7
1 Ntons waq erman aj bꞌan ganimix, aj ntzani te galan aj okaj tqꞌumaꞌ te Qtata Dios qetz. Astilji intkaj qsiꞌ kyaqil te nyaꞌtx galan aj nqokꞌulun tukyꞌi qchiꞌjel bꞌix aj at tuj qanim, ikxji tzan tkaj saq qanim tuj twitz Qtata Dios tzan tpaj nqet qxjaniꞌ te tetz.
Te Paꞌk Nyolin Titzaꞌ Nchalaj Tzan Tpaj Oje Jaw Kkyꞌixpuꞌ Kynabꞌlin Kye Aj Korint
2 Ntons, qotzaj enaꞌoꞌna chꞌin tuj etanim; komo qetza kꞌontiꞌl maꞌtx jkꞌuluj jun nyaꞌtx galan tiꞌj nijunwt, bꞌix kꞌontiꞌl maꞌtx qet qeqꞌiꞌ nijunwt, kꞌontiꞌl maꞌtx qet qelqꞌaꞌ nijunwt. 3 Wetz kꞌontiꞌl nxik nqꞌumaꞌ etetz ntzani cha tzan exik-wit npoqoꞌ; komo maꞌtx xik nqꞌumaꞌ kꞌontiꞌl nkxꞌajnaj tuj wanim, okxtel nganiꞌ kixiꞌ tuj jun tumeꞌl tzan nten junchꞌin etukyꞌiꞌl tuj kyaqil, qa tzan qanqꞌin qatzun tzan jkamik junxji. 4 Wetz witꞌlik nkꞌuꞌj etiꞌj bꞌix bꞌan nkyinchalaj etiꞌj. Etetz maꞌtx jaw etin nkꞌuꞌj bꞌix at nim chalajbꞌil tuj wanim anke nim xhchoꞌnal nꞌok wen.
5 Komo qetza aj qulna Masedony,* qetza kꞌontiꞌl oꞌojlana, sinoke tidiꞌchq bꞌis owok qen, kye xjal nkyeqꞌojin tuq qiꞌja bꞌix yatzun qetza tuj qanimna bꞌan nqoxobꞌna tuq.* 6 Per te Qtata Dios aj njaw tin kykꞌuꞌj kye aj bꞌis ateꞌ, tetz ojaw tin jkꞌuꞌjna aj tul te Tit. 7 Bꞌix nyaꞌtx aꞌox tzan tpaj tetz owul sinoke ax tzan tpaj etetz ojaw etin tkꞌuꞌj. Tetz otzaj tqꞌumaꞌ bꞌan egan tuq tzan qok etena, bꞌix titzaꞌ bꞌan nkxbꞌisun [tiꞌj te aj okyꞌik exol]a bꞌix ax bꞌan nkxbꞌisun wiꞌj wetz. Bꞌix toklen nchaꞌoꞌ kyaqil ntzani wetz ajnaꞌl bꞌan nkyinchalaj. 8 Qa tzan tpaj te uꞌj aj oxik nsamaꞌ etetz okxbꞌisun nim, wetz kꞌontiꞌl ntzaj nnaꞌon tetz. Bꞌix qa tbꞌayaꞌ otzaj nnaꞌon tetz tzan tpaj owok jun bꞌis te etetz jun tyemp, 9 ajnaꞌl nkyinchalaj nyaꞌtx tzan tpaj te bꞌis aj owok etiꞌj, sinoke tzan tpaj te aj ebꞌis ojaw ekyꞌixpuꞌ enabꞌlin. Komo te Qtata Dios otkꞌuluj tuj etanim tzan ebꞌisun [tzan stzaj enaꞌon tetz], bꞌix ikxji te uꞌj aj oxik qsamaꞌna kꞌontiꞌl owok te jun nyaꞌtx galan te etetz. 10 Oj stzaj choꞌon qanim iktzaꞌ te Qtata Dios tgan, nini [nꞌok te jun galan] tzan tjaw qkyꞌixpuꞌ qnabꞌlin tzan jkolet, bꞌix kꞌontiꞌl tidiꞌ bꞌaꞌn tzan stzaj qnaꞌon tetz. Per te aj bꞌis aj nkyebꞌisun kye aj kꞌontiꞌl nkyexnaqꞌtzan, [kꞌontiꞌl token tzan tpaj kꞌontiꞌl njaw kkyꞌixpuꞌ kynabꞌlin tzan tpaj nini], ikxji cha nkyeponajkixiꞌ. 11 Per yatzun etetz otzaj choꞌon etanim tuj jun tumeꞌl aj owel galan tuj twitz te Qtata Dios, bꞌix ajnaꞌl intok eten titzaꞌ owok te jun galan te etetz, komo oqet ekꞌuluꞌ te galan tukyꞌi jun tkꞌuꞌjlal, bꞌix oqet ekoloꞌ [te tumeꞌl galan exol], bꞌix otzaj eqꞌoj tiꞌj te nyaꞌtx galan aj nkyꞌik tuq, bꞌix nkxobꞌ tuq [tiꞌj te aj okyꞌel tzan tpaj te aj nkyꞌik tuq], bꞌix egan tuq tzan wok eten, bꞌix bꞌan nkxjoyon tumeꞌl [tzan ekꞌulun galan], bꞌix etetz oqet ebꞌisuꞌ tzan txik esiꞌ jun xhchoꞌnal tiꞌj te aj at tuq tpaj. Ikxji tiꞌj kyaqil, etetz oqet eyekꞌuꞌ kꞌontiꞌl tuq epaj. 12 Wetz kꞌontiꞌl oqet ntzꞌibꞌaꞌ aj uꞌjji tzan tpaj te aj okꞌulun nyaꞌtx galan, bꞌix ax nyaꞌtx tzan tpaj te aj oqet kꞌuluꞌ nyaꞌtx galan tiꞌj, sinoke tzan tqet eyekꞌuꞌ twitz Qtata Dios titzaꞌ nkxbꞌisun qiꞌja. 13 Tzan tpaj te ntzani qetza otzaj chewsaꞌ jkꞌuꞌjna, bꞌix aj tulen te Tit mas ochalajna tzan tpaj etetz oxik echewsaꞌ tanim. 14 Wetz ojetq tuq xik nqꞌumaꞌ tukyꞌi Tit, wetz bꞌan nkyinchalaj etiꞌj. Bꞌix kꞌontiꞌl inkaj mal tiꞌj nini, komo iktzaꞌx kyaqil qyol etukyꞌiꞌl oqtxiꞌ bꞌanꞌax tuq, ax te aj oxik nqꞌumaꞌ tukyꞌiꞌl etiꞌj etetz ax maꞌtx tzꞌel bꞌanꞌax. 15 Bꞌix tetz ajnaꞌl bꞌan nkxqetbꞌaj tganiꞌ nim oj etzaj tnaꞌoꞌ ekyaqil etetz oqet etokslaꞌ bꞌix ekꞌamoj tetz tukyꞌi jun tumeꞌl tukyꞌi txobꞌlal. 16 Wetz nkyinchalaj tzan tpaj bꞌaꞌn tzan tok witꞌlet nkꞌuꞌj etiꞌj tiꞌj kyaqil.