12
1 [Ntons qa etetz tuj enabꞌl presis a tgan tzan] tqet qjiqꞌbꞌaꞌ qibꞌ, chagan kꞌontiꞌl tidiꞌ njkambꞌaꞌ, per peꞌetzoqpin chꞌin tzan tqet njiqꞌbꞌaꞌ wibꞌ tiꞌj te aj oxik wen, bꞌix kyaqil aj otzaj tyekꞌuꞌ te Qajawil wetz. 2 [Wetz,]* kajlajuj aqꞌbꞌixiꞌ bꞌix mojbꞌaꞌ wibꞌ tuq tukyꞌi Krist, injaw jotlik (jeꞌky qa tukyꞌi nchiꞌjelx qatzun nyaꞌtxji, aꞌox te Qtata Dios eꞌel tetz), bꞌix [injaw jotlik] tzan txik wen mas jawnaq tuj kaꞌj [aj jaꞌ nnajan te Qtata Dios].a 3 Bꞌix wetz webꞌen, (jeꞌky qa tukyꞌi nchiꞌjelx qatzun nyaꞌtxji, aꞌox te Qtata Dios eꞌel tetz), 4 injaw jotlik, inxik in tuj kaꞌj, aj jaꞌ oxik nchaꞌoꞌ wetz tidiꞌchq aj kꞌontiꞌl nbꞌantik tzan qyolin tiꞌj bꞌix nijunwt xjal bꞌaꞌn tzan tyolin tiꞌj [tzan tpaj bꞌan xjan]. 5 Tiꞌj kyaqil aj owok wenni bꞌaꞌn tzan nyolin nim, per nyaꞌtx tzan tqet njiqꞌbꞌaꞌ wibꞌx sinoke tzan nyolin nim tiꞌj kyaqil aj nꞌok wen twitz aj jaꞌ nnaꞌoꞌ nyaꞌtx jwert atin. 6 Qa wetz ngan-wit tzan tqet njiqꞌbꞌaꞌ wibꞌ, te nini nyaꞌtx-tal nkyinyolin iktzaꞌ lok aꞌin, tzan tpaj oxeꞌlkix-tal nqꞌumaꞌ te bꞌanꞌax, per kꞌontiꞌl nkyinkꞌulun ikxji tzan kꞌon tqet tbꞌisuꞌ nijunwt wiꞌj qa mas nim wajwalil twitz te aj nxik nyoliꞌ qatzun aj nꞌok en wiꞌjji. 7 Astilji tzan kꞌon tuq tqet njiqꞌbꞌaꞌx wetz wibꞌx mas nim twitz te aj aꞌinxkixiꞌ tzan tpaj stzajlen yekꞌuꞌ wetz tidiꞌchq aj bꞌan tbꞌanil, otzaj siꞌ jun xhchoꞌnal tuj nchiꞌjel, iktzaꞌ jun kyꞌiꞌx tuj nchiꞌjel, iktzaꞌ jun tidiꞌ nyaꞌtx galan aj te Satanas swal tetz. 8 Bꞌix tiꞌj te ntzani oxik nqaniꞌ oxmaj te Qajawil tzan tuq tel tin te ja xhchoꞌnalni. 9 Per te Qajawil otzaj tqꞌumaꞌ ikxjani: “Te onbꞌil aj nxik nsiꞌ te yatz kabal nini. Wetz wajwalil tzan nkꞌulun tidiꞌchq nꞌok mas bꞌan galan tukyꞌi jun xjal aj nyaꞌtx jwert.” Ntons, astilji wetz bꞌan nkyinchalaj tzan tpaj nyaꞌtx jwert aꞌin tzan tok bꞌan jwert te tpoder Krist wukyꞌiꞌl. 10 Astilji wetz bꞌan nkyinchalaj qa nyaꞌtx jwert aꞌin, bꞌix ax oj wok yasoꞌ, bꞌix tiꞌj kyaqil aj npaltin te wetz, bꞌix oj njaw lajoꞌ, bꞌix tidiꞌchq aj bꞌan kwest aj nꞌok wiꞌj tzan tpaj te Krist; komo [wiꞌjx wetz] nyaꞌtx jwert aꞌin, per [tukyꞌi Krist] jwert atin.
Te Paꞌk Nbꞌisun Kyiꞌj Kye Aj Korint
11 Wetz nkyinyolin etukyꞌiꞌl ajnaꞌl iktzaꞌ jun lok, per tzan tpaj etetz egan ikxji. Komo aꞌix tuq etetz bꞌaꞌn tzan eyolin galan wiꞌj, tzan tpaj mas nim wajwalil kywitz kye aj [nkyqꞌumaꞌ] aꞌeꞌ tlimaqal tkyꞌixel Krist, anke wetz nyaꞌtx nim wajwalil. 12 Wetz tukyꞌi jun nim npasens oqet nyekꞌuꞌ exol etetz aj telponx wetz jun bꞌanꞌax tkyꞌixel Krist aꞌin, oqet nyekꞌuꞌ exol tukyꞌi nim yekꞌbꞌil aj at tidiꞌ telponx bꞌix tukyꞌi tidiꞌchq aj nqolabꞌan tiꞌj bꞌix tidiꞌchq aj aꞌox nbꞌantik tukyꞌi tajwalil Qtata Dios. 13 ¿Okxꞌel wikꞌoꞌ petzun etetz kywitz kye txqꞌanky bꞌuchꞌuj qerman? Komo wetz kꞌontiꞌl inten exol tzan ebꞌisun-wit wiꞌj tzan stzaj esiꞌ tidiꞌchq aj presis te wetz, iktzaꞌ otzaj ksiꞌ kye txqꞌanky bꞌuchꞌuj qerman. ¡Najsajwaq qa te nini jun nyaꞌtx galan onkꞌuluj etukyꞌiꞌl! 14 Ajnaꞌl wetz list atin tzan nxik qꞌolbꞌel etetz toxmajjiꞌn-el, bꞌix kꞌon ngan tzan ebꞌisun wiꞌj tzan tpaj wetz kꞌontiꞌl nkyinjoyon aj at te etetz, sinoke cha ngan qꞌolbꞌen te etetz. Komo nyaꞌtx aꞌeꞌ kye tal kꞌwaꞌl aj presis tzan kykꞌulun kwent te kytat, sinoke aꞌeꞌ kye kꞌwaꞌlon tzan kykꞌulun kwent kye kykꞌwaꞌal.b 15 Bꞌix wetz nkyinchalaj tzan tqetbꞌaj nnajsaꞌ kyaqil aj at te wetz, dispwest atin tzan nnajsan kyaqil te nchiꞌjel tzan tok te jun galan te etanim. Anke wetz mas nkxqet nganiꞌ, yatzun etetz ¿nlay petzun kyinqet eganiꞌ mas? 16 Bwen, qaltetz. Per wetz kꞌontiꞌl inten exol etetz tzan ebꞌisun wiꞌj, anke nkyqꞌumaꞌ junjun qa wetz tukyꞌi jun nlistul okxqet weqꞌiꞌ. 17 ¿Tiꞌtzun, okxqet petzun weqꞌiꞌ kxiklen nlajoꞌ kye txqꞌanky exol? 18 Wetz oqet nwitz twitz Tit tzan txik [oneyon etukyꞌiꞌl], bꞌix oxik nlajoꞌ tukyꞌiꞌl te junky qerman [tzan tonen etukyꞌiꞌl]. ¿Tiꞌtzun, okxqet teqꞌiꞌ petzun te Tit? ¿Nyaꞌtx petzun parej nqobꞌisun qetza tukyꞌi Tit? ¿Nyaꞌtx petzun parej nqobꞌetna tukyꞌiꞌl? 19 Qanq etetz tuj enabꞌl qanq nqoqanina jun najsbꞌil tuj ewitz etetz, per nyaꞌtx, sinoke tuj twitz Qtata Dios nqoyolina tukyꞌi tbꞌi Krist, bꞌix kyaqil aj nkyinyolinni tzan tok te jun galan te etetz aj ganimix nim witzaꞌ. 20 Wetz nkyinbꞌisun qanq nlay kxtzaj nkꞌulbꞌaꞌ iktzaꞌ wetz ngan tzan etzaj nkꞌulbꞌaꞌ, bꞌix qanq wetz nlay kyinꞌel tuj ewitz iktzaꞌ tuq etetz egan. Qanq kebal etetz exol nqet epawaꞌ etibꞌ, bꞌix nꞌel eganiꞌ aj tidiꞌ te junky, bꞌix at eqꞌoj tiꞌj junky, bꞌix nkxjaw ilin exolx. Qanq nqet eyoliꞌ txqꞌanky, bꞌix nkxchimon yol tiꞌj junky, bꞌix qanq kꞌontiꞌl nkxꞌokslan bꞌix bꞌan kꞌontiꞌl tumelil exol etetz. 21 Wetz nkyinbꞌisun qa oj nxik junkyꞌel qꞌolbꞌel etetz, qanq okyinnaꞌoyon bꞌan nkyinkyꞌixwik twitz te Qtata Dios tzan epaj etetz, bꞌix qanq okyinꞌoqꞌel tzan kypaj kye aj nkyejoyon choj exol bꞌix minaꞌx tjaw kkyꞌixpuꞌ kynabꞌlin, tiꞌj kyaqil aj ntzꞌilan tiꞌj kyanim, te kꞌajajbꞌilj bꞌix tidiꞌchq aj tgan te kchiꞌjel.