10
Tajwalil Te Paꞌk Qtata Dios Swal Tetz
1 Ntons, wetz aꞌin Paꞌk nqet nwitz ewitz tukyꞌi jun tumeꞌl bꞌan kyebꞌaꞌ bꞌix bꞌan galan iktzaꞌ te Krist nabꞌlin. Wetz oj nten exol nkyinyolin galan bꞌix kyebꞌaꞌ, per oj nten laqꞌchik etiꞌj kꞌontiꞌl nkyinxobꞌ tzan nyolin tuj jun tumeꞌl iktzaꞌx nyolin wanim. 2 Nqet nwitz ewitz tzan kꞌon ekꞌulun jun tidiꞌ tzan npon etukyꞌiꞌl tukyꞌi jun tumeꞌl kaw. Komo wetz oje qet nbꞌisuꞌ tzan npon tukyꞌi jun tumeꞌl kaw kyukyꞌi junjun te etetz tzi aj tuj kynabꞌl kyetz wetz cha eqꞌimin iktzaꞌ tgan te nchiꞌjel iktzaꞌ kye xjal nkyekꞌulun.a 3 Qetza nqobꞌetna iktzaꞌkix xjal aꞌoꞌna, per nqoqꞌojina [tiꞌj te nyaꞌtx galan] tuj jun tumeꞌl nyaꞌtx iktzaꞌ kye xjal twitz ja txꞌoꞌtxꞌni. 4 Komo te qaqꞌumbꞌil tzan jqꞌojin tiꞌj te nyaꞌtx galan, nyaꞌtx xjal kꞌulul tetz, sinoke tukyꞌi jun qajwalil aj ntzaj tsiꞌ Qtata Dios tzan tponaj te nyaꞌtx galan aj oje lokꞌan tzani twitz txꞌoꞌtxꞌ, bꞌix tzan tponaj tidiꞌchq aj nyaꞌtx tumeꞌl nqet kximaꞌ kye xjal, 5 bꞌix kyaqil aj nqet kybꞌisuꞌ tzan kꞌon tok kyotzqilaꞌ te Qtata Dios, bꞌix nkaj qsiꞌ tuj tqꞌabꞌ te Qtata Dios kyaqil aj nqet qbꞌisuꞌ tzan tqet qokslaꞌ te Krist. 6 Bꞌix oj etokslan etetz byenech, yaji kyiꞌj kye txqꞌanky aj ateꞌ exol aj kꞌon kygan okslan, dispwest atoꞌna tzan jkꞌuluna kyukyꞌiꞌl tzan kybꞌisun tiꞌj te kykꞌulbꞌen nyaꞌtx galan.
7 Etetz cha nꞌok esiꞌ enabꞌl tiꞌj te aj nꞌok eten tukyꞌi ewitz. Qa etetz tuj enabꞌl bꞌanꞌax aꞌix te Krist, a tgan tzan stzaj enaꞌoꞌ ax qetza aꞌoꞌna te Krist. 8 Bꞌix wetz, nlay kyinkyꞌixwik tzan nyolin nim chꞌin tiꞌj te qajwalilna aj otzaj tsiꞌ te Qajawil, nyaꞌtx tzan tok jun nyaꞌtx galan etiꞌj sinoke tzan etok jwert tukyꞌiꞌl. 9 Wetz kꞌon ngan tzan ebꞌisun qa cha nkxꞌok nxobꞌsaꞌ kyukyꞌi kye uꞌj aj nxik nsamaꞌ. 10 Komo junjun nkyqꞌumaꞌ: “Kye aj uꞌj bꞌan kaw bꞌix nim iliꞌmj tuj, per ya oj tul tetz twitzaleꞌ, tetz nyaꞌtx iktzaꞌ jun tlimaqal xjal bꞌix titzaꞌ nyolin nyaꞌtx bꞌan tbꞌanil.” 11 Kye aj nkyebꞌisun ikxji a tgan tzan tok ksiꞌ kynabꞌl, qetza iktzaꞌx nqoyolina kyuj kye quꞌuj, ax ikxji nqokꞌuluna chaꞌoj qten qwitzaleꞌna exol. 12 Qetza kꞌontiꞌl nqet qparejsaꞌ qibꞌa kyukyꞌi kye aj cha nqet kyjiqꞌbꞌaꞌ kyibꞌx. Kyetz, oj tqet kyparejsaꞌ kyibꞌx, kꞌontiꞌl nqet kybꞌisuꞌ tuj tumeꞌl. 13 Qetza kꞌontiꞌl nqet qjiqꞌbꞌaꞌna qibꞌ tiꞌj qaqꞌumbꞌen mas twitz te aj tumeꞌl, sinoke cha aꞌox tiꞌj te aj okaj tsiꞌ te Qtata Dios qetza tzan qpona pakbꞌayon kxol kye xjal bꞌix max exol etetz. 14 Chaꞌoj qyolina tiꞌj qaqꞌun exol, nqoyolina tumeꞌl. Nyaꞌtx-tal tumeꞌl qa kꞌontiꞌl-wit opakbꞌana exol; per komo oje qopon max exol pakbꞌayon te tpakbꞌalil tiꞌj Krist, [ntons tumeꞌl te aj nqoyolina]. 15 Qetza kꞌontiꞌl nqet qjiqꞌbꞌaꞌna qibꞌ tiꞌj taqꞌumbꞌen junky, sinoke loꞌik jkꞌuꞌj tzan etok mas jwert ekyaqil etetz tukyꞌi Qtata Dios, bꞌix ikxji tzan tel mas bꞌan galan bꞌix nim te qaqꞌumbꞌen exol 16 Bꞌix ikxji tzan txik qpakbꞌaꞌna te tpakbꞌalil titzaꞌ tzan jkolet mas laqꞌchik aj jaꞌ atikxqet etetz. Per kꞌon qgana tzan qox aj jaꞌ oje kyepakbꞌan txqꞌanky tbꞌayaꞌ, ikxji tzan kꞌon tqet qjiqꞌbꞌaꞌna qibꞌ tiꞌj kyaqꞌumbꞌen txqꞌanky. 17 Qa at abꞌl tgan tzan tqet tjiqꞌbꞌaꞌ tibꞌ, intqet tjiqꞌbꞌaꞌ tibꞌ tiꞌj Qajaw Jesukrist.* 18 Komo te xjal aj nqet tjiqꞌbꞌaꞌ tibꞌ, kꞌontiꞌl nꞌel galan [tuj twitz Qtata Dios]; yatzun oj tyolin Qtata Dios galan tiꞌj jun xjal, [a te aj nꞌel galan tuj twitz tetz].