6
1 Ajnaꞌl waq erman, komo qetza nqoꞌonen tukyꞌi [te Qajaw Jesukrist], qgana tzan txik jqꞌumaꞌna chꞌin etukyꞌiꞌl, tzan kꞌon qet exqꞌeꞌlaꞌ te aj nim bꞌan galan aj kꞌontiꞌl nqajoꞌ aj ntzaj tsiꞌ te Qtata Dios. 2 Iktzaꞌ nyolin te aj oqet tzꞌibꞌaꞌ oqtxiꞌ ikxjani: “Aj tpon or wetz owok nsiꞌ nwiꞌ etiꞌj; bꞌix aj presis tuq tzan ekolet, wetz okxqet nkoloꞌ.”* Ntons intok esiꞌ waq enabꞌl: Maꞌtx pon te or, ajnaꞌl te qꞌij aj presis tzan ekolet.
Aj Txik Tqꞌumaꞌ Te Paꞌk Kyaqil Aj Okyꞌik Tiꞌj Tzan Tpaj Tpakbꞌen
3 Qetza kꞌontiꞌl nqet qyekꞌuꞌna jun nyaꞌtx galan kywitz txqꞌanky, tzan kꞌon tok jun nyaꞌtx galan tiꞌj te qaqꞌun. 4 Qetza nqet qyekꞌuꞌna kywitz kye xjal, qꞌapoꞌ qibꞌ nqoꞌaqꞌunan te Qtata Dios tukyꞌi nim qpasens oj tok qen tidiꞌchq, iktzaꞌ oj tok qena twitz xhchoꞌnal, bꞌix oj tpaltin tidiꞌ qetza, bꞌix oj tok qena tidiꞌchq aj bꞌan kwest, bꞌix oj jqet jubꞌchaꞌ, 5 bꞌix oj jqex siꞌ pres,* bꞌix oj kyjaw labꞌun kye xjal qiꞌj, bꞌix oj qaqꞌunana nim, bꞌix oj qipana watl, bꞌix oj qipana waꞌij. 6 Bꞌix nqobꞌetna tuj tumeꞌl galan, nꞌel qnikyꞌ byenech [tiꞌj te tumeꞌl], at nim qpasens, bꞌan galan qonabꞌlina kyukyꞌi txqꞌanky, te Txew Dios [nꞌonen qukyꞌiꞌl], nkyeqet qganiꞌ kye txqꞌanky tukyꞌi jun tkꞌuꞌjlal, 7 nqoyolina tukyꞌi tumeꞌl bꞌanꞌax, nqet qyekꞌuꞌna tajwalil te Qtata Dios, [nqokꞌuluna kyaqil] tukyꞌi qaqꞌumbꞌil aj ntzaj tsiꞌ te Qtata Dios tzan tqet te nyaꞌtx galan qitzaꞌ bꞌix tzan tqet jkoloꞌna qibꞌ tuj tumeꞌl.a 8 Qetza atqet kye xjal nqoqetna kyjiqꞌbꞌaꞌ bꞌix atqet nꞌel kyin qkyꞌexawna; atqet nkyeyolin galan qiꞌja bꞌix atqet nqoqet yoliꞌna; atqet nꞌok qꞌumaꞌ qetza aꞌoꞌna laꞌj anke nqoyolina tumeꞌl; 9 atqet nkykꞌuluꞌ qukyꞌila iktzaꞌ kꞌontiꞌl kyotzqimoꞌna anke bꞌan otzqimoꞌna; atqet nqet kybꞌisuꞌ chꞌinky jkamikna, per nyaꞌtx, bꞌix tzunx itzꞌojoꞌna; atqet nꞌok ksiꞌ xhchoꞌnal qiꞌj per kꞌontiꞌl nqoqet kykansaꞌ; 10 atqet [nqet kybꞌisuꞌ] bꞌan nqobꞌisuna per nqochalajna tuj qanim; atqet mebꞌaꞌ aꞌoꞌna per nqokꞌulun tzan kyok qꞌinon txqꞌanky; atqet chꞌinwt tidiꞌ qetza per ax at tidiꞌchq nim qetza.
11 Etetz waq erman aj Korint aj ganimix nim, qetza maꞌtx xik jqꞌumaꞌna etetz bꞌan bꞌanꞌax, bꞌix kyaqil aj atqex tuj qanim maꞌtx tzꞌok echaꞌoꞌ. 12 Bꞌix etetz kꞌontiꞌl nkxꞌajnaj tiꞌj qanima, bꞌix nim nkxqet qganiꞌna, per yatzun etetz, kꞌontiꞌl nkxkꞌulun qukyꞌilana ikxji. 13 Erman waq, wetz nqet nwitz ewitz iktzaꞌ jun kꞌwaꞌlon kyukyꞌi tkꞌwaꞌal tzan ekꞌulun qukyꞌila iktzaꞌx qetza nqokꞌuluna etukyꞌiꞌl nkxqet qganiꞌ tukyꞌi jun tkꞌuꞌjlal.
Qetz Aꞌoꞌ Iktzaꞌ Tnajbꞌil Te Qtata Dios
14 Ntons, etetz kꞌon tzꞌok ejunbꞌeꞌ etibꞌ kyukyꞌi kye aj kꞌontiꞌl nkyeꞌokslan.* Komo jun xjal aj nbꞌet tuj te tumeꞌl nyaꞌtx parej tukyꞌi jun xjal aj kꞌontiꞌl nbꞌet tuj te tumeꞌl. ¿Komo titzaꞌ oxeꞌl samet [jun aj] te xhkꞌatun tukyꞌi [jun aj] te qlolj? 15 ¿Bꞌix titzaꞌ tzan kyten dyakwerd te Krist tukyꞌi te Tajaw Choj?b ¿Bꞌix titzaꞌ parejeꞌ jun aj nꞌokslan tukyꞌi jun aj kꞌontiꞌl nꞌokslan? 16 ¿Titzaꞌ parej te jay nabꞌil Qtata Dios tukyꞌi jun jay aj jaꞌ ntzaj naꞌoꞌ titzbꞌalil tidiꞌchq? [¡Kꞌontiꞌl tidiꞌ parej!] Komo qetz aꞌoꞌ iktzaꞌ te jay nabꞌil Qtata Dios, te Qtata Dios aj at jun tanqꞌin.* Komo iktzaꞌx tetz otqꞌumaj ikxjani: “Wetz okyinnajayon tuj kyanim, bꞌix okyinqtelten kxol; okyinꞌokel te Dios aj otzajel kynaꞌoꞌ, bꞌix kyetz okyeꞌokel nxjalil.”* 17 Bꞌix astilji te Qajawil ntqꞌumaꞌ ikxjani: “Peꞌetetz waq kxol kyetz bꞌix intel epawaꞌ etibꞌ kyiꞌj bꞌix kꞌon tzꞌok emakoꞌ jun tidiꞌ aj nyaꞌtx galan,”* bꞌix “ikxji okxꞌelal galan tuj nwitz 18 bꞌix wetz okyinꞌokel jun kꞌwaꞌlon te etetz, bꞌix etetz okxꞌokel nkꞌwaꞌal.”* Ikxji ntqꞌumaꞌ te Qajawil te Qtat aj at mas nim tajwalil twitz kyaqil.