9
1 Tiꞌj te onbꞌil aj nꞌel echimoꞌ kye qerman aj pawameꞌ te Qtata Dios, qanq nyaꞌtx presis tzan tqet ntzꞌibꞌaꞌ etetz tiꞌj te nini. 2 Komo webꞌen titzaꞌ etetz bꞌan egan tzan etonen, bꞌix nkxqet njiqꞌbꞌaꞌ tuq kxol kye aj Masedony. Wetz oxik nqꞌumaꞌ kyetz, [etetz] aj Akay bꞌan dyakwerd atix tzan etonen atx jun aqꞌbꞌixiꞌ. Bꞌix tzan tpaj etetz nkxjoyon tumeꞌl tzan ekꞌulun nini, kyꞌilaꞌj kxol kyetz oje xik nimsaꞌ kykꞌuꞌj. 3 Per wetz ma kyexik nlajoꞌ kye qerman exol etetzni, tzan kꞌon tok chagan kyaqil aj galan aj oje xik nqꞌumaꞌ etiꞌj. Ma kyexik nlajoꞌ tzan eten etetz list. 4 Kebal kxik junjun aj Masedony wukyꞌiꞌl bꞌix okxtzajel kykꞌulbꞌaꞌ etetz nyaꞌtx list atikxqet. Ikxji jun kyꞌexawil te qetza, bꞌix pyorx-al te etetz, tzan tpaj te aj oje xik jqꞌumaꞌna etiꞌj. 5 Astilji oqet nbꞌisuꞌ tzan kxik nlajoꞌ kye qerman tzan kxik etukyꞌiꞌl tbꞌay tzan tok echimoꞌ te ja onbꞌil aj ojetq tuq xik esiꞌ eyol tiꞌj. Ikxji tzan tok en nꞌok echimoꞌ ja onbꞌilni tzan tpaj aꞌixk etetz egan etonen bꞌix nyaꞌtx cha tzan tpaj owel qaniꞌ alajwers. 6 Instzaj enaꞌoꞌ te ntzani: Abꞌl te aj nꞌawan chꞌimuꞌs, ax chꞌimuꞌs njaw tin, bꞌix abꞌl te aj nꞌawan nim, ax nim njaw tin. 7 Junjunchaq presis tzan txik tsiꞌ iktzaꞌx maꞌtx qet tbꞌisuꞌ tuj tanim, bꞌix nyaꞌtx tukyꞌi jun bꞌis bꞌix nyaꞌtx tzan tpaj cha lajoꞌ. Komo te Qtata Dios nqet tganiꞌ te xjal aj nxik tsiꞌ tukyꞌi jun chalajbꞌil tuj tanim. 8 Bꞌix te Qtata Dios at nim tajwalil tzan stzaj tsiꞌ nim bꞌan galan te etetz, bꞌix ikxji tzan kꞌon tpaltin jun tidiꞌ aj presis te etetz, bꞌix ikxji tzan etonen nim kyukyꞌi txqꞌanky tukyꞌi tidiꞌchq bꞌan galan. 9 Komo [te Tuꞌjal Dios] nyolin ikxjani: “[Te xjal aj nꞌokslan te Qajaw], tetz nqet tsipaꞌ [tidiꞌchq galan] kxol kye mebꞌaꞌ; tetz kꞌontiꞌl nkaj tsiꞌ tzan tkꞌulun kyaqil tuj tumeꞌl.”* 10 Te Qtata Dios aj ntzaj sin te ijaj tzan tqex awet, bꞌix te wabꞌj aj nxik qwaꞌaꞌ, tetz otzajel tsiꞌ te etijaj bꞌix ojawel tkyꞌibꞌsaꞌ,* bꞌix otkꞌuluꞌtz tzan tel nim te galan tiꞌj kyaqil aj nꞌekꞌuluꞌ tuj tumeꞌl. 11 Ikxji kꞌontiꞌl tidiꞌ opaltiyon te etetz tzan etonen nim kyukyꞌi kye txqꞌanky, bꞌix ikxji tzan tpaj etonbꞌilni kyꞌilaꞌj xjal oxeꞌl ksiꞌ jun pixon te Qtata Dios. 12 Komo oj ekꞌulun jun tidiꞌ ikxjani, kꞌontiꞌl nꞌok cha aꞌox te jun onbꞌil tiꞌj te aj npaltin kxol kye qerman,a sinoke nꞌoken tzan txik ksiꞌ kyꞌilaꞌj xjal jun pixon te Qtata Dios. 13 Oj tok kyen te onbꞌil aj nxik esiꞌ te kyetz, oqtel kyjiqꞌbꞌaꞌ te Qtata Dios tzan tpaj nqet ekꞌuluꞌ iktzaꞌx nꞌeqꞌumaꞌ nkxꞌokslan tiꞌj te Krist, bꞌix nꞌekꞌuluꞌ tukyꞌi jun tkꞌuꞌjlal te kyetz bꞌix ax kye kyaqil. 14 Bꞌix kyetz nkyexnaqꞌtzan tukyꞌi Qtata Dios etiꞌj etetz tukyꞌi jun tkꞌuꞌjlal tzan tpaj te Qtat oje tzaj tsiꞌ nim bꞌan galan te etetz. 15 ¡Pixon te Qtata Dios tzan tpaj te aj ntzaj tsiꞌ qajsik, aj kꞌontiꞌl nꞌoknoj qyol tzan txik jqꞌumaꞌ tiꞌj!