2
A Tgan Tzan Tel Qin Tzan Qbꞌisun Iktzaꞌ Te Jesukrist Nbꞌisun
1 Ntons qaa te Krist nnimsan ekꞌuꞌj, qa nꞌok jun galan tuj etanim tzan tpaj nkxqet tganiꞌ, qa te Txew Dios atqet exol, bꞌix qa etetz exol nꞌok loꞌet ekꞌuꞌj tiꞌj junky bꞌix qa galan kxnabꞌlin kyukyꞌi txqꞌanky 2 ntons kꞌuluj waq tzan nchalaj chꞌin, peꞌebꞌisun parej exol, intqet eganiꞌ etibꞌ parej exolx, peꞌeten junchꞌin tukyꞌi jun ekꞌuꞌj, bꞌix peꞌebꞌisun parej ekyaqil [ikxjani]: 3 Kꞌon qet ekꞌuluꞌ jun tidiꞌ cha tzan tok eteꞌeꞌ abꞌl okꞌuluyon mas galan, bꞌix kꞌon ekꞌuluj jun tidiꞌ cha tzan tqet ejiqꞌbꞌaꞌ etibꞌ, sinoke inkxik enaꞌoꞌ kye txqꞌanky tbꞌay ewitz etetz, 4 kꞌon kxbꞌisun cha aꞌox etiꞌjx etetz sinoke intqet ebꞌisuꞌ kyiꞌj kye txqꞌanky. 5 Peꞌebꞌisun waq iktzaꞌx obꞌisun te Kristo Jesus. 6 Tetz, anke aji tuq iktzaꞌ Qtata Dios,* tetz kꞌontiꞌl owok tsiꞌ tkꞌuꞌj tzan tkolon tibꞌ iktzaꞌ Tkꞌwaꞌal Qtata Dios, 7 sinoke axk tetz okaj tsiꞌ te aj at tuq toklen tiꞌj, bꞌix owok iktzaꞌ jun xjal aj mosiꞌ bꞌix owitzꞌjik iktzaꞌxkix jun xjal.* 8 Bꞌix ya ma tzꞌok xjal, axk tetz owel tin tkyꞌexaw,* dispwest tuq tzan tkamik, oqet tokslaꞌ* [Qtata Dios], bꞌix ojaw yobꞌaꞌ twitz krus. 9 Astilji te Qtata Dios oqet tjiqꞌbꞌaꞌ nim bꞌix owok tqꞌumaꞌ Tajawil Tꞌij Kyaqil bꞌix Koloyon, bꞌix oxik tsiꞌ jun tajwalil mas nim kywitz kyaqil xjal.* 10 Ikxji tzan kyqet mejlet twitz tetz kyaqil kye aj akyejax tuj kaꞌj bꞌix kye aj akyeqet twitz txꞌoꞌtxꞌ bꞌix kxol kye kamnaq, 11 bꞌix tzan txik kyqꞌumaꞌ kyaqil xjal twitz txꞌoꞌtxꞌ a te Jesukrist Tajawil Tiꞌj Kyaqil, bꞌix ikxji tzan tqet jiqꞌbꞌaꞌ te Qtata Dios.*
Intqet Eyekꞌuꞌ Jun Tumeꞌl Galan Kywitz Kye Aj Kꞌontiꞌl Nkyeꞌokslan
12 Ntons etetz waq erman aj ganimix witzaꞌ, iktzaꞌx etetz aj akyinqet tuq exol nqet tuq etokslaꞌ te Tyol Qtata Dios, bꞌix ajnaꞌl laqꞌchik atinni, intqet etokslaꞌ mas tukyꞌi jun tkꞌuꞌjlal. Komo kolomix, intok esiꞌ waq ekꞌuꞌj tukyꞌi jun txobꞌlal tzan kꞌon kaj esiꞌ waq tzan ekꞌulun kyaqil galan. 13 Komo a te Qtata Dios nyolin tuj etanim tzan enaꞌon tidiꞌ tetz tgan bꞌix tzan tonen etukyꞌiꞌl tzan tqet ekꞌuluꞌ ikxji. 14 Kyaqil aj oqtel ekꞌuluꞌ, intqet ekꞌuluꞌ per nyaꞌtx tukyꞌi qꞌojbꞌil bꞌix nyaꞌtx nkxwululun tiꞌj, 15 tzan kꞌon tok eꞌeꞌ exol etetz jun tidiꞌ aj nyaꞌtx galan. Peꞌeten tkꞌwaꞌal Qtata Dios bꞌix kꞌontiꞌl jun tidiꞌ nyaꞌtx galan etiꞌj kxol kye xjal aj cha kyeqꞌinqet txqꞌanky bꞌix cha kybꞌisunqet nyaꞌtx galan. Peꞌenabꞌlin waq galan kxol kyetz, peꞌeqet en iktzaꞌ kye cheꞌw twitz kaꞌj nkyetxaqtxon tuj qlolj, 16 kꞌon kaj esiꞌ tzan txik eꞌeꞌ etiꞌj etetz titzaꞌ nkxꞌokslan byenech tiꞌj te tpakbꞌalil galan aj nqoꞌanqꞌin titzaꞌ. Bꞌix oj tul te Krist, wetz kyinchalajel tzan tpaj nyaꞌtx chagan woqelbꞌen bꞌix nyaꞌtx chagan waqꞌumbꞌen exol etetz. 17 Anke tzꞌok wen twitz xhchoꞌnal iktzaꞌ stzꞌabꞌeꞌl te aj nkxkꞌulun iktzaꞌ jun epresent aj nxik esiꞌ te Qtata Dios bꞌix jun etaqꞌun te tetz tzan tpaj toklen witꞌlet ekꞌuꞌj tiꞌj, per wetz nkyinchalaj tiꞌj te ntzani bꞌix nkyinchalaj junchꞌin etukyꞌiꞌl ekyaqil etetz. 18 Ax peꞌechalaj waq etetz bꞌix peꞌechalaj junchꞌin wukyꞌiꞌl.
Te Timotey Bꞌix Epafrodit Kygan Tuq Kxik Qꞌolbꞌel Kye Aj Filipos
19 Wetz loꞌik nkꞌuꞌj tiꞌj Qajaw Jesus tzan txik nlajoꞌ naj te qerman Timotey etukyꞌiꞌl, tzan tok nchaꞌoꞌ epakbꞌalil; ikxji okyinchalajel etiꞌj. 20 Komo kꞌontiꞌl junky abꞌl atqet wukyꞌiꞌl iktzaꞌ tetz aj nkxꞌaj tbꞌisuꞌ tukyꞌi jun tkꞌuꞌjlal iktzaꞌ wetz nkyinbꞌisun etiꞌj. 21 Kyaqil cha kybꞌisunqet te jun galan te kyetz per kꞌontiꞌl nꞌok ksiꞌ kynabꞌl tiꞌj tidiꞌ aj tgan te Kristo Jesus. 22 Per etetz oje tzꞌok echaꞌoꞌ tiꞌj te qerman Timotey titzaꞌ nabꞌlin, komo tetz nꞌonen wukyꞌiꞌl iktzaꞌ jun kꞌwaꞌl tukyꞌi stat, tzan txik qpakbꞌaꞌ junx te tpakbꞌalil galan. 23 Astilji wetz loꞌik nkꞌuꞌj chaꞌoj tok wen qa kyaqil nꞌel galan tzani wukyꞌiꞌl, ntons oxeꞌl nlajoꞌ naj etukyꞌiꞌl. 24 Bꞌix ax wetz witꞌlik nkꞌuꞌj tiꞌj Qajawil tzan nxik qꞌolbꞌel etetz naj.
25 Ax wetz oqet tuj nwitz tzan txik nlajoꞌ exol etetz te qerman Epafrodit. Tetz werman bꞌix nꞌonen wukyꞌiꞌl bꞌix jun aj nwakeꞌ wukyꞌiꞌl [tzan txik qpakbꞌaꞌ te tpakbꞌalil galan]; tetz jun ekyꞌixelb tzan tonen wukyꞌiꞌl tiꞌj te aj npaltin tuq te wetz. 26 Tetz bꞌan tgan tzan txik qꞌolbꞌel etetz ekyaqil tzi, bꞌan nbꞌisun tuq tzan tpaj oje tzꞌok echan etetz qa oqet yabꞌtik. 27 Bꞌanꞌax tetz oqet yabꞌtik, chꞌinky tuq ma kamik, per te Qtata Dios owok loꞌet tkꞌuꞌj tiꞌj, bꞌix nyaꞌtx aꞌox tiꞌj sinoke ax wiꞌj wetz tzan kꞌon tok wen twitz mas xhchoꞌnal twitz aj oje tzꞌok wenni. 28 Astilji bꞌan ngan tuq tzan txik nlajoꞌ etukyꞌiꞌl tzan echalaj oj tok eten bꞌix tzan kꞌon nbꞌisun wetz etiꞌj. 29 Peꞌekꞌamon waq tetz tukyꞌi jun pixon te Qajawil bꞌix tukyꞌi jun chalajbꞌil. Komo jun xjal aj iktzaꞌ tetz a tgan tzan tqet qjiqꞌbꞌaꞌ 30 tzan tpaj chꞌinky tuq ma kamik tzan tpaj taqꞌun te Krist; komo dispwest tuq tetz tzan tkamik tzan tonen wukyꞌiꞌl te ekyꞌixel tzan tbꞌantik titzaꞌ te aj kꞌontiꞌl tuq nbꞌantik etetz etitzaꞌ.