11
Te Paꞌk Nyolin Tistil Tetz Jun Bꞌanꞌax Tkyꞌixel Jesus Kywitz Kye Aj Cha Nkyqꞌumaꞌ Qa Tkyꞌixel Jesus-eꞌ
1 Peꞌetipanxwit chꞌin aj nkyinyolin wetz iktzaꞌ jun lok. Bꞌix bꞌanꞌax at epasens wiꞌj. 2 Komo bꞌan nkyinbꞌisun etiꞌj iktzaꞌ te Qtata Dios bꞌan nbꞌisun etiꞌj.a Komo wetz oje xik nsiꞌ nyol tzan ekaj nqꞌapoꞌ tzan tok ejunbꞌeꞌ etibꞌ tukyꞌi Krist, oje xik nsiꞌ nyol tzan ekaj nqꞌapoꞌ tuj tqꞌabꞌ chꞌinwt nyaꞌtx galan etiꞌj, iktzaꞌ jun qꞌopoj aj minaꞌ tok ten twitz ichan [nkaj qꞌapoꞌ tzan stat tukyꞌi tichmil]. 3 Wetz bꞌan nkyinbꞌisun kebal eqet eqꞌiꞌ [tzan kye aj nyaꞌtx tumeꞌl nkyeyolin] iktzaꞌ te Eba oqet eqꞌiꞌ tzan te kan aj bꞌan list tuq,* ax etetz kebal eqet eqꞌiꞌ tzan kꞌon tqet ebꞌisuꞌ tukyꞌi jun tumeꞌl bꞌan bꞌanꞌax tiꞌj te Krist bꞌix tukyꞌi jun tkꞌuꞌjlal. 4 Chaꞌoj tul jun xjal aj npakbꞌan chuktky tiꞌj Jesus aj nyaꞌtx iktzaꞌ aj ojetq xik qpakbꞌaꞌna qetza, qatzun etetz oxeꞌl ekꞌamoꞌ junky txew aj nyaꞌtx iktzaꞌ te aj oje ekꞌamoj [tukyꞌi Qtata Dios], qatzun oxeꞌl ekꞌamoꞌ junky tpakbꞌalil aj nyaꞌtx iktzaꞌ aj oje xik qpakbꞌaꞌna etetz, ntons etetz nꞌekꞌamoꞌ tukyꞌi jun chalajbꞌil. 5 Wetz kꞌontiꞌl nnaꞌoꞌ iktzaꞌ kꞌontiꞌl-wit wajwalil kywitz kye aj bꞌan tkyꞌixel Jesus [iktzaꞌx nkyqꞌumaꞌx kyetz]. 6 Anke wetz bꞌan xkꞌabꞌ aꞌin tzan nyolin, per wetz wotzqiꞌ te tumeꞌl bꞌanꞌax, bꞌix oje qet nyekꞌuꞌ etetz tukyꞌi kyaqil aj oje qet nkꞌuluꞌ exol etetz. 7 ¿Injoyon choj petzun aj txik npakbꞌaꞌ te tpakbꞌalil galan etukyꞌiꞌl bꞌix kꞌontiꞌl owel npeyuꞌ chꞌinwt etiꞌj, sinoke aꞌinxk wetz owel win nkyꞌexaw tzan eqet jiqꞌbꞌaꞌ tuq etetz? 8 Wetz nkꞌamojb te kyonbꞌil kye txqꞌanky bꞌuchꞌuj qerman tzan npakbꞌan tuq etetz exol. 9 Bꞌix aj akyinqet tuq wetz exol bꞌix qa at tuq jun tidiꞌ aj presis te wetz, wetz kꞌontiꞌl nkꞌuluj tzan tbꞌisun jun te etetz wiꞌj, sinoke kye aꞌeꞌ aj Masedony ebꞌajꞌul bꞌix kyetz otzaj ksiꞌ te aj presis tuq te wetz. Bꞌix wetz owok nsiꞌ nnabꞌl tzan kꞌon tuq wok te jun bꞌis te etetz, bꞌix nlaykix kaj nsiꞌ.* 10 Iktzaꞌx wetz webꞌen te bꞌanꞌax tiꞌj te Krist, ax webꞌen te ja chalajbꞌil aj nnaꞌoꞌ tuj wanimni nlay bꞌantik tzan tel in tzan nijunwt tuj kyaqil tkwentil Akay. 11 ¿Tistil [wetz nkyinyolin ikxji]? ¿Tzan tpaj wetz kꞌontiꞌl nkxqet nganiꞌ? Te Qtata Dios tebꞌen wetz nkxqet nganiꞌ. 12 Per wetz nlay kaj nsiꞌ tzan nkꞌulun te aj nkꞌuluꞌ tzan kꞌon txik nsiꞌ lad kye aj cha nkyejoyon jun tumeꞌl tzan tqet kyjiqꞌbꞌaꞌ kyibꞌ qa kyetz [at kyajwalil] iktzaꞌ qetza. 13 Komo kyetz nyaꞌtx bꞌanꞌax tkyꞌixel Krist, cha nkyeꞌeqꞌin xjal bꞌix cha nkyyoliꞌ kyetz iktzeꞌxtzun aꞌeꞌ tkyꞌixel te Krist. 14 Te ntzani nyaꞌtx jun tidiꞌ aj bꞌan chuktky-wit aj bꞌan nqolabꞌan tiꞌj, komo te Satanas nqet tkꞌuluꞌ tibꞌ iktzeꞌxtzun jun ángel aj bꞌan galan. 15 Astilji, kꞌontiꞌl tzan qlabꞌan qa kyaqil kye aj nkyeꞌokslan tiꞌj, nkyeyolin iktzaꞌ nkyekꞌulun kyaqil tuj tumeꞌl, per nyaꞌtx bꞌanꞌax kyitzaꞌ. Kyetz okyemankuyon iktzaꞌx te kykꞌulbꞌen [aj nyaꞌtx tumeꞌl].
16 Ngan tzan txik nqꞌumaꞌ junkyꞌel, kꞌon qet tbꞌisuꞌ nijunwt qa lok aꞌin [tzan tpaj titzaꞌ nkyinyolin]. Qa at abꞌl ntqꞌumaꞌ wiꞌj ikxji, ntons qanq mejor kyinqet tipaꞌ chꞌin tzan nyolin wiꞌjx wetz tzan tqet njiqꞌbꞌaꞌ wibꞌx. 17 Wetz nlay kyinyolin iktzaꞌ te Qajaw nyolin, sinoke ajnaꞌl okyinyoliyon nim wiꞌjx iktzaꞌ jun lok aꞌin. 18 Komo iktzaꞌx ateꞌ kyꞌilaꞌj xjal nqet kyjiqꞌbꞌaꞌ kyibꞌ tzan tpaj aj nkybꞌisuꞌ tiꞌj kykambꞌen kyetzx, ntons ajnaꞌl ax wetz okyinyoliyon ikxji. 19 Bꞌix komo etetz tuj enabꞌl bꞌan list aꞌixni, etetz nꞌekꞌamoꞌ tukyꞌi jun chalajbꞌil kye aj pur lokeꞌ. 20 Komo etetz mer egan tzan eqetbꞌaj mosiꞌ tzan junky bꞌix tzan eqetbꞌaj elqꞌaꞌ bꞌix tzan eqetbꞌaj eqꞌiꞌ, bꞌix [nꞌekꞌamoꞌ] qa at abꞌl oqtel tjiqꞌbꞌaꞌ tibꞌ, bꞌix etetz cha nꞌetipaꞌ qa at abꞌl ma tzꞌok tloqiꞌ jun palaj eqꞌoꞌtx. 21 Qanq etetz tuj enabꞌl last aꞌin tzan tpaj kꞌontiꞌl inten exol tukyꞌi jun nim wajwalil tzan nkꞌulun mandad jwert etiꞌj. Per iktzaꞌx kye txqꞌanky nim nkyeyolin kyiꞌjx, ntons ajnaꞌl ax wetz oqtel nkꞌuluꞌ ikxji anke tzꞌel tuj ewitz iktzaꞌ tkꞌulbꞌen jun lok.
22 ¿Aꞌeꞌ kyetz qxjalil aj bꞌaꞌn kyeyolin tuj yol ebrey? Ax wetz aꞌin. ¿Aꞌeꞌ kyetz tijajil Israel? Ax wetz aꞌin. ¿Aꞌeꞌ kyetz tijajil Abran? Ax wetz aꞌin. 23 ¿Kyetz qꞌapoꞌ kyibꞌ nkyeꞌaqꞌunan te Krist? (¡Wetz oj txik nqꞌumaꞌ ikxjani nkyinyolin iktzaꞌ jun lok!) Wetz kywitz kyetz mas qꞌapoꞌ wibꞌ nkyinꞌaqꞌunan te tetz, bꞌix wetz waqꞌumbꞌen mas nim kywitz kyetz, bꞌix oje kyinꞌok jubꞌchaꞌ mas kyꞌilaꞌj-el kywitz kyetz,* bꞌix oje kyinqex siꞌ tuj pres mas kywitz kyetz, bꞌix kyꞌilaꞌj-el chꞌinky tuq nkyinkamik. 24 Jwebꞌ-el kye aj [qxjalil] tijajil Israel inqet kyjubꞌchaꞌ bꞌeljujlajuj tuj kawnaq (39) jitxꞌun.* 25 Oxmaj inqet jituꞌ tukyꞌi tzeꞌ,* bꞌix jun-el inꞌok xoꞌoꞌ tukyꞌi abꞌj,* oxmaj kye bark aj jaꞌ nkyinbꞌet tuq ebꞌajxik mulan tuj aꞌ, bꞌix jun-el inkaj tuj aꞌ jun qꞌij tukyꞌi jun aqꞌbꞌil. 26 Oje kyinbꞌet nim bꞌix oje kyinkyꞌik tuj nim aꞌ aj chꞌinky tuq nkyinxik tuq tin, kyꞌilaꞌj-el jaꞌ nkyinbꞌet tuq bꞌan nkyinbꞌisun tuq kyiꞌj kye eleqꞌ, bꞌix bꞌan nkyinbꞌisun tuq kyiꞌj kye wijajil [aj nkyeqꞌojin tuq wiꞌj]* bꞌix ax kyiꞌj kye aj nyaꞌtx wijajil [aj nkyeqꞌojin tuq wiꞌj],* bꞌix tuj kyꞌilaꞌj amaqꞌ bꞌix tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon bꞌix aj nkyinbꞌet tuq tuj te nim aꞌ okyꞌik tidiꞌchq nyaꞌtx galan wiꞌj, bꞌix ax tidiꞌchq xhchoꞌnal tzan tpaj kye aj nyaꞌtx bꞌanꞌax qerman. 27 Kyꞌilaꞌj-el nkyinꞌaqꞌunan nim tuj junjun aqꞌunj bꞌan kwest bꞌix nkyinsiktik tuq nim, kyꞌilaꞌj-el owipaj watl, oje tzꞌok wen twitz waꞌij bꞌix kꞌachjel, bꞌix kyꞌilaꞌj-el oje kyinꞌipan waꞌij, oje kyinluꞌlun tukyꞌi cheꞌw bꞌix kꞌontiꞌl tuq nim nqꞌanaq. 28 Bꞌix nyaꞌtx aꞌox ntzani, sinoke bꞌajqꞌij nkyinbꞌisun kyiꞌj kyaqil kye bꞌuchꞌuj qerman jaꞌchq. 29 Qa kyetz nkyenaꞌon nyaꞌtx jwert ateꞌ, ax wetz nkyinbꞌisun tiꞌj te aj nkyꞌik kyiꞌj. Bꞌix qa kyetz nkyeqet tzꞌaqik, wetz ntzaj nqꞌoj kyiꞌj kye aj nkyekꞌulun tzan kyqet tzꞌaqik.
30 Qa presis tzan tqet qjiqꞌbꞌaꞌ qibꞌ, ntons wetz oqtel njiqꞌbꞌaꞌ wibꞌ tiꞌj kyaqil aj jaꞌ nyaꞌtx jwert atin. 31 Te Qtata Dios aj stat te Qajaw Jesukrist, te aj nqet qnaꞌoꞌc tuj kyaqil tyemp te jun-eleꞌx, tetz tebꞌen wetz nkyinyolin bꞌanꞌax bꞌix kꞌontiꞌl nkyinnikꞌon. 32 Aj akyinqet tuq Damask, te gobernador aj nꞌaqꞌunan tuq tukyꞌi te twitzaleꞌ kꞌulul mandad aj Aretas tbꞌi, tetz eqet tsiꞌ xbꞌuqiyon stziꞌ te tlamelul te amaqꞌ, tzan tuq njaw ktzyuꞌ. 33 Per kye qerman inqetz kytumbꞌaꞌ tuj jun chiꞌl tuj jun tbentanul te peꞌon tiꞌj te amaqꞌ, ikxji wetz inkolpjik tuj kyqꞌabꞌ [kye kꞌulul mandad].*