13
Te Paꞌk Nxik Tqꞌumaꞌ Kye Qerman Tzan Tkaj Kykolaꞌ Kyaqil Te Nyaꞌtx Galan Kxol
1 Ntons ajnaꞌl toxmajjiꞌn-el ntzani okyinxeꞌl qꞌolbꞌel etetz. Kyaqil tidiꞌ aj presis tzan qyolin tiꞌj te aj nkyꞌik exol, oqoyoliyon tiꞌj tukyꞌi kabꞌeꞌ qa ox testiwji.* 2 Oje xik nqꞌumaꞌ, bꞌix ajnaꞌl anke kꞌontiꞌl atinqet exol, oxeꞌl nqꞌumaꞌ junkyꞌel iktzaꞌx oxik nqꞌumaꞌ aj nxwaꞌq tkaꞌmjjiꞌn-el exol etetz tzi. Oxeꞌl nqꞌumaꞌ nyaꞌtx aꞌox kye aj nkyejoyon choj sinoke te ekyaqil etetz: Oj nxik qꞌolbꞌel etetz, wetz nlay kyinpaqlet etiꞌj. 3 Ikxji etetz owokel eten jun preb akix te Krist te aj ntzaj tqꞌumaꞌ tzan nyolin etukyꞌiꞌl, bꞌix tetz exol nyaꞌtx jun aj kꞌontiꞌl-wit tbalor sinoke nqet tyekꞌuꞌ at nim tajwalil exol etetz. 4 Bꞌanꞌax tetz okamik iktzaꞌ jun aj kꞌontiꞌl tuq tbalor, per yatzun ajnaꞌl itzꞌoj tukyꞌi nim tajwalil tzan te Qtata Dios. Bꞌix ax ikxji qetza kꞌontiꞌl qbalor iktzaꞌx tuq tetz tbꞌay, per oqoteyon exol junx tukyꞌi Krist tzan tajwalil te Qtata Dios tzan jkꞌuluna kyaqil tuj tumeꞌl exol etetz. 5 Intqet ebꞌisuꞌ etiꞌjx etetz, qa bꞌanꞌax tumeꞌl titzaꞌ witꞌlik ekꞌuꞌj tiꞌj te Qtata Dios. Intqet ebꞌisuꞌ etiꞌjx etetz. ¿Kꞌontiꞌl petzun etebꞌen te Jesukrist atqet exol, qa bꞌanꞌax nkxbꞌet tuj tumeꞌl? 6 Wetz loꞌik nkꞌuꞌj etetz nꞌok eten qiꞌja, bꞌanꞌax nqobꞌetna tuj tumeꞌl. 7 Bꞌix qetza nqoxnaqꞌtzan tukyꞌi Qtata Dios tzan kꞌon ekꞌulun jun nyaꞌtx galan, nyaꞌtx tzan qel qetza galan tuj kywitz kye xjal, sinoke tzan ekꞌulun etetz te galan anke tuj kynabꞌl junjun nyaꞌtx galan nqet jkꞌuluꞌna. 8 Komo qetza nlay bꞌantik tzan jkꞌulun jun nyaꞌtx galan tiꞌj te aj bꞌanꞌax, sinoke aꞌox tzan qyolin galan tiꞌj te bꞌanꞌax. 9 Astilji nqochalajna qa qetza iktzaꞌ nqonumjik bꞌix qa bꞌanꞌax etetz jwert atix, bꞌix nqoxnaqꞌtzana etiꞌj tzan etok bꞌan galan. 10 Astilji wetz nqet ntzꞌibꞌaꞌ ja uꞌj te etetz minaꞌx tuq npon etukyꞌiꞌl. Ikxji oj npon, nyaꞌtx presis tzan token te wajwalil tzan nkꞌulun jun tidiꞌ aj okxbꞌisuyon tiꞌj, sinoke te wajwalil aj otzaj tsiꞌ te Qajawil wetz owokeyon tzan etok mas jwert bꞌix nyaꞌtx tzan tok jun xhchoꞌnal te etetz.
Te Paꞌk Nkawin Kyukyꞌi Kye Aj Korint
11 Waq erman, ajnaꞌl nkyinkawin tukyꞌi ja nyol ntzani: Peꞌechalaj waq, peꞌetok jwert [tukyꞌi Qajawil], peꞌenimsan waq ekꞌuꞌj exol, peꞌenaꞌon tuj etanim parej ekyaqil, bꞌix peꞌeten waq galan exol. Bꞌix te Qtata Dios aj nkꞌulun tzan eten galan exol bꞌix nkxqet tganiꞌ, tetz oqtelten etukyꞌiꞌl. 12 Peꞌeliman etetz etibꞌx exolx tzi tukyꞌi jun limbꞌil bꞌan tumeꞌla tzan tpaj cha jun te Qtat. 13 Kyaqil kye aj pawameꞌ te Qtata Dios nxik ksamaꞌ jun limbꞌil te etetz. 14 Tzaj siꞌxwit etajsik jun nim bꞌan galan tzan te Qajaw Jesukrist, bꞌix intokxwit eten titzaꞌ te Qtata Dios nkxqet tganiꞌ bꞌan nim, bꞌix instenxwit exol etetz tzi te Txew Dios. Kyꞌikxwit ikxji.