8
Te Paꞌk Nnimsan Kykꞌuꞌj Kye Qerman Tzan Kyonen Kyukyꞌi Kye Txqꞌanky
1 Ntons ajnaꞌl waq erman, qgana tzan txik jqꞌumaꞌna chꞌin etukyꞌiꞌl titzaꞌ te Qtata Dios nꞌonen kxol kye bꞌuchꞌuj qerman tuj tkwentil Masedony. 2 Anke kyetz oje tzꞌok kyen nim xhchoꞌnal, per bꞌan nkyechalaj; bꞌix anke bꞌan mebꞌa-eꞌ, per iktzaꞌ qꞌinon-eꞌ oxik ksiꞌ kyoyej tzan kyonen kyiꞌj kye txqꞌanky qerman. 3 Wetz webꞌen, kyetz tukyꞌi jun tkꞌuꞌjlal oxik ksiꞌ kyoyej iktzaꞌx tuq aj at te kyetz, bꞌix anke kꞌontiꞌl tuq nim te kyetz, oxik ksiꞌ kyoyej nim. 4 Kyetz oqet kywitz qwitza tzan qtzoqpina te kyetz tzan kyonen kyukyꞌi kye qerman.* 5 Kyetz okykꞌuluj mas twitz te aj bꞌisuꞌ tuq qitzaꞌna tbꞌay; tbꞌay oxik kyqꞌapoꞌ kyibꞌ tuj tqꞌabꞌ te Qajawil, bꞌix yaji qukyꞌila iktzaꞌx tgan tuq te Qtata Dios.
6 Astilji, komo te Tit ojetq tuq tzꞌaqꞌik tbꞌayaꞌ tzan tel xhchimoꞌ exol jun onbꞌil kye txqꞌanky qerman, astilji qetza oxik jqꞌumaꞌna tetz tzan tbꞌantik kyaqil nini. 7 Etetz bꞌan galan nꞌel kyaqil exol: Bꞌan jwert atix titzaꞌ witꞌlik ekꞌuꞌj, byenech nkxyolin, nim etotzqiꞌ, bꞌix galan nkxkꞌulun tukyꞌi jun tkꞌuꞌjlal, bꞌix nim nqoqet eganiꞌna. Etetz iktzaꞌx galan nkxkꞌulun kyaqil nini, ax ikxji a tgan tzan ekꞌulun tiꞌj ja etonbꞌilni. 8 Wetz kꞌontiꞌl nkxik nkꞌuluꞌ mandad tzan tel echimoꞌ te onbꞌil, sinoke nxik nqꞌumaꞌ tzan tok eten titzaꞌ kye txqꞌanky qerman bꞌan ajun kyeꞌonen, ikxji tzan txik nsiꞌ luwar etetz tzan tqet eyekꞌuꞌ titzaꞌ bꞌanꞌax nkyeqet eganiꞌ kye txqꞌanky.
9 Etetz oje tzꞌel enikyꞌ tiꞌj te nim bꞌan galan aj otzaj tsiꞌ te Qajaw Jesukrist anke kꞌontiꞌl nqajoꞌ, bꞌix astilji tetz owok bꞌan mebꞌaꞌ anke bꞌan qꞌinon tuq, per tzan tmebꞌaꞌul tetz, etetz bꞌaꞌn tuq tzan etok iktzaꞌ bꞌan qꞌinon. 10 Wetz oxeꞌl nsiꞌ jun konsej te jun galan te etetz: Jun aqꞌbꞌixiꞌ etetz oqet ebꞌisuꞌ tbꞌay [kywitz kye txqꞌanky tzan echimoꞌ jun onbꞌil] bꞌix okxꞌaqꞌik tzan tqet ekꞌuluꞌ ikxji. 11 Ajnaꞌl waq, intqet ekꞌuluꞌ najji iktzaꞌx tukyꞌi jun tkꞌuꞌjlal oqet ebꞌisuꞌ tbꞌay, ikxji intqet ekꞌuluꞌ iktzaꞌ aj janikꞌpon at te etetz. 12 Qa qetz nxik qsiꞌ tukyꞌi jun tkꞌuꞌjlal iktzaꞌx aj at te qetz, ntons nꞌel galan te aj nxik qsiꞌ. Te Qtata Dios kꞌontiꞌl ntzaj tqaniꞌ aj kꞌontiꞌl at qetz. 13 Wetz nxik nqꞌumaꞌ ntzani nyaꞌtx tzan tpaltin te etetz bꞌix tzan tok jun galan aꞌox kye txqꞌanky, 14 sinoke tzan qok parej qkyaqil. Ajnaꞌl etetz at tidiꞌ te etetz bꞌaꞌn tzan etonen tukyꞌi te aj npaltin kye txqꞌanky, bꞌix jun qꞌij kyetz obꞌantel tzan kyonen etukyꞌiꞌl, ikxji etetz bꞌix kyetz bꞌaꞌn tzan etonen etibꞌx ekyaqil bꞌix parej okxteyon. 15 Iktzaꞌx nyolin [tuj Tuꞌjal Dios] ikxjani: “Abꞌl te aj ma jaw tin nim, kꞌontiꞌl ma sobrin nim, bꞌix te aj kꞌontiꞌl ma jaw tin nim, kꞌontiꞌl ma paltin.”*
16 Pixon te Qtata Dios, ntkꞌuluꞌ tzan tok tuj tanim te Tit tzan tbꞌisun etiꞌj iktzaꞌ wetz nkyinbꞌisun. 17 Tetz oqet tokslaꞌ aj oxik nqꞌumaꞌ tetz, per komo tetz jun xjal aj nꞌok tsiꞌ tkꞌuꞌj tzan tel kyaqil tuj tumeꞌl, astilji ajixk tetz oxik etukyꞌiꞌl tzan txik qꞌolbꞌel etetz. 18 Junx tukyꞌi Tit oxik nlajoꞌ jun erman aj bꞌan otzqiꞌmj bꞌix nqet jiqꞌbꞌaꞌ kxol kyaqil bꞌuchꞌuj qerman jaꞌchq tzan tpaj oje tzꞌaqꞌunan bꞌan galan tiꞌj te tpakbꞌalil titzaꞌ tzan jkolet. 19 Bꞌix nyaꞌtx cha aꞌox ja ntzani, sinoke kye bꞌuchꞌuj qerman okaj ksiꞌ tzan txik oneyon qukyꞌila tzan jkꞌulun kyaqil tuj jun tumeꞌl galan tiꞌj ja onbꞌilni, tzan tel kyaqil ntzani te jun jiqꞌbꞌil te Qajawil bꞌix ax tzan tok en titzaꞌ bꞌan qgan tzan qonen kyukyꞌi kye txqꞌanky qerman. 20 Ma qet qbꞌisuꞌna ikxji tzan kꞌon jqet yoliꞌna tiꞌj titzaꞌ nqokꞌulun tukyꞌi te ja onbꞌil bꞌan galanni. 21 Astilji qetza nꞌok qsiꞌna qnabꞌl tzan tqet jkꞌuluꞌna kyaqil tuj tumeꞌl, nyaꞌtx aꞌox tuj twitz Qtata Dios sinoke ax tuj kywitz xjal.* 22 Junx kyukyꞌiꞌl oxik qlajoꞌna junky qerman aj oje qet tyekꞌuꞌ tuj kyꞌilaꞌj tumeꞌl titzaꞌ tetz bꞌan nꞌonen, bꞌix pyor ajnaꞌl tzan tpaj bꞌan loꞌik tkꞌuꞌj etiꞌj. 23 [Qa at abꞌl ma tzaj chaꞌon] tiꞌj te Tit, intxik eqꞌumaꞌ wetz tukyꞌiꞌl bꞌan qamiw qibꞌa bꞌix nꞌonen wukyꞌiꞌl te jun galan te etetz. Bꞌix kyiꞌj kye txqꞌanky qerman aj ajuneꞌ tukyꞌiꞌl, kyetz aꞌeꞌ kylajen kye bꞌuchꞌuj qerman bꞌix tzan tpaj kyetz te Krist nqet jiqꞌbꞌaꞌ. 24 Ntons astilji inkxik enaꞌoꞌ te kyetz tzan tel kynikyꞌ kye txqꞌanky bꞌuchꞌuj qerman etetz bꞌanꞌax nkyeqet eganiꞌ iktzaꞌx qetza oje xik jqꞌumaꞌna nim kyukyꞌiꞌl etiꞌj etetz.