz waq erman, qa wetz maꞌtx nkambꞌaj kyaqil aj galanni, sinoke ajnaꞌl kꞌontiꞌl nꞌok nsiꞌ nkꞌuꞌja tiꞌj kyaqil aj oje kyꞌik, sinoke ajnaꞌl nkyinkꞌulun kyaqil tzan tpaj nkꞌamoꞌtz te aj otzajel siꞌ wetz mas yajx. 14 Wetz kꞌontiꞌl nkaj nsiꞌ tzan tok nwitꞌbꞌaꞌ nkꞌuꞌj tiꞌj Krist tzan npon tukyꞌiꞌl tuj kaꞌj, komo ikxji tetz nqotukꞌleꞌ tzan te Kristo Jesus. 15 Qkyaqil qetz aj oje qoꞌok jwert, a tgan tzan qbꞌisun ikxji, bꞌix qa etetz kꞌontiꞌl nqet tuj ewitz ikxji, te Qtata Dios oxeꞌl yekꞌun te etetz [jaꞌ nkxpaltin]. 16 Per kꞌon kaj qsiꞌ tzan jkꞌulun te tumeꞌl bꞌanꞌax aj oje tzꞌel qnikyꞌ tiꞌj.
17 Ntons etetz waq erman, intel etin waq iktzaꞌ wetz nkyinkꞌulun* bꞌix ax intok esiꞌ enabꞌl kyiꞌj kye aj nkyebꞌet iktzaꞌ aj oje qet qyekꞌuꞌna qetza ewitz. 18 Komo iktzaꞌ wetz oje xik nqꞌumaꞌ etetz kyꞌilaꞌj-el, bꞌix ajnaꞌl nxik nqꞌumaꞌ junkyꞌel etetz jun tidiꞌ aj nkyinꞌoqꞌ titzaꞌ [tzan tpaj ntzaj choꞌon wanim titzaꞌ]: Ateꞌ kyꞌilaꞌj nkyekꞌulun nyaꞌtx galan tzan kꞌon kyokslan kye xjal qa te tkamlen te Krist twitz krus [bꞌaꞌn tzan tkolon kyiꞌj]. 19 Kyetz okyepoyonaj, kyetz cha atok kykꞌuꞌj tiꞌj kchiꞌjelx,b nqet kyjiqꞌbꞌaꞌ kyibꞌ tiꞌj te aj eqꞌil kkyꞌexaw, kyetz cha nꞌok ksiꞌ kynabꞌl tiꞌj tidiꞌchq twitz txꞌoꞌtxꞌ. 20 Yatzun qetz, at jun qnajbꞌil tuj kaꞌj bꞌix nqoꞌiyon tzan stzaj txini te Qajaw Jesukrist aj koloyon qiꞌj. 21 Tetz ojawel tkyꞌixpuꞌ te qchiꞌjel aj tzani twitz txꞌoꞌtxꞌ tzan tok iktzaꞌ tetz xhchiꞌjel akꞌaꞌj aj bꞌan tbꞌanil, otkꞌuluꞌtz ikxji tzan tpaj at tajwalil tzan tkaj kyaqil tuj tqꞌabꞌ.